29
1 Gbɛ̃́ pↄ́ wa gbà laai maamaa mɛ́ aà swã́ gì gbãa,
kaaũ a gɛ̃aàzi kã́ndoɛ, a fɛlɛ lↄo.
2 Tó gbɛ̃maaↄ lìgua, gbɛ̃́ↄ pↄ ìↄ naɛ,
tó gbɛ̃vãi ku kpalau, wì aaukɛɛ.
3 Gbɛ̃́ pↄ́ ye ↄ̃nↄi ì a mae pↄ kɛ na,
káaluaↄ bɛ zɛsɛna ì a ↄ̃a dɛ.
4 Kía ì a bùsu zɛdↄ yã́zɛde musu,
a gbagusaɛsina sↄ̃ ì a bùsu dɛɛ.
5 Gbɛ̃́ pↄ́ lɛ́ lɛna kɛ a gbɛ̃́deeɛ
lɛ́ ba kpa azĩaɛɛ.
6 Gbɛ̃vãi tàaekɛa ì aà kũ bai ũ,
gbɛ̃maa gula ìↄ dↄ ń pↄnao.
7 Gbɛ̃maa ì laaidↄ yɛ̃̀ɛɛsaideɛ a yã́gↄ̃gↄ̃awa,
vãikɛna sↄ̃ ìli aà kã̀akɛo.
8 Gbɛ̃́laanikɛnaↄ ì wɛ̃́lɛ wã,
ↄ̃nↄnaↄ ì gbɛ̃́ↄ nↄ̀sɛ níninɛ́.
9 Tó ↄ̃nↄna gɛ̀ yã́kpalɛkɛi ń sↄũo,
sↄũpi pↄ pà yã̀, àlɛ yáalↄ yã̀,
aà lɛ́ lí kpaaũo.
10 Gbɛ̃dɛnaↄ ìↄ za tàaesaideguɛ,
aaìↄ gbɛ̃maaↄ wɛɛ.
11 Sↄũ pↄkũma ì pisi aà wɛ́waɛ,
ↄ̃nↄna sↄ̃ ì a nↄ̀sɛ suumpaɛ.
12 Tó gbãade lɛ́ swã́sɛ ɛɛyãi,
aà ìwaↄ ì gↄ̃ vãikɛnaↄ ũ píiɛ.
13 Taaside ń ĩadamadeo an yã́ɛ bee doũɛ,
Dii mɛ́ tò an wɛ́ lɛ́ gu'e ḿpii.
14 Kía pↄ́ ì yã́kpalɛkɛ taasideↄnɛ ń sĩanao,
aà kpala zĩ́napɛlɛa ìↄ gbãa gↄↄpiiɛ.
15 Totoa ń flão ì to gbɛ̃́ ↄ̃nↄkũ,
nɛ́ pↄ́ wa tò azĩaɛ ì wida a dawaɛ.
16 Tó vãikɛnaↄ lìgua, tàaekɛa ì kↄ̃ɛ,
ãma gbɛ̃maaↄ aa ń lɛ́lɛa e.
17 Ǹ n nɛ́ toto, i n nↄ̀sɛ danɛ doũ,
a to n nↄ̀sɛ àↄ yáalↄwa.
18 Gu pↄ́ Lua yã́ kúuo wìliↄ ńzĩa kũa dↄ̃o.
Báaaden gbɛ̃́ pↄ́ aà ikoyã kũa ũ.
19 Wìli zↄ toto ń lɛ́oo.
Baa tó a mà, a zĩkɛwào.
20 N gbɛ̃́ pↄ́ ì wã àↄ yã'o èa?
Sↄũ sã̀ↄwa.
21 Zↄ pↄ́ wa zàza za a ɛ̀waasogↄↄ,
a gↄ̃ gulu ũ gbɛzãɛ.
22 Pↄkũmade ì sòle da,
nↄ̀sɛyãfũnde ì duunakɛ maamaaɛ.
23 Ĩandãa ì ń busaɛ,
zĩabusaa mɛ́ ì ń kã́fĩ.
24 Gbɛ̃́ pↄ́ lɛ́ ble ń kpã́io za azĩauɛ,
ì mɛ á sì ń Luao, ↄ̃ ìli we òo.
25 Vĩakɛa gbɛ̃nazĩnaɛá baiɛ,
gbɛ̃́ pↄ́ lɛ́ Dii náaikɛ mi aↄ daa ía.
26 Gbɛ̃́ daside ìↄ ye gbãade zɛńnↄɛ,
ãma yã́kpalɛkɛa ń gbɛ̃́ↄá Dii yã́ɛ.
27 Gbɛ̃maa ye gbɛ̃́ dↄ̀ↄsai gĩyãio,
gbɛ̃vãi sↄ̃ ìliↄ ye nↄ̀sɛpuade yãkɛaio.