139
Dii yã́pii dↄ̃a
Davidi lɛ.
1 Dii, n ma tàasikà ń dↄ̃̀,
2 ń ma zↄ̃lɛa ń ma fɛlɛao dↄ̃.
Ń n zãkɛo ń yã́ pↄ́ málɛ yáↄ kũa.
3 Ni ma táa'oa ń ma wúlɛao gwa,
ma kɛkɛá píi dↄ́ɛkɛ̀nnↄ.
4 E yã́ àↄ gɛ́ bↄi ma lɛ́u,
Dii, ń dↄ̃ sã́asã.
5 Ń liaamazi kpɛ ń aɛo,
n ↄ kumala.
6 Dↄ̃a bee dɛmɛɛ dabuyã ũɛ,
a dɛmala, ma ↄ̃nↄ i kawào.
7 Má má gɛ́u mà pili n Nisĩnawai?
Má má bàalɛ tau, ńyↄ̃ↄ ku weo ni?
8 Tó ma fɛlɛ gɛ́ musu, ń kú we!
Tó ma tòo sↄ̀ miau, ń kɛ́!
9 Tó ma fɛlɛ gɛ ĩatɛ̃bilɛkĩi gukpɛ,
tó ma gɛ zↄ̃lɛ ísia baale bɛ'aɛ,
10 baa wekĩi má naa n ↄzĩɛ,
ńyↄ̃ↄ ma kũa n ↄplaauɛ.
11 Tó ma mɛ̀ gusia kumala,
ge gupua pↄ́ má kúu li gwã́ ũ,
12 gu líↄ sianɛo,
gwã́ ìↄ puanɛ lán fãanɛwaɛ,
asa gupua ń gusiao doũ nɛɛ.
13 Ḿmɛ n ma sↄ̃ pɛ̀mɛɛ,
n ma ikàsa ma da nↄ̀sɛu.
14 Ma n sáaukɛ̀, n yãkɛa ì dia,
ma kɛa dɛ dabuyã ũ, à bↄ̀ ma saɛ,
a yã́ ma kũa gbãa.
15 Gↄↄ pↄ́ ma daalɛ nɛasakpɛ guu,
ma wáe ulɛanɛo.
Kɛ́ ma mɛ lɛ́ i asii guu we,
16 n wɛsìmalɛ nↄ'itɛ̃na ũ.
Lá n ma gↄↄ dìlɛ píi,
a lɛ́ kú n taalau
zadↄ̃ a kee i daalɛo.
17 Lua, n làasoo gbiamɛɛ maamaaɛ,
a naoa zↄ̃ↄ fá!
18 Tó má ye nao, an dasi dɛ ũfãaa.
Tó ma vu, miↄ kunnↄɛ e tia.
19 Lua, bↄ́ ńlɛ dã́ ń gbɛ̃vãiↄi?
À gomala gbɛ̃dɛnaↄ!
20 N ibɛɛↄ ì n yã'o ń nↄ̀sɛvãioɛ,
n tↄ́ gbia ń lɛ́uo.
21 Dii, má za n zangudeↄguo lé?
Má ye gbɛ̃́ pↄ́ fɛ̀lɛnnↄↄ gĩyãio.
22 Má zańgu vãivãi,
ma ń dílɛ ma ibɛɛↄ ũɛ.
23 Lua, ma gwagwa, ní ma nↄ̀sɛ dↄ̃,
ma tàasika, níↄ ma asiiↄ kũa.
24 Gwa tó má dↄ́ɛ'ĩi vĩ,
ní dↄaamɛɛ n zɛ́ gasai guu.