Bibeli Luayãtaalá Soũↄ 146

146

Dii laaidↄa wɛ̃nadeↄwa

1 Àleluya!

Mapi, má Dii táasilɛ,

2 máↄ Dii táasilɛ e ma wɛ̃ni lɛ́uɛ,

máↄ lɛsi ma Luaɛ ma kua lɛ́uɛ.

3 Ásu sↄ̃kpalɛ gbãadeↄzio,

gbɛ̃suabaa ku gbɛ̃nazĩna kĩ́io.

4 Tó an wea làa, aaì ɛa gɛ̃ tíuɛ,

zĩbeezĩ yã́ pↄ́ aalɛ yá ì midɛ.

5 Báaaden gbɛ̃́ pↄ́ Yakↄbu Lua mɛ́ aà dↄnlɛde ũ ũ,

aà wɛ́ ìↄ dↄ Dii a Luazi.

6 Ɔ̃mɛ musu ń zĩ́lɛo kɛ̀,

ísia ń pↄ́ pↄ́ kú a guuↄ píi.*

7 Ì yãnakpa gbɛ̃́ pↄ́ wàlɛ gbãamↄnɛ́ↄwa,

ì blɛ kpa nↄandɛnaↄwa.

Dii ì babↄ gbɛ̃́ pↄ́ yeelɛaↄwa,

8 Dii ì vĩ̀aↄ wɛ́ wɛ̃nɛ́,†

Dii ì gbɛ̃́ pↄ́ taasi tↄ̃̀máↄ fɛlɛ,

Dii ìↄ ye gbɛ̃maaↄzi.

9 Dii ì bↄ̀mↄↄ gwa,

ì ↄda gyaaↄ ń tonɛↄwa,

ↄ̃ ì zɛ́ kaaũ gbɛ̃vãiↄnɛ.

10 Dii ìↄ kible gↄↄpiiɛ.

Siↄnadeↄ, á Lua ìↄ ku e á buiwaɛ.

Àleluya!

* 146:6 Zĩn 4.24, 14.15 † 146:8 Mat 9.30, Zãa 9.7