Bibeli Luayãtaalá Soũↄ 148

148

Dii pↄkɛaↄ aà táasilɛa

1 Àleluya!

À Dii táasilɛ aà bɛdeↄ!

À aà táasilɛ za musu!

2 À aà táasilɛ aà malaikaↄ píi!

À aà táasilɛ aà ìwaↄ píi!

3 À aà táasilɛ ĩatɛ̃ ń mↄvuao!

À aà táasilɛ saan'inaↄ píi!

4 Bàluma kpɛle pↄ́ↄ

ń í pↄ́ kú luabɛpuanaaↄ,*

à aà táasilɛ.

5 Aa Dii tↄbↄ,

asa ↄ̃mɛ yã'ò, ↄ̃ aa kɛ̀.†

6 À ń pɛpɛ ń pɛ́pɛkĩi,

aaↄ ku we gↄↄpii,‡

à kↄↄ dànɛ́, aa fↄ̃ vĩao.

7 Pↄ́ pↄ́ kú tↄↄlɛↄ, à Dii táasilɛ,

ń kpↄ̀ gbɛ̃̀nɛↄ ń ísia í títiuↄ§

8 ń loupilɛao ń lousisiao

ń lou'io ń a gbɛo

ń zàa'ĩana pↄ́ ì misiilɛ aà yã́ɛo

9 ń gbɛ̀sĩsĩↄ ń sĩ̀sĩↄnaↄ píi

ń lí nɛ'inaↄ ń sɛdɛ líↄ píi

10 ń sɛ̃̀anↄbↄↄ ń pↄtuoↄ píi

ń pↄ́taa'onkuawaↄ ń bãↄ

11 ń dṹnia kíaↄ ń buiↄ píi

ń kíaↄ ń bùsu gbãadeↄ píi

12 ń ɛ̀waasoↄ ń wɛ̃́ndiaↄ píi

ń gbɛ̃zↄ̃ↄↄ ń nɛ́fɛ̃nɛnaↄ.

13 À Dii tↄbↄ,

asa aà tↄ́ mɛ́ dɛńla,

aà zↄ̃ↄkɛ dɛ musu ń zĩ́lɛo pↄ́a.

14 À kía gbãade kpà a gbɛ̃́ↄnɛ

gbɛ̃́ pↄ́ Isailiↄ ì aà táasilɛ ũ,

aà yãmana pↄ́ kãiaànↄpiↄ.

Àleluya!

* 148:4 Daa 1.7 † 148:5 Daa 1.1, 3 ‡ 148:6 Daa 1.14 § 148:7 Daa 1.21