Bibeli Luayãtaalá Soũↄ 24

24

Dii gɛ̃a a kpɛ́u

Davidi lɛ.

1 Tↄↄlɛ ń pↄ́ pↄ́ kuwàↄá Dii pↄ́ɛ,*

dṹnia ń gbɛ̃́ pↄ́ kú a guuↄ píi.

2 À tↄↄlɛ zĩ́napɛ̀lɛ ísiau,

a kàlɛ ń swaↄ.

3 Démɛ zɛvĩ à dɛdɛ Dii sĩ̀sĩwai?

Démɛ a fↄ̃ gɛ̃ aà uai?

4 Gbɛ̃́ pↄ́ tàae vĩo mɛ́ aà nↄ̀sɛ pua,†

mɛ́ ìli zɛ ń tã́aↄo,

mɛ́ ìli lɛgbɛ̃ ń mↄafilioo.

5 Dii a báaada adegu,

Lua aà Suabana a to yã́ bↄaànↄ na.

6 Màa a dɛ ń aà kĩ́i wɛ̀ɛlɛnaↄ,

Yakↄbu buiↄ Lua aɛyanapiↄ.

7 À bĩ́ibↄlɛↄ wɛ̃wɛ̃,

à gbà ziↄ wɛ̃wɛ̃,

í tó Kía gawide‡ gɛ̃.

8 Démɛ Kía gawidepi ũi?

Dii nɛgↄ̃n gbãaɛ,

Dii zĩ̀kan gbãaɛ.

9 À bĩ́ibↄlɛↄ wɛ̃wɛ̃,

à gbà ziↄ wɛ̃wɛ̃,

í tó Kía gawide gɛ̃.

10 Démɛ Kía gawidepi ũi?

Dii Zĩgↄ̃de mɛ́ Kía gawidepi ũ.

* 24:1 1Kln 10.26 † 24:4 Mat 5.8 ‡ 24:7 1Kln 2.8