Bibeli Luayãtaalá Soũↄ 4

4

Wabi oosi kɛa

1 Davidi lɛ. Wì sí ń mↄↄnlɛaoɛ.

2 Tó ma n sisi, wea Lua ma Zɛnnↄde.

Tó má yeelɛa, ni ma gba dɛ̀ɛpookĩi.

Wɛ̃nadↄ̃mɛɛ, ní ma wabikɛa ma.

3 Gbɛ̃́ↄ, á zɛ widaa ma Lua gawidewaɛ bↄɛ ni?

Iↄ ye pↄpãↄzi, iↄ tɛ tã́aↄzi.

4 Àↄ dↄ̃ kɛ́ Dii a gbɛ̃́ↄ dìlɛ adoa,

tó ma aà sìsi, a ma yãma.

5 À kpakpanaga, ásu duunakɛo,

à làasookɛ á wúlɛkĩi, í nílɛ.

6 À sa pↄ́ dɛ à o o,

í Dii náaikɛ.

7 Dasi ì mɛ: Démɛ a ɛ̀fãaikɛwɛ̃ɛi?

Wá wɛgwa Dii, báaadawágu.

8 Baa tó pↄ́wɛna ń vɛ̃ɛo dińzi,

pↄna pↄ́ ń dàmɛɛ ma sↄ̃u dɛ ń pↄ́a.

9 Mi wúlɛ i'o ń a nao kau,

asa Dii, ḿmɛ ni to màↄ ku dↄdↄa.