59
Ma si ma ibɛɛↄwa
1 Lɛ pↄ́ Davidi dà gↄↄ pↄ́ Saulu gbɛ̃́ↄ zĩ̀ aa aà dã́dã aà bɛ aa aà dɛ.
2 Ma Lua, ma si ma ibɛɛↄwa,
ma bↄ gbɛ̃́ pↄ́ fɛ̀lɛmanↄↄ guu.
3 Ma si vãikɛnaↄwa,
ma bↄ gbɛ̃dɛnaↄ ↄzĩ.
4 Gwa, aalɛ ma kpakpaɛ,
gbɛ̃́ pãsĩↄ lɛ́ sòlekɛmanↄ.
Dii, mi tàae ge duunakɛnɛ́o,
5 mi zãnɛ́ yãewao,
ↄ̃ aa kú ń naaamanↄ sↄuo.
Ma wɛgwa! Fɛlɛ mↄ dↄmalɛ!
6 Mpi Dii Lua Zĩgↄ̃de, Isailiↄ Lua,
fɛlɛ ĩada bui píiwa.
Ńsu bↄnkpɛde vãipiↄ wɛ̃nagwao.
7 Aaì ɛa su oosi lↄ, aaì wɛ̃́lɛ kɛɛlɛ,
aaì hɛ̃̀ɛkɛa lán gbɛ̃ↄwa.
8 Gwa, an lɛ́'i lɛ́ tↄ̃́,
fɛ̃na kpá ń lɛ́u.
Aaì mɛ ńlɛ ń yãmao.
9 Mpi sↄ̃ Dii, ni ń yáalↄ,
ni bui píi láanikɛ.
10 Lua ma gbãa, ma wɛ́ dↄnzi,
ḿmɛ ń ma aafia'ekĩi ũ.
11 Lua a dↄaamɛɛ a gbɛ̃kɛ guu,
a to mà tidↄ ma wɛ̀lɛpiↄla.
12 Dii wá sɛ̀ngbao, ńsu ǹ ń dɛdɛo,
kɛ́ an yã́ su sã ma gbɛ̃́ↄguo yã́i.
To aa olo'olobo,
ní ń kwɛ́ ń n gbãao.
13 Yã́ pↄ́ ì bↄ ń lɛ́uá duunaɛ.
To an tòe ń pui,
asa aaì lɛgbɛ̃ pãɛ aaì gbɛ̃́ ká.
14 Ǹ ń midɛ ń pↄkũmao,
ǹ ń bãdɛ, aasu wàↄ ku lↄo.
Gbɛ̃́ pↄ́ kú e tↄↄlɛ lɛ́waↄ i dↄ̃
Lua mɛ́ lɛ́ kible Yakↄbu buiↄwa.
15 Aaì ɛa su oosi, aaì wɛ̃́lɛ kɛɛlɛ,
aaì hɛ̃̀ɛkɛa lán gbɛ̃ↄwa.
16 Aaì liaaliaa wàↄ pↄblea wɛɛlɛ,
tó aai kão, aaì gbokɛɛ.
17 Mapi sↄ̃ má lɛsi n gbãa yã́ musu,
má gulakɛ kↄↄ n gbɛ̃kɛ yã́ musu,
asa ḿmɛ ń ma aafia'ekĩi ũ,
ḿmɛ ń ma ulɛkĩi ũ taasikɛgↄↄzĩ.
18 Lua ma gbãa, má n táasilɛ,
asa ḿmɛ ń ma aafia'ekĩi ũ,
ni gbɛ̃kɛkɛmɛɛ.