Bibeli Luayãtaalá Soũↄ 66

66

Lua sáaukpaa

1 Dṹnia gbɛ̃́pii, à guladↄ Diiwa,

2 à lɛsi aà tↄ́ gawi yã́ musu,

à aà táasilɛ à aà tↄbↄ.

3 À o Luaɛ: N yãkɛaↄ ì dimá,

n gbãa zↄ̃ↄ ì to n ibɛɛↄ vlãnau.

4 Dṹnia gbɛ̃́pii ì kúlɛnɛ,

aaì n táasilɛ aa n tↄbↄ.

5 À mↄ Lua yãkɛaↄ gwa,

yã́ pↄ́ a kɛ̀ gbɛ̃nazĩnaↄnɛ i diwá.

6 À ísia lì gugii ũ*

aa bùa swawa kɛ̀sɛ.†

Wà pↄnakɛ aà yã́ musu.

7 Ìↄ kible ń a gbãao gↄↄpii,

aà wɛ́ ìↄ ku bui píiwa.

Swã́gbãadeↄ su dↄ́ɛaànↄo.

8 Buipãleↄ, à wá Lua sáaukpa,

aà táasilɛa àↄ dↄ á lɛ́u.

9 Ìↄ wá wɛ̃ni dↄ̃́awɛ̃ɛ,

ìli tó wa kpaguao.

10 Lua, asa n wá yↄ̃́,

n wá baasa lán ã́nusuwa.

11 N gɛwanↄ gukpaoloonau,

n wá wó wì ń aso gbiao.

12 Ń tò wà ↄzↄ̃̀zↄ̃ wá mikpɛi,

wà tɛ́ dìwɛ̃ɛ, í wá kṹ wá nↄɛ,

ↄ̃ n mↄwanↄ gu namadeɛ beeu.

13 Má mↄ́ n ua ń sa pↄ́ wì a pↄ́ kátɛu à tɛ́kũ obↄo,

má lɛ́ pↄ́ má kɛ̀maↄ fĩabo,

14 yã́ pↄ́ bↄ̀ ma lɛ́u ma taasikɛgↄↄ.

15 Má sa'oma ń pↄ́ mɛkpaaↄ,

má sãsakaoↄ kpasanɛ,

mí n gbagba ń zuswanaↄ ń blesanaↄ.

16 Á gbɛ̃́ pↄ́ á Lua vĩa vĩↄ, à mↄ ma,

mí yã́ pↄ́ a kɛ̀mɛɛ oɛ́.

17 Ma wiilɛ̀wà,

aà táasilɛa dↄ ma lɛ́u.

18 Tó má yãvãi kũa ma sↄ̃u,

dↄ̃ Dii gì ma yãmai.

19 Ãma à ma yãmà,

ↄ̃ à ma wabikɛa sì.

20 Má Lua sáaukpa,

i gí ma wabikɛa maio,

i gí gbɛ̃kɛkɛimɛɛo.

* 66:6 Bↄa 14.21 † 66:6 Yoz 3.14-17