96
Dii mɛ́ Kía zↄ̃ↄ ũ
(1Lad 16.23-33)
À lɛ̀ dafu sí Diiɛ,
dṹnia gbɛ̃́pii, à lɛsi Diiɛ.
À lɛsi Diiɛ, í aà tↄbↄ,
àↄ aà zĩblea baokpa lá gu lɛ́ dↄ.
À aà gawi yã'o buiↄnɛ,
à aà yãbↄnsaɛↄ galikɛ gbɛ̃́piiɛ.
Dii zↄ̃ↄ, à kà wà aà táasilɛ,
à kà wà vĩakɛɛ̀ dɛ diiↄla píi.
Buipãleↄ diiↄá pↄ́ gianaↄnɛ,
Dii mɛ́ musu kɛ̀.
Zↄ̃ↄkɛ ń bɛɛɛo kuwà,
gbãa ń gawio ku aà kĩ́iɛ.
 
À gawi ń gbãao dↄ̃ Diiɛ,
bùsu píi gbɛ̃́ↄ, à dↄ̃ Diiɛ.
À Dii tↄ́ gawi dↄ̃ɛ̀,
à mↄ aà ua, í aà gba pↄ́.
À kúlɛ Diiɛ ń lousisi'ulaↄ daa,
zĩ́lɛdeↄ, à tó á mɛ àↄ kukɛ aà aɛ,
10 í o bui píiɛ, Dii mɛ́ lɛ́ kible.
À dṹnia kàlɛ gíũgiũ, a deea vĩo.
A yã́kpalɛkɛ ń gbɛ̃́piio a zɛ́wa.
11 Musudeↄ, à pↄnakɛ,
zĩ́lɛdeↄ, à vĩ àↄ kɛ̃aa,
ísia ń pↄ́ pↄ́ kúuↄ, à kↄ̃fĩkɛ.
12 Sɛ̃̀a ń pↄ́ pↄ́ kúuↄ, à kúkuakɛ,
lí pↄ́ kú lákpɛuↄ i gulakɛ píi.
13 Aa pↄnakɛ Dii aɛ, asa àlɛ mↄ́,
àlɛ mↄ́ yã́kpalɛkɛi ń dṹniaoɛ.
A yã́kpalɛkɛ ń dṹniao a zɛ́wa,
a yã́gↄ̃gↄ̃ gbɛ̃́ↄnɛ ń sĩanao.