98
Dii mↄa táasilɛa
À lɛ̀ dafu sí Diiɛ,
asa à yãbↄnsaɛↄ kɛ̀,
à zĩblè ń a gã̀sa pↄ́ a kua adoa gbãao.
Dii tò wa dↄ̃̀ a zĩblè,
à a gbɛ̃suabaa gbãa ↄ̀lↄ bui píiɛ.
Gbɛ̃kɛ ń náai pↄ́ a vĩ ń wá Isailiↄ dↄaàgu.
E dṹnia lɛ́wa wa è lá wá Lua zĩblè.
 
Dṹnia gbɛ̃́pii, à pↄna wii dↄ Diiwa,
à vĩ ń wiio, à gulakɛ à lɛ̀ sí.
À lɛsi Diiɛ ń mↄↄnlɛao,
ń mↄↄnlɛao ń lɛtɛ̃dↄawao
ń kã̀aepɛao ń kuu'ↄo,
à pↄna wii dↄ Dii wá Kíawa.
Ísia ń pↄ́ pↄ́ kúuↄ, à kↄ̃fĩkɛ,
ń tↄↄlɛo ń gbɛ̃́ pↄ́ kuwàↄ píi.
Swaↄ, à gã̀alɛ Dii aɛ.
Gbɛ̀sĩsĩↄ, à gulakɛ sãnusãnu,
asa àlɛ mↄ́ yã́kpalɛkɛi tↄↄlɛɛ.
A yã́kpalɛkɛ ń dṹniao a zɛ́wa,
a yã́gↄ̃gↄ̃ gbɛ̃́ↄnɛ ń sĩanao.