11
Davidi kpaa Isailiↄ kpalau
(2Sam 5.1-10)
1 Isailiↄ mↄ̀ Davidi kĩ́i ḿpii Hɛblↄ̃ aa mɛ̀: Wá au doũɛ.
2 Za zi, baa gↄↄ pↄ́ Saulu dɛ kía ũ, ḿmɛ ni dↄaawɛ̃ɛ zĩlau gɛa ń suao. Ɔ̃ Dii n Lua ònɛ ḿmɛ ńyↄ̃ↄ dɛ a gbɛ̃́ Isailiↄ dↄaana ũ, an kía ũ.
3 Kɛ́ Isaili gbɛ̃zↄ̃ↄↄ mↄ̀ kí Davidi kĩ́i Hɛblↄ̃ ḿpii, we à lɛdoũkɛ̀uńnↄ Dii aɛ, ↄ̃ aa nísikà aà miwa aa aà kpà Isailiↄ kpalau, lá Dii dà Samuɛliɛ a òwa.
4 Davidi ń Isailiↄ tↄ̃̀u Yelusalɛũ pↄ́ wì mɛ lↄ Yebusi ḿpii. Ɔ̃ Yebusideↄ
5 ò Davidiɛ: Ńyↄ̃ gɛ̃ lao. Ń beeo Davidi wɛ̃́lɛ bĩ́ide pↄ́ wì mɛ lↄ Siↄnapi sì, ↄ̃ à gↄ̃̀ aà wɛ̃́lɛ ũ.
6 Gↄↄ bee Davidi mɛ̀: Gbɛ̃́ pↄ́ dↄ̀aa lɛ̀lɛ Yebusideↄwa káau mɛ́ a gↄ̃ zĩgↄ̃ↄ swana ũ, an gbɛ̃zↄ̃ↄ ũ. Zeluia nɛ́ Yoabu mɛ́ gɛ̀ káau, ↄ̃ à gↄ̃̀ ń swana ũ.
7 Davidi bɛkpà wɛ̃́lɛ bĩ́idepiu, ↄ̃ wà tↄkpàɛ̀ Davidi Wɛ̃́lɛ.
8 À kpɛ́ↄ dↄ̀dↄ lìai za gu pↄ́ wà Milo ɛ kàka ń bùsuo e a bĩ́iwa, mɛ́ Yoabu wɛ̃́lɛpi gu pↄ́ gↄ̃̀ↄ kɛ̀kɛ.
9 Davidi gbãa lɛ́ dɛdɛɛ, asa Dii Zĩgↄ̃de kuaànↄɛ.
Davidi nɛgↄ̃naↄ
(2Sam 23.8-39)
10 Davidi nɛgↄ̃naↄ kíaↄ yã́n kɛ. Ampiↄ ń Isailiↄ píi aa zɛ̀aànↄ aà kíakɛ yã́ musu. Aa aà kpà Isailiↄ kía ũ lá Dii òwa.
11 Davidi nɛgↄ̃napiↄ tↄ́n kɛ: Akemↄ gbɛ̃́ Yasↄbaũ mɛ́ nɛgↄ̃n tↄde gbɛ̃ↄn àaↄ̃ↄ swana ũ. Aàpi mɛ́ sↄ̃na sɛ̀ gbɛ̃ↄn ↄ̀aa do ń basↄoↄzi, à ń zↄ̃zↄ̃ò píi gↄↄdoũzĩ.
12 Aà gbɛa Dodai nɛ́ Ɛleazaa, Ahoa gbɛ̃́ kú nɛgↄ̃n gbɛ̃ↄn àaↄ̃piↄ guu lↄ.
13 A kú ń Davidio gↄↄ pↄ́ Filitɛ̃ↄ kã̀aa aa zĩkà Pasadamiũ. Isailiↄ pↄ̀ↄbↄzãkɛ̀ gu pↄ́ naa bú kúu.
14 Aàpi ń a gbɛ̃́ↄ aamɛ zɛ̀ wà gì búpi guoguo. Aa Filitɛ̃ↄ dɛ̀dɛ, ↄ̃ Dii tò aa zĩ̀ zↄ̃ↄ blè gↄↄ bee.
15 Nɛgↄ̃n gbɛ̃ↄn baakwiↄ guu, gbɛ̃ↄn àaↄ̃ↄ mɛ́ bↄ̀ gɛ̀ Davidi kĩ́i Adulaũ gbɛ̀'ɛu. Filitɛ̃ↄ gãli bòo kálɛa Lefai guzulɛu.
16 Gↄↄ bee Davidi ku sɛ̃gbãu mɛ́ Filitɛ̃ gudↄ̃anaↄ ku Bɛtɛlɛũ.
17 Davidi lɛ́ a bɛ í nidɛ à mɛ̀: Démɛ a gɛ́ Bɛtɛlɛũ bↄlɛ lↄ̀ↄ'i tↄ́imɛɛi?
18 Ɔ̃ gbɛ̃ↄn àaↄ̃piↄ gɛ̀ gɛ̃̀ Filitɛ̃ↄ bòou, aa Bɛtɛlɛũ bↄlɛ lↄ̀ↄpi í tↄ̀ sùò Davidiɛ. Ɔ̃ i we mìo, a tↄ̃̀lɛ Diiɛ sa'o'i ũɛ.
19 À mɛ̀: Kai ma Lua, má fↄ̃ íɛ bee mio. Gbɛ̃́ pↄ́ aa gì ń wɛ̃niiↄ auɛ! I we mìo. Nɛgↄ̃n gbɛ̃ↄn àaↄ̃piↄ yãkɛan we.
20 Yoabu dãuna Abisai mɛ́ nɛgↄ̃n gbɛ̃ↄn baakwipiↄ swana ũ. Aàpi mɛ́ sↄ̃na sɛ̀ gbɛ̃ↄn ↄ̀aa do ń basↄoozi à ń dɛdɛ, ↄ̃ à tↄbↄ̀ gbɛ̃ↄn baakwipiↄ guu.
21 À tↄbↄ̀ dɛ nɛgↄ̃n gbɛ̃ↄn àaↄ̃piↄla, ↄ̃ à gↄ̃̀ ń dↄaana ũ, kási a ku nɛgↄ̃n tↄde gbɛ̃ↄn àaↄ̃piↄ guuo.
22 Yoiada nɛ́ Benaia, Kabazee gbɛ̃́á zĩ̀kan wↄ́ↄdeɛ. Aà yãkɛaↄ dasi. À Mↄabu nɛgↄ̃n tↄdeↄ dɛ̀ gbɛ̃ↄn pla. À gɛ̃̀ ɛ guu gↄↄ pↄ́ lougbɛ kwɛ̀, à nↄ̀ↄmusu dɛ̀u.
23 À Egipi gbɛ̃́ pↄ́ a gbã̀a kà gã̀sĩsuu sↄo dɛ̀. Egipi gbɛ̃́pi sↄ̃mpa dɛ lán zwã̀atãn àsaliwaɛ, ↄ̃ Benaia sↄ̃̀aàzi ń goo, à aà sↄ̃napi sìwà à aà dɛ̀ò.
24 Yoiada nɛ́ Benaia mɛ́ yã́piↄ kɛ̀, ↄ̃ à tↄbↄ̀ nɛgↄ̃n gbɛ̃ↄn baakwipiↄ guu.
25 À tↄbↄ̀ dɛ nɛgↄ̃n gbɛ̃ↄn baakwipiↄla, kási a ku nɛgↄ̃n tↄde gbɛ̃ↄn àaↄ̃piↄ guuo. Ɔ̃ Davidi aà dìlɛ a dↄaiↄ gbɛ̃zↄ̃ↄ ũ.
26 Nɛgↄ̃napiↄ tↄ́n kɛ:
Yoabu dãuna Asaɛli,
Dodo nɛ́ Ɛlana Bɛtɛlɛũ gbɛ̃́,
27 Alodi gbɛ̃́ Samↄ,
Peloni gbɛ̃́ Ɛlɛzi,
28 Tekoa gbɛ̃́ Ikesi nɛ́ Ila,
Anato gbɛ̃́ Abiɛzɛɛ,
29 Usa gbɛ̃́ Sibekai,
Ahoa gbɛ̃́ Ilai,
30 Nɛtofa gbɛ̃́ Malai,
Nɛtofa gbɛ̃́ Baana nɛ́ Ɛlɛbu,
31 Gibɛa pↄ́ kú Bɛ̃yãmɛɛ bùsuu gbɛ̃́ Libai nɛ́ Itai,
Pilatↄ̃ gbɛ̃́ Benaia,
32 Gaasi guzulɛ gbɛ̃́ Idai,
Alaba gbɛ̃́ Abiɛli,
33 Bauliũ gbɛ̃́ Azemavɛ,
Saaleboni gbɛ̃́ Ɛliaba,
34 Gizoni gbɛ̃́ Asɛũ nɛgↄ̃ɛↄ,
gusĩsĩde gbɛ̃́ Sage nɛ́ Yonatãa,
35 gusĩsĩde gbɛ̃́ Sakaa nɛ́ Ahiaũ,
Ulu nɛ́ Ɛlifala,
36 Mɛkɛla gbɛ̃́ Efɛɛ,
Peloni gbɛ̃́ Ahia,
37 Kaamɛli gbɛ̃́ Ɛzɛlo,
Ɛzɛbai nɛ́ Naalai,
38 Natã dãuna Yoɛli,
Ageli nɛ́ Mibaa,
39 Amↄni bui Zɛlɛki,
Beelo gbɛ̃́ Naalai, Zeluia nɛ́ Yoabu zĩkabↄkũna,
40 Yɛtɛɛ buiↄ Ila ń Galebuo
41 Iti bui Uli,
Alai nɛ́ Zabada,
42 Siza nɛ́ Adina, Lubɛni buiↄ swana
ń a gbɛ̃́ↄ gbɛ̃ↄn baakwi.
43 Maaka nɛ́ Anana,
Miti gbɛ̃́ Yosafa,
44 Asalo gbɛ̃́ Uzia,
Aloee gbɛ̃́ Otaũ nɛgↄ̃ɛↄ Sãma ń Yeiɛlio,
45 Simɛli nɛ́ Yediaɛ
ń a dãuna Yoha Tizi gbɛ̃́o,
46 Maava gbɛ̃́ Ɛliɛli,
Ɛlinaaũ nɛgↄ̃ɛↄ Yelibai ń Yosaviao,
Mↄabu gbɛ̃́ Itamaa,
47 Ɛliɛli ń Ɔbɛdio
ń Mɛzobi gbɛ̃́ Yaasiɛo.