10
Ma gbɛ̃́ↄ, yã́ pↄ́ má yei ma sↄ̃ guu, málɛ a wabikɛ Luawa mɛ́ Isailiↄ suabaa ũ. Má dɛ a seelade ũ, kɛ́ aa ãiavĩ ń Lua yã́o, ãma an wɛ́ kɛ̃ao. Asa aa lá Lua ì to yã́ bↄńnↄ na dↄ̃o, ↄ̃ aaìↄ wɛɛlɛ yã́ bↄńnↄ na ń ńzĩa gbãao. Aai lá Lua ì to yã́ bↄńnↄ na sio. Asa Kilisi Mↄizi ikoyã lɛpàpa, ↄ̃ yã́ ìↄ bↄ ń aà náaikɛnaↄ na. Lá ikoyã ì to yã́ bↄńnↄ na ↄ̃ Mↄizi ò a taalau à mɛ̀, gbɛ̃́ pↄ́ yã́pi kũa aↄ ku a sabai.* Lá luanaaikɛa ì to yã́ bↄńnↄ na a ò à mɛ̀:
Ńsu o n nↄ̀sɛu,
démɛ a gɛ́ luabɛ à Kilisi pilaio,
ge démɛ a gɛ́ bɛdau à Kilisi bↄ gauio.
Yã́ pↄ́ a òn kɛ:
Yã́pi kunnↄ kãi,
a kú ń lɛ́u ń n nↄ̀sɛo.
 
Luanaaikɛa yã́ pↄ́ wi a waasokpa ↄ̃n yã́pi ũ. Tó ń ò ń lɛ́o gupuau Yesu mɛ́ Dii ũ, mɛ́ ń a náai vĩ n nↄ̀sɛu Lua aà bↄ̀ gau, a n suaba. 10 Asa yã́pi náai vĩa nↄ̀sɛu ì to gbɛ̃́ bↄ maa, mɛ́ yã́pi oa ń lɛ́o ì gbɛ̃́ suaba. 11 A kɛ̃a Luayãtaalau wà mɛ̀, wí a gbɛ̃́ pↄ́ lɛ́ aà náaikɛ kũo.
12 Yudaↄ ń buipãleↄ dodoa kↄ̃ɛo, asa ampii an Dii doũɛ, ì kã́fĩakɛ a sìsinaↄnɛ píi. 13 Asa Dii sìsinaↄ bↄ píiɛ.§ 14 Kpelewa aa aà sísi aà náaikɛsaii? Kpelewa aa aà náaikɛ aà yã́ masaii? Kpelewa aa aà yã́ ma waasokɛnasaii? 15 Tó wi waasokɛnaↄ zĩmáo, kpelewa aa waasokɛnɛ́i? A kɛ̃a Lua taalau wà mɛ̀: Baonakpanaↄ mↄa na.* 16 Ãma gbɛ̃́pii i baonapi sio. Ɔ̃ Isaia mɛ̀: Dii, démɛ wá yã́ sìi? 17 Beewa luanaaikɛa ì bↄ aà yãmaa kĩ́iɛ, mɛ́ yã́piá Kilisi yã́ɛ. 18 Ma mɛ̀ yóo! Aai mao lé? Aa mà.
An lↄↄ tà dṹnia guu píi,
an yã'oa gɛ̀ e tↄↄlɛ lɛ́wa.
19 Ma mɛ̀ yóo! Isailiↄ i dↄ̃o lé? Mↄizi dↄ̀aa ò à mɛ̀:
Má tó bui pↄ́ aa dɛ ma gbɛ̃́ ũoↄ á pↄ fɛlɛɛ́,
má tó á pↄ pa bui wɛ́siadeↄ yã́ musu.§
20 Ɔ̃ Isaia sↄ̃dìlɛ à Lua lɛdↄɛkɛ̀ à mɛ̀:
Gbɛ̃́ pↄ́ aalɛ ma kĩ́i wɛɛlɛoↄ mɛ́ ma e,
ma azĩa ↄ̀lↄ gbɛ̃́ pↄ́ aalɛ ma gbɛaoↄnɛ.*
21 Isailiↄ yã́ musu sↄ̃ Lua ò:
Za kↄↄ e oosi ma ↄdↄ̀ bui swã́gbãade pↄ́ fɛ̃̀manↄↄzi.
* 10:5 Lev 18.5 10:8 Iko 30.12-14 10:11 Isa 28.16 § 10:13 Yoɛ 3.5 * 10:15 Isa 52.7 10:16 Isa 53.1 10:18 Soũ 19.4 § 10:19 Iko 32.21 * 10:20 Isa 65.1 10:21 Isa 65.2