22
Davidi Dii sáaukpaa a zĩblea yã́ musu
(Soũ 18)
Kɛ́ Dii kí Davidi bↄ̀ Saulu ń a ibɛɛ kĩniↄ ↄzĩ, à lɛdà ń Diio à mɛ̀:
Dii mɛ́ ma gbɛsi ũ ń ma zɛgikĩio,
ì ma misi.
Ma Lua mɛ́ ma gbɛsi ũ,
mi naaàzi.
Ɔ̃mɛ ma sɛ̀ngbao ũ
ma Suaban gbãa ń ma gulɛsĩo ũ,
ma ulɛkĩi ń ma bↄkĩio ũ,
ì ma si gbɛ̃́ pãsĩↄwa.
Dii kà wà aà sáaukpa.
Mi lɛzuaàzi,
ì ma bↄ ma ibɛɛↄ ↄzĩ.
Gó kpàlɛmanↄ,
kaalɛ swa lɛ́ ma ble.
Mia baↄ galakpàmɛɛ,
ga baikpà ma aɛ.
Ma yeelɛa guu ma Dii sìsi,
ma lɛzù ma Luazi,
ↄ̃ à ma yãmà za a bɛ,
ma wii kàwà, à gɛ̃̀ aà swã́u.
Tↄↄlɛ lùalua à zĩ̀azĩa,
gbɛ̀sĩsĩↄ dèedee ń zĩ́nau.
Aa lùalua kɛ́ aà pↄ pà yã́i.
Súɛlɛ bↄ̀ aà níu,
tɛ́ pↄkaalɛna bↄ̀ aà lɛ́u,
a yↄ̃ↄ lɛ́ pipi aà aɛ.
10 À gu kɛ̃̀aa musu à pìla,
lou sìsi aà gbá zíɛ.
11 Àlɛ vua dia malaika gã̀sĩade kpɛ,
àlɛ yàakpa ń ĩ́anao.
12 À gusia kù azĩala,
à luabɛsiana kɛ̀ a kúkĩ́i ũ.
13 Za aà gawi pílɛau
lou lɛ́ pílɛ pãsĩpãsĩ.
14 Dii pàla za musu,
Lua Musude lↄↄ dↄ louvĩa ũ.
15 À ka fã̀ ma ibɛɛↄgu à ń fãaa,
Lua sùmá à ń yá.
16 Kɛ́ Dii pàlamá,
ísia tↄↄlɛ bↄ̀ gupuau,
kɛ́ à pↄbↄ̀ a níu,
dṹnia zĩ́na bↄ̀ puizi.
17 À ↄbↄ̀ za musu à ma kũ,
à ma bↄ ísiu.
18 À ma si ma ibɛɛ gbãawa
ń ma wɛ̀lɛ pↄ́ an gbãa dɛmalaↄ.
19 Aa ã̀naa ma wɛ̃nakɛgↄↄ,
ↄ̃ Dii zɛ̀manↄ.
20 À ma bↄ à ma gba dɛ̀ɛpookĩi,
à ma mìsi kɛ́ a yemazi yã́i.
21 Dii yãkɛ̀mɛɛ ma nↄ̀sɛmaa lɛ́uɛ,
à fĩabòmɛɛ ma gbãsĩsai lɛ́u.
22 Asa má Dii yã́ kũa,
mi vãikɛ ma a Lua tò weo.
23 Aà ikoyã ìↄ dↄaaamɛɛ píi,
mi bↄ yã́ pↄ́ a dìlɛↄ kpɛo.
24 Ma kua tàae vĩ Diiɛo,
má azĩa kũa duunasai.
25 Dii fĩabòmɛɛ ma maakɛ lɛ́uɛ,
asa a è má kú gbãsĩsai.
26 Ń náai vĩ náaideↄnɛ,
tàaesaiden n ũ tàaesaideↄnɛ.
27 Ń wásawasa gbɛ̃́ wásawasaↄnɛ,
ãma ni kↄ̃nikɛ gbɛ̃́ dↄ̀ↄsaiↄnɛ.
28 Ni zĩabusanaↄ suaba,
ni gbɛ̃́ pↄ́ aaì ńzĩa sɛ lɛsĩↄ busa.
29 Mpi Dii, ḿmɛ ń ma filia ũ,
Dii, ni ma gusia lilɛ gupua ũ.
30 Ń n gbãao má fↄ̃ kuadi kaawa,
ń ma Lua dↄnlɛo má fↄ̃ vĩ gĩa.
31 Luapi sↄ̃, aà yãkɛaↄ bↄ̀lɛi,
Dii yã́ sãa vĩo.
A dɛ sɛ̀ngbao ũ gbɛ̃́ pↄ́ nàaziↄnɛ.
32 Dii bàasio, démɛ Lua ũi?
Wá Lua bàasio, démɛ ulɛkĩi ũi?
33 Lua mɛ́ ì ma gba gbãa,
ↄ̃mɛ ì zɛpoomɛɛ súsu.
34 Ì to ma wá nakũ lán tuewa,
ì to màↄ bɛ bùsu gulɛsĩↄ musu.
35 Ì zĩkaa dadamɛɛ,
e ma gã̀sĩ a fↄ̃ mↄgotɛ̃ sá gá.
36 Ni n zĩblesɛ̀ngbao kpaa,
ni naalɛ ǹ ma tↄbↄ.
37 Ni ma zɛ́ yàasa kũmɛɛ,
ↄ̃ ma gbá lí gbãlɛo.
38 Ma pɛlɛ ma wɛ̀lɛↄzi ma ń bãdɛ̀,
mi kpɛkpao e ma gɛ ma ń dɛdɛò.
39 Ma ń wiwi míↄmiↄɛ, aai e fɛ̀lɛo,
aa kwɛ̀ gↄ̃̀ kálɛa ma gbá zíɛ.
40 N ma gba gbãa ma zĩkàò,
ń tò ma ibɛɛↄ mikpàa.
41 Ń tò ma wɛ̀lɛↄ kpɛkpà,
ↄ̃ ma a zangudepiↄ kàalɛ.
42 Aa wiilɛ̀, gbɛ̃e i ń suabao,
aa lɛzù Diizi, i yãmamáo.
43 Ma ń kɛ́ búɛbuɛ lán bùsutiwa,
ma táa'òmá lán zɛ́ guu pɛ̀lɛawa.
44 N ma bↄ ma gbɛ̃́ pↄ fɛ̀lɛmanↄↄ ↄzĩ,
n ma kɛ buiↄ mide ũ.
Gbɛ̃́ pↄ́ má ń dↄ̃oↄ ì zↄblemɛɛ,
45 bui zĩ̀loↄ ì vlãnaumɛɛ.
Tó aa ma yã'o mà, aaì misiilɛmɛɛ.
46 Buipãleↄ kúsu ì kwɛ́,
aaì bↄ ń zɛgikĩiↄu ń lualuao.
47 Dii ku! Báaaden ma gbɛsi ũ!
Wà Lua ma gbɛsi ma Suabana tↄbↄ!
48 Lua mɛ́ ì tↄsimɛɛ,
ì buiↄ totomɛɛ,
49 ì to mà pili ma ibɛɛↄwa.
N ma gba gbãa dɛ ma wɛ̀lɛↄla,
n ma bↄ gbɛ̃́ pãsĩↄ ↄzĩ.
50 A yã́i tò má ń sáaukpa buiↄnɛ,
má n táasilɛ Dii.*
51 Ì zĩ̀ zↄ̃ↄ ble kí pↄ́ á sɛ̀ɛ,
ì gbɛ̃kɛkɛ kía pↄ́ a kpàpiɛ,
ma Davidi ń ma buiↄ e gↄↄpii.
* 22:50 Lom 15.9