13
Gↄↄ bee nibↄna a wɛ̃ Davidi buiↄnɛ ń Yelusalɛũdeↄ píi duunawoloama ń gbãbↄanɛ́o yã́i. Gↄↄ bee má tã́aↄ tↄ́ bãdɛ ń bùsuu, aↄ dↄ gbɛ̃egu lↄo. Ma Dii Zĩgↄ̃de mámɛ má ò. Má ãnabi ɛgɛnaↄ midɛ ń bùsuu ń wɛlɛna pↄ́ lɛ́ ń gba lɛ́ↄ. Tó gbɛ̃́ gì lɛ́ ãnabikɛkɛ, aà de ń aà da'iao oɛ̀ à làawàn we, asa à ɛɛtò ń ma tↄ́oɛ. Tó àlɛ ãnabikɛkɛ, aà de ń aà da'iaopiↄ mɛ́ aa aà zↄ̃ aa dɛ. Gↄↄ bee wí a ãnabi píi kṹ yã́ pↄ́ aalɛ e oa yã́ musu. Aa ãnabikɛ pↄ́kã ula da aa gbɛ̃́ↄ sã́sãò lↄo. A mɛ ãnabin a ũo, zↄ̃ɛn a ũ, álɛ buakɛ za a nɛgↄↄɛ. Tó wà aà là: Bↄ́ ia mɛ́ tɛ́tɛ n ↄↄwa sↄ̃? A mɛ: É'e! Ma kɛ'ĩa ma gbɛ̃́ↄ bɛɛ.
Ma Dii Zĩgↄ̃de ma mɛ̀:
Fɛ̃nda, fɛlɛ ń ma sãdãnao,
gↄ̃ pↄ́ dɛ ma gbɛ̃do ũpi.
Sãdãnapi lɛ́, sãↄ i fãaa,*
mí ↄlia an gbɛ̃́ kpɛɛnaↄzi.
Wa bùsudeↄ lɛɛ pla lɛ wà ń dɛdɛ,
lɛɛ do i gↄ̃ a guu.
Ma Dii mámɛ má ò.
Má lɛɛ dopi baasa ń tɛ́o
lán ã́nusu baasaawa,
má ń maa lɛgwa,
lá wì vua maa lɛgwawa.
Aa ma sísi, mí wemá.
Má mɛnɛ́ ma gbɛ̃́ↄ,
aai omɛɛ Dii ń Lua.
* 13:7 Mat 26.31, Maa 14.27