3
Yésu nafafaŋ Móis
1 Gutiom, buru bugan ganabe jom mata Aláemit naĉobulĉob. Yo eĉil me ñer juote juluj ni Yésu aamme an ahu o Aláemit aboñulo me, Ateŋena ahu ámah ahu o nubaŋal me gafiumolal ni o.
2 Maagen mamu, Yésu nakakan waf waw ᵽe ti Aláemit amaŋ yo me, ti Móis akan mo me naanaŋ ni bugal Israel, gaamme yaŋ yay yal Aláemit.
3 Ban an ateᵽ me yaŋ, an ahumu ᵽan amaleni faŋ yaŋ yay yo nateᵽ me. Yo eĉil me may Yésu naᵽilo eyab gasal gufaŋ gaa Móis.
4 Maagen mamu, yaŋ yánoyan ebaje ateᵽa yo, ban an ahu ateᵽ me waf waw ᵽee o aamme Aláemit.
5 Naanaŋ Móis nakakan ᵽe ti Aláemit amaŋ yo me ni yaŋol ; ni gailool gal aroka nágitenum me wo Aláemit ajae me egiten faŋ gaŋanno búsol.
6 Bare Kirista, o Añil om o Ᵽayol Aláemit asene fuhow yaŋol aogen. Ban wolal uomal me yaŋ yauyu, eno me maagen mamu nútugaltuh liŋ ni gafium gagu ni ᵽoᵽ ni gáhagum gagu so núsumaetale me ni so.
Gáelo gagu gaa bugan bugagu gáinen me n’Aláemit
7 Yo eĉil me, ti Biinum Banabe bulob yo me buoh :
« Juun me jama firim fafu fal Aláemit,
8 jambi jitiko gunnu ti sipayul gufan naanaŋ no guceŋ me éttun fo,
funah fafu fo gulih me bi ejuh to sembeol sire me. »
9 Aláemit naage :
« Sipayul gufan gutinnenom ni fiiñ bo ni gafit gagu gámah gagu
bi ejuh to sembeom sire me ;
ban bae símit úvi gúuba gujuge táh wo nikan me ᵽe.
10 Yo eĉil me fiiñom ni fitiñil ban nieh :
“Uinumil ulimbelim únoro me.
Gumaŋérit effas wo nimaŋ me gukan.”
11 Ñer ni bitiña-fiiñom, nibbat ieh :
“Mati gúmus gúffus to nimaŋen me mb’isenil gáelok !” »
12 Gutiom, jíkanum jambi an ni buru abaj biinum bañegete, bal an áinenut, bajae ekanol náhatulo Aláemit ahu aroŋ me.
13 Jama Aláemit naroŋ n’evogul ! Kan jitaññor sembe funah-ó-funah, jambi gatil gagu gubutul min an ni buru alat ékanum gavoh gaugu.
14 Maagen mamu, wolal ulagora bugaa Kirista nuomale, eno me nútugale liŋ bi funah fafu fúsola gáhagum gagu go nubajal me kábiriŋ gunah gagu gútiar no nujual me éinen.
15 Yauyu eĉil me Bahiĉer babu m’buoh :
« Jama juun me firim fafu fal Aláemit,
jambi jitiko gunnu ti sipayul gufan naanaŋ
no guceŋ me éttun Aláemit. »
16 Bugay hetaŋ guun me firim fafu fal Aláemit mbiban n’guceŋ éttunol ? Leti hee bugan bugagu bugo Móis akan me n’gúᵽurul ni mof mamu mal Esíp ?
17 Fiiñ Aláemit bugay hetaŋ fitiñ me símit úvi gúuba ? Leti hee mul bugan bugagu gatil me ban ni guĉet ni gafit gagu gámah gagu ?
18 Bugay Aláemit annur me aah mati gunogen ni mof mamu dó najae me esenil gáelo ? Leti hee bugan bugagu buganur bugagu galat me ékanumol ?
19 Ban nujugale hum búoh gubilut gúju gunogen dó mala min gulat me efium Aláemit.