Eletar yay yo
Saak
ahiĉ me
Waf waw wabaj me n’eletar yauye
Eletar yay yaa Saak énini ti firim fo an aiye nalob fo : kakan bi eligen ni ᵽoᵽ esen buaken sijangu sasu saileni me tánotan ni mof. Guomunor gagu go Saak aboñ yo me bi ni go ᵽan kan gal ejangara gaam Esúif gúttut. Ejangaraay ubugi buroŋil búguñoguñor ni mukanay mamu maa bugaa Gires maᵽol me jávi jaju jaa Rom.
Eletar yay yaa Saak ebaje malillo mo egitene ejangaraay, maamme bulago bal eroŋ buroŋil jáhor ni wo gáinenil guroren me. Ejangaraay gúcine Aláemit malillo maumu, ban nasenil mo (Saak 1.2-8 ; 3.13-18). Yo eĉil me ñer gújue gutih ni waf waw ᵽe wáju me uhajen arafuhow : sílam sasu saa buroŋ babu (Saak 1.2-4), gafoga gal ebaj fubaj (Saak 1.9-11 ; 5.1-6), emaŋ ekan maarat (Saak 1.2-18 ; 4.1-9), batennoro (Saak 4.13-16). Eletar yay eliŋene firim faufe faah me : éinen n’Aláemit neh’ekakan an nagoror. An ájuut aroŋ o min abaje gajogor gaaro n’Aláemit ban mat’agiten yo ni bakanerol (Saak 2.14-26). Egoror, yo eomme eilo mala fuhoi aw faŋai n’ejajen bújoŋor maarat mamu. Yo eomme ᵽoᵽ eilo mala bugagu : ecokor bugan bugagu bugo majoga mujoge, jamb’utaliŋ bugagu, hani may etebenoro bújoŋoril ; yo eomme may ékanum baloberi (juluj Saak 3.1-12). Ᵽan kan bugan galet usanum Saak ahiĉe eletar yauye (Saak 2.6), bare fusanumet fafu ufu n’eñagoril mbala fo, ban gumaŋe faŋ éni mo. Saak naagil jambi guĉotihen me bugan bugagu galeh me mala gabajutil (Saak 2.1-13). Naage ᵽoᵽ : fubaj fuarat mala wo usanum waw gukane me ni fo (Saak 5.1-6).
Fúuñenum eletar yauye dáure fulobe ejangaraay mbi gukan : erambenor, elaw bugan-ó-bugan bi ni gupalil, ébbañenul ni maĉole bugagu gallime me ráli guhat maagen mamu.
1
Basaf babu baa Saak
1 Injé Saak, aamme aroka ala Aláemit ni ala Ataw Yésu Kirista, ínje ihiĉeul maa eletar yauye. Injé umu n’esaf bugan bugagu bugal Aláemit gavisor me guban babu ᵽee ni mof mamu.
Emuten sílam baĉigerul
2 Gutiom, nánonan no juom ni sílam, hani nihi ní say, mbi júsumaet nár,
3 mata, ti jiffas yo me, no juom ni sílam ban gáinenul n’guliŋ tir, go ᵽan guĉilul min júju jumuten.
4 Ban emuten yauyu juote jumuten yo bi to étij me, min mbi jíni bugan ganabe, gáriŋe, gabajut uce waŋañoil bo.
5 Eno me ace ni buru malillool mutogut, ácin mo Aláemit ; ᵽan asenol mo, mata Aláemit nah’asesen bugan bugagu ᵽe ni biinum ró básume m’bannurut.
6 Bare écin yauyu naate ácin yo ni gáinen dó, m’batehumorut. An o nah’atehumor nánini ti fulongos faa fal fo érus neh’einnul me mbiban nefaken fo fujow fuban babu ᵽe.
7 An ti ahumu jamb’aᵽinor gaa búoh alaw me waf uce Ataw, nabaj wo,
8 mata abajut gaᵽinor ganur ni buroŋol, ajogut tiñ tanur ni bakanerol ᵽoobo.
Fúsugateno ni fusanumet
9 An áinen me ni Yésu ban nakan ásugaten, naate ásumaet mata Aláemit ᵽan atebenol.
10 An asanumet me, o, mb’ásumaet may Aláemit baramer fubajol ban naalenol bi to. Maagen mamu, asanum mat’aᵽio, ᵽan anemo ti uya waa mafos mal ulah.
11 No bunaa babu bitebulo ni gásuᵽa bo ró gájalo mee, ni bullaben mafos mamu ; ñer uya waw wala mo n’umulo ulo n’ettam, ban jáari jaju jala wo n’jibao. Manur mamu may, asanum ahu ᵽan anemo mee, o ni bakanerol.
Let Aláemit nah’aĉil an nalo ni gatil
12 Gásumay ugu ni an ahu ajae me emuten o baamer ni sílam, mata búsol emuten yauyu ᵽan ayab bacamol baamme buroŋ babu bábaerit me bo Aláemit alob me esen bugan bugagu gamaŋol me.
13 An abaj me gaᵽinor gal ekan maarat, jamb’aah Aláemit asenol go ; jiffas búoh waf újuut uĉil Aláemit min atil, ban may aĉila nd’akan an natil.
14 Bare arafuhow, o, gaija gagu gaamme ni o gubuteol bi ekan maarat,
15 mbiban gaija gaugu n’gúŋar far iki gupegor gatil gagu ; ban no gatil gagu gujae me ébbagul iki guak, ᵽan ñer gúŋarul eĉet.
16 Gutiom bugo níbboli me nár, jambi jubutoro :
17 gáji gánogan gaaro n’émit nihi gúᵽurul ; Aláemit Ᵽaaya náh’ásenul go, o aĉil me gajaŋa gánogan. Aĉila anur ahu nam bi nánonan, ban bajut emoĉ yánoyan ni o.
18 Naŋare firimol faamme maagen min ánubulolal únial báuwener buvugul bítiar bola, ti aĉila akiĉ yo me.
Eutten Firim Aláemit yo bare etogut
19 Gutiom bugo níbboli me nár, jikan gurim gauge n’uinumul : ánoan ni buru naate asommen n’eutten firim Aláemit, bare aatut nah’asommen n’elob, ban ᵽoᵽ fiiñol fuotut fujas n’etiñ ;
20 an o fiiñol nihi fitiñ to me akanérit ĉol ti Aláemit aroren yo me.
21 Yo eĉil me jilat wáfowaf wo nuh’ukanul n’jisigo, jitey bakaner bánoban baarat. Jialenoro min jiyab firim fafu fo Aláemit aroh me n’uinumul, mata fo fújue fuᵽagenul.
22 Jikan ti maagen wo firim Aláemit fulob me ; jambi jubutoro min jinamo eutten fo bare.
23 Niegul maa, an auttene firim faufu mbiban akanut wo fulob me, o nánini ti an aam n’elujoro ni galujorum
24 mbiban náᵽur ajow akay ban nafaen ájumor bu náni me.
25 Bare an ahu ajae me eluj joon gúboñ gagu gáriŋ me gal Aláemit gaᵽagene me an, aban najoh liŋ ni go, an ahumu Aláemit ᵽan ásonienol ni wo naamme n’ekan ᵽee. O nd’autten go bare aban nájumor go, bare til nah’akakan wo gulob me.
26 Eno me an najogoroe búoh o ajangara ala maagen nam, mbiban ájuut ajoh butumol, an ahumu o abutoroe : fujangaraet fafu fo naamme ni fo fubajut nafa
27 bújoŋor Aláemit Ᵽayolal. Aĉila dáure til najoge búoh dó duomme bulago babu bal ajangara bakur me ban ni bíni baa maagen, daamme eramben uñiaw gaamme ni sílam bugo ubugail guĉet me, ni may waareaw bugo wáinil guĉet me, ékanum ᵽoᵽ jambi maarat mamu maa buroŋ be mukanul n’jisigo.