10
Yↄ̃nkↄkɛ karii
1 Lákũ ífĩni gɛ̀nↄ dì tó turarekɛri nísi gbĩ vãni kũ nà,
lɛn yↄ̃nkↄkɛ fíti dì gbɛ̃ kũ à ↄ̃ndↄ̃ vĩ kũ bɛ̀ɛrɛɛo tↄ́ yaka lɛ.
2 Ɔ̃ndↄ̃ri laasun dì tá ↄplai,
yↄ̃nkↄ pↄ́ dì ta ↄzɛi.
3 Bee tó yↄ̃nkↄ tɛn táa o zɛ́n,
a ↄ̃ndↄ̃ dìgↄ̃ kĩanamɛ,
àdi tó gbɛ̃ sĩnda pínki a mìsarikɛ dↄ̃.
4 Tó gbãnade pↄ fɛ̃̀nyĩ,
ǹsun go n tíaro,
kunna n laakariia dì lá ká taari zↄ̃kↄ̃ↄa.
5 Ma nɛ̀sɛyakayã ke è andunia gũn,
à de gbãnade sãtɛna yãa ũmɛ.
6 Òdi yↄ̃nkↄnↄ ká kpata zↄ̃kↄ̃n dasi,
aruzɛkɛdenↄ sↄ̃ òdigↄ̃ kú kpata fítin.
7 Ma zↄ̀nↄ è di sↄ̃a,
zĩdadenↄ sↄ̃ òtɛn táa o gɛ̀sɛ lán zↄ̀nↄ bà.
8 Gbɛ̃ kũ àtɛn wɛ̀ɛ yↄ̃ ni zu a gũn,
gbɛ̃ kũ àtɛn bĩni gboro, mlɛ̃̀ ni a só.
9 Gbɛ̃ kũ àtɛn gbɛ̀ wí, gbɛ̀ ni a kĩnna,
gbɛ̃ kũ àtɛn yaka para, yaka ni a kari bo.
10 Tó kpása lɛ́nnaro,
akũ odi a lɛ́ kɛkɛro,
sé ǹ gã̀sãwa boboi kũ gbãnao,
ama ↄ̃ndↄ̃ dì tó ò zɛ́ lemɛ.
11 Tó mlɛ̃̀ bon'ã kɛ̀ a kↄ̃kↄ̃'oriinɛ à a sò,
à àre vĩ a gũn doro.
12 Ɔ̃ndↄ̃ri lɛ́gbɛ nna,
ama yↄ̃nkↄ lɛ́ dì a kakatɛmɛ.
13 Àdi na yã'onaaa yↄ̃nkↄyↄ̃nkↄ,
àdi a mì dɛ kũ mìsariyã vãnio,
14 zaakũ yↄ̃nkↄ dì yã bↄtɛmɛ.
Lákũ gbɛ̃ke yã kũ ani su dↄ̃ro nà,
dí mɛ́ ani fↄ̃ à yã kũ ani kɛ a kpɛ onɛɛ?
15 Yↄ̃nkↄ zĩ dì a kpasamɛ,
ari se àdi zɛ́ dↄ̃ gɛna wɛ̃tɛ gũnlo.
16 Waiyoo bùsu kũ a kína de kɛfɛnna ũ,
a ìbanↄ dìgↄ̃ pↄ́ble gbɛ̃ zaa kↄnkↄ.
17 Mìnnaden bùsu kũ a kína de kínanɛ ũ,
a ìbanↄ dì pↄ́ ble a gↄrↄa gbãnakarana yãi,
adi kɛ wɛ̃dɛna yãinlo.
18 Tó gbɛ̃ ma'ã vĩ,
a kpɛ́ líkↄ̃kũnↄ dìgↄ̃ sikũnamɛ,
tó àtɛn gwa kũ wɛ́o,
a kpɛ́ ni í bo.
19 Òdi pↄ́ble zↄ̃kↄ̃ kɛ pↄnnakɛna yãimɛ,
wɛ̃mina dì su kũ yáadↄo,
ama ↄgↄ mɛ́ àdi su kũ a pínkio.
20 Ǹsun kína sↄ̃sↄ̃ro, bee n nɛ̀sɛɛ gũn,
ǹsun aruzɛkɛde káro, bee n kpɛ́ gũn,
zaakũ bã ni yã pì sɛ́tɛ à gɛ́ à ońnɛ.