11
Yinni Gusunɔ
u koo Yerusɑlɛmugibu siri
ben torɑnun sɔ̃
Yinni Gusunɔn Hunde u Esekiɛli suɑ mɑ u kɑ nùn dɑ sɑ̃ɑ yerun kɔnnɔwɔ ge gɑ wɑ̃ɑ sɔ̃ɔ yɑri yeru giɑ. Kɔnnɔ gen miyɑ u tɔmbu yɛndɑ nɔɔbu wɑ. Be sɔɔ, u Yɑɑsɑniɑ Asurin bii tubɑ kɑ Pelɑtiɑ Bɛnɑyɑn bii. Be kpuro bɑ sɑ̃ɑwɑ Isirelibɑn wirugibu. Yinni Gusunɔ u nɛɛ, tɔnun bii, tɔn be ɑ wɑ mi, bɑ sɑ̃ɑwɑ be bɑ kɔ̃sɑ bwisikumɔ mɑ bɑ tɔmbu bwisi kɔ̃si kɛ̃mɔ Yerusɑlɛmuɔ. Bɑ mɔ̀, n ǹ mɔ tɛ̃ sɑ ko dinu bɑni. Domi Yerusɑlɛmu yɑ sɑ̃ɑwɑ nge wekeru. Mɑ bɛsɛ yen tɔmbu sɑ sɑ̃ɑ nge yɑɑ ye yɑ wɑ̃ɑ te sɔɔ. Yen sɔ̃, tɛ̃ tɔnun bii, ɑ bu gerusio.
Mɑ Yinni Gusunɔn Hunde u nùn yɔɔwɑ u nɛɛ, ɑ bu sɔ̃ɔwɔ ɑ nɛɛ, nɛ, Yinni Gusunɔ nɑ yɛ̃ ye be Isirelibɑ bɑ bwisikumɔ kɑ ye bɑ gerumɔ. Wee bɑ begibu goomɔ dɑbi dɑbinu wuu ge sɔɔ. Mɑ gonu yibɑ ben swɛɛ sɔɔ. Yen sɔ̃, begii be bɑ go mi, bɑ sɑ̃ɑwɑ nge yɑɑ. Mɑ wuu gen tii gɑ sɑ̃ɑ nge wekeru. Adɑmɑ be bɑ tie bɑ wɑsi, bɑ koo bu yɑrɑwɑ bu kɑ doonɑ. Wee bɑ tɑbun bɛrum mɔ. Adɑmɑ kon de tɑɑ bi, bu bu deemɑ. Nɛ, Yinni Gusunɔwɑ nɑ ye geruɑ. Kon de bu yɑri wuu gen di. Kpɑ n bu tɔn tukobu nɔmu bɛriɑ. Nge mɛyɑ kon kɑ bu sirisinɑ. 10 Tɑbu sɔɔrɑ bɑ koo gbi. Kon bu siri be Isirelibɑ, ben tem nɔɔ burɑ yerɔ. Sɑɑ ye sɔɔrɑ bɑ koo giɑ mɑ nɛnɑ nɑ sɑ̃ɑ Yinni Gusunɔ. 11 Wuu ge, gɑ ǹ bu nɛnumɔ nge wekeru. Bɑ ǹ ko n mɑɑ sɑ̃ɑ nge yɑɑ te sɔɔ. Ben tem nɔɔ burɑ yerɔwɑ kon bu siri. 12 Sɑɑ ye sɔɔ, bɑ koo giɑ mɑ nɛnɑ nɑ sɑ̃ɑ Yinni Gusunɔ wìn gere bɑ ǹ mɛm nɔɔwɛ, kɑ wìn woodɑbɑ bɑ ǹ swĩi. Mɑ bɑ sere bwese tuku ni nu kɑ bu sikerenɛn gɑri swĩi.
13 Sɑnɑm mɛ Esekiɛli u Yinni Gusunɔn gɑri yi gerumɔ, yerɑ Pelɑtiɑ Bɛnɑyɑn bii u kpunɑ u gu. Sɑɑ ye sɔɔrɑ Esekiɛli u wuswɑɑ tem girɑri u nɔɔgiru suɑ u nɛɛ, Yinni Gusunɔ, kɑɑ dewɑ Isireli be bɑ tie bu gbisuku?
Yinni Gusunɔ u koo win tɔn
be bɑ yɑrinɛ mɛnnɑ
14 Yinni Gusunɔ u nɛɛ, 15 tɔnun bii, wee, be bɑ wɑ̃ɑ Yerusɑlɛmuɔ bɑ Isirelibɑ, wunɛn mɛro bisibu, kɑ be bɑ tie bwisi kɛ̃mɔ bɑ mɔ̀, bu yɔ̃ro mi bɑ yoru dimɔ mi, bɑ n kɑ Yinni Gusunɔ tonde, domi be, be bɑ wɑ̃ɑ Yerusɑlɛmuɔ mi, beyɑ bɑ tem mɛ wɛ̃. 16 Adɑmɑ ɑ bu sɔ̃ɔwɔ ɑ nɛɛ, bɑɑ mɛ nɑ derɑ bɑ yɑrinɛ mi, bɑ wɑ̃ɑ tem tukumɔ, sɔ̃ɔ teeru ko nɑ n kɑ bu wɑ̃ɑ nge mɛ nɑ rɑ n wɑ̃ɑ sɑ̃ɑ yerɔ. 17 Kpɑ n bu mɛnnɑ n yɑrɑ bwese nin suunu sɔɔn di mi bɑ yɑrinɛ mi, n bu Isirelibɑn tem wɛ̃. 18 Mɛyɑ bɑ koo nɑ kpɑ bu bũu ni kpuro wunɑ ni bɑ rɑ rɑɑ sɑ̃ mi, ni nɛ, Yinni Gusunɔ nɑ ǹ kĩ. 19 Kon bu gɔ̃ru teu wɛ̃ kpɑ n bu bwisiku kpɑɑnu wɛ̃. Kon ben gɔ̃ru ge gɑ rɑɑ bɔɔbu nge kperu mi wunɑ, kpɑ n bu gɔ̃ru kpɔɔ wɛ̃ ge gɑ du. 20 Kpɑ bu kɑ nɛn gere mɛm nɔɔwɑ, bu nɛn woodɑbɑ swĩi. Bɑ ko n sɑ̃ɑwɑ nɛn tɔmbu, kpɑ nɑ n mɑɑ sɑ̃ɑ Gusunɔ ben Yinni. 21 Adɑmɑ be bɑ yɔ̃rɑri bɑ ben kĩru swĩi bɑ dɑ bɑ bũnu sɑ̃ɑmɔ ni nɛ, Yinni Gusunɔ nɑ ǹ kĩ mi, kon bu ben kookoosun ɑre kɔsiɑ. Nɛ, Yinni Gusunɔwɑ nɑ yeni geruɑ.
Yinni Gusunɔn yiikon girimɑ
yɑ yɑrɑ Yerusɑlɛmun di
22 Yen biruwɑ wɔllun kɔ̃so be, bɑ kɑsi dɛriɑ bɑ seewɑ kɑ ben uruu be sɑnnu. Mɑ Yinni Gusunɔn yiikon girimɑ yɑ sɔ̃ɔsire ben wɔllɔ. 23 Mɑ win yiikon girimɑ ye, yɑ seewɑ wuu suunun di yɑ dɑ yɑ wɑ̃ɑ guuru gɑrun wɔllɔ, wuun sɔ̃ɔ yɑri yeru giɑ. 24 Mɑ Gusunɔn Hunde u Esekiɛli suɑ kɑ̃si te sɔɔ, u kɑ wurɑmɑ Bɑbiloniɔ mi Isirelibɑ bɑ yoru dimɔ. Sɑɑ yerɑ kɑ̃si te u wɑɑmɔ mi, tɑ kpɑ. 25 Mɑ u Isireli be bɑ yoru dimɔ mi, sɔ̃ɔwɑ kpuro ye Yinni Gusunɔ u derɑ u wɑ.