13
Sɔmɔ weesugibu
1 Yinni Gusunɔ u mɑɑ nɛɛ,
2 tɔnun bii, ɑ tɔn be gerusio be bɑ tii kuɑ nɛn sɔmɔbu. A de bu swɑɑ dɑki ye kon bu sɔ̃.
3 Wee ye nɛ, Yinni Gusunɔ nɑ bu sɔ̃ɔmɔ. Nɑ nɛɛ, kɔ̃sɑ koo bu deemɑ be, be bɑ sɑ̃ɑ gɑri bɑkɑsu. Domi ben tiin bwisikunɑ bɑ swĩi bɑ kɑ gɑri gerumɔ, bɑ ǹ gɑ̃ɑnu gɑnu wɑɑmɔ.
4 Bɛɛ Isirelibɑ bɛɛn sɔmɔbu bɑ sɑ̃ɑwɑ nge gbeeku bɔ̃nu ni nu bɔsu bɑnsɔ.
5 Wee bɑ ǹ dere bu gbɑ̃rɑrun kuunu kɔre. Bɑ ǹ mɑɑ gbɑ̃rɑru bɑnɛ tu kɑ bu gɑnɛ nɛ, Gusunɔn mɔrun sɑɑ sɔɔ.
6 Wee bɑ kɑ̃si weesuginu sɑɑrimɔ, mɑ bɑ gɑri gerumɔ yi yi ǹ sɑ̃ɑ gem. Bɑ mɔ̀, wee nɛ, Yinni Gusunɔwɑ nɑ bu ye kpuro wɛ̃. Adɑmɑ nɑ ǹ bu gɔre. Mɑ bɑ tɑmɑɑ kon ben gɑrin dɑm sirewɑ.
7 Adɑmɑ nɑ nɛn sɔmɔ be sɔ̃ɔmɔ mɑ ben kɑ̃sinu nu sɑ̃ɑwɑ ni ben tii bɑ sekɑ. Ben gɑri yi mɑɑ sɑ̃ɑwɑ weesu. Bɑ tɑmɑɑ nɛn gɑriyɑ bɑ tɔmbu sɔ̃ɔmɔ. N deemɑ nɑ ǹ mɑm kɑ bu gɑri koore.
8 Yen sɔ̃ tɛ̃, kon bu wɔrimɑ domi bɑ kɑ̃sinu sekɑ mɑ bɑ weesu kpɑrɑmɔ. Nɛ, Yinni Gusunɔwɑ nɑ yeni gerumɔ.
9 Kon bu nɛn dɑm sɔ̃ɔsi be, be bɑ weesu kpɑrɑmɔ mi. Bɑ ǹ ɑyeru wɑsi nɛn tɔmbun suunu sɔɔ. Bɑ koo ben yĩsɑ go mi nɛn tɔmbun yĩsɑ yoruɑ. Bɑ ǹ mɑɑ wurɔ ben temɔ. Nge mɛyɑ bɑ koo kɑ giɑ mɑ nɛnɑ nɑ sɑ̃ɑ Yinni Gusunɔ.
10 Wee bɑ nɛn tɔmbu nɔni wɔ̃kumɔ bɑ mɔ̀, bɔri yɛndɑ wɑ̃ɑ. Adɑmɑ bɔri yɛndu gɑru sɑri. Nɛn tɔmbɑ gɑni seeyɑmɔ. Mɑ sɔmɔ be, bɑ ye soo tɛɛnimɔ.
11 Adɑmɑ ɑ be bɑ soo tɛɛnimɔ mi sɔ̃ɔwɔ ɑ nɛɛ, gɑnɑ ye, yɑ koo wɔrumɑ. Guru bɑkɑ yɑ koo nɛ kɑ kpenu sɑnnu kpɑ woo bɔkɔ gu se.
12 Gɑnɑ ye, yɑ̀ n wɔrumɑ sɑɑ yerɑ tɔmbɑ koo bikiɑ bu nɛɛ, mbɑ soo yen ɑrufɑɑni ye bɑ tɛɛni mi.
13 Yen sɔ̃, wee ye nɛ, Yinni Gusunɔ nɑ gerumɔ. Nɑ nɛɛ, kon de nɛn mɔru yu woo bɔkɔ seeyɑ, kpɑ guru bɑkɑ yu nɛ. Kpɑ guru kpenu nu nɛ kɑ dɑm nu gɑ̃ɑnu kpuro go.
14 Kon gɑnɑ ye surɑ yu wɔrumɑ temɔ, kpɑ yen kpɛɛkpɛɛku gu sɔ̃ɔsirɑ. Yɑ koo bɛɛ wɔri kpɑ i gbisuku. Sɑɑ yerɑ bɑ koo giɑ mɑ nɛnɑ nɑ sɑ̃ɑ Yinni Gusunɔ.
15 Nɛ, Yinni Gusunɔ kon nɛn mɔru yɔ̃suwɑ mɑm mɑm gɑnɑ yen sɔ̃ kɑ be bɑ ye soo doken sɔ̃. Sɑɑ ye sɔɔ, bɑ koo gere bu nɛɛ, gɑnɑ ye, yɑ wɔrumɑ. Be bɑ rɑɑ ye soo doke, ben goo kun mɑɑ wɑ̃ɑ!
16 Sɔmɔ weesugii be, bɑ kpɑ be, be bɑ rɑɑ gɑri gerumɔ Yerusɑlɛmun sɔ̃, be, be bɑ rɑ n wɑɑmɔ kɑ̃siru sɔɔ mɑ bɔri yɛndɑ wɑ̃ɑ, ɑdɑmɑ bɔri yɛndu gɑru sɑri. Nɛ, Yinni Gusunɔwɑ nɑ yeni geruɑ.
Sɔmɔ tɔn kurɔ weesugibu
17 Yinni Gusunɔ u mɑɑ nɛɛ, tɔnun bii, ɑ Isirelibɑn tɔn kurɔ be bɑ tii kuɑ nɛn sɔmɔbu sɔ̃ɔwɔ ɑ nɛɛ,
18 bɔ̃rurobɑ bɑ sɑ̃ɑ. Domi bɑ kĩɑsu gbinumɔ tɔmbun nɔm wĩinu sɔɔ nge bɔki mɑ bɑ tɔmbu kpuro yɑsi sɛ̃kemɔ wirɔ bukurobu kɑ bibɔ kpɑ bu wɑ bɑ n kɑ tɔn be tɑɑre. Bɑ kĩwɑ bu nɛn tɔmbun wɑ̃ɑru kpeesiɑ kpɑ nɑ n begiru beruɑ.
19 Wee bɑ ǹ mɑn bɛɛrɛ wɛ̃ɛmɔ nɛn tɔmbun wuswɑɑɔ dĩɑ nɔm wɔɔnun sɔ̃. Mɑ bɑ tɔmbu goomɔ be n ǹ weenɛ bu go. Mɑ bɑ gɑbu deri be n weenɛ bu go. Mɛyɑ bɑ rɑ nɛn tɔmbu weesu kue kpɑ bɑ n ben wee si swɑɑ dɑki.
20 Yen sɔ̃nɑ nɛ, Yinni Gusunɔ nɑ nɛɛ, kon bu wɔri ben kĩɑ sin sɔ̃, si bɑ kɑ tɔmbun wɑ̃ɑru mwɛɛrimɔ mi. Kon bu si mwɑɑriwɑ n gɛ̃ɛku kpɑ n be bɑ rɑɑ mwɑ yɑkiɑ.
21 Kon ben yɑsi yi gɛ̃ɛku kpɑ n nɛn tɔmbu yɑkiɑ ben nɔmɑn di. Bɑ ǹ mɑɑ kpɛ̃ bɑ n bu mɔ. Bɑ koo giɑ mɑ nɛnɑ nɑ sɑ̃ɑ Yinni Gusunɔ.
22 Ben weesun sɔ̃, bɑ gemgibu nukuru sɑnkɑ, be, be nɑ ǹ dɑɑ kĩ n kɔ̃sɑ kuɑ. Bɑ yinɑ bu tɔn kɔ̃sobu kirɔ ko bu kɑ ben kom kɔ̃sum deri kpɑ bu ben wɑ̃ɑru yɑkiɑ.
23 Yen sɔ̃, bɑ ǹ mɑɑ kɑ̃sinu kɑ gɑri weesugii mɔ̀. Kon nɛn tɔmbu yɑkiɑ ben nɔmɑn di. Nge mɛyɑ bɑ koo kɑ giɑ mɑ nɛnɑ nɑ sɑ̃ɑ Yinni Gusunɔ.