4
Gusunɔn sɔmɔ u nɛɛ,
bɑ koo Yerusɑlɛmu tɑrusi
Yinni Gusunɔ u nɛɛ, wunɛ Esekiɛli tɔnun bii, ɑ biriki suo kpɑ ɑ ye doke wunɛn wuswɑɑɔ ɑ Yerusɑlɛmun weenɑsiɑ ko kɑ yorɑ biriki yen wɔllɔ. A ye koowo nge wuu ge bɑ tɑrusi, ɑ kuku yenu doke kpɑ ɑ gungunu bɑni ɑ sɑnsɑni girɑ kpɑ ɑ tɑbu sinɑmbu yi yi ɑ kɑ sikerenɑ. A sii si su yɑsu suo kpɑ ɑ su doke wunɛ kɑ gɑnɑn bɑɑ sɔɔ, kpɑ ɑ su wuswɑɑ kisi. Bɑ koo gu tɑrusi, wunɛn tii kɑɑ n gu yɔ̃re, kpɑ ye kpuro yɑ n sɑ̃ɑ yĩreru Isirelibɑn sɔ̃.
Yen biru kpɑ ɑ kpunɑ kɑ wunɛn yɛ̃si nɔm dwɑrugiɑ kpɑ ɑ n Isirelibɑn torɑnu sɔɔwɑ sere tɔ̃ɔ te kɑɑ se. Tɔ̃ɔ nin geeru tɑ kon sɑ̃ɑwɑ wɔ̃ɔ sin geeru, sì sɔɔ Isirelibɑ bɑ mɑn torɑri. Nu sɑ̃ɑwɑ sɔ̃ɔ goobɑ wunɔbu kɑ wɛnɛ kɑ wɔkuru (390). Tɔ̃ɔ ni kpuro sɔɔrɑ kɑɑ n ben torɑ ni sɔɔwɑ. Yen biru kpɑ ɑ gɔsiɑ ɑ kɑ wunɛn yɛ̃si nɔm geugiɑ kpunɑ sɔ̃ɔ weeru kpɑ ɑ wɑhɑlɑ ko Yudɑbɑn torɑnun sɔ̃. Sɔ̃ɔ teeru tɑ ko n sɑ̃ɑwɑ wɔ̃ɔ tiɑ. Kpɑ ɑ wunɛn wuswɑɑ kisi Yerusɑlɛmu giɑ ye bɑ tɑrusi, kpɑ ɑ ye gɑ̃seru kpɑre kpɑ ɑ yen gɑri gere. Mɛyɑ nɛ, Yinni Gusunɔ kon kɑ nun wɛ̃ɛ bɔke kpɑ ɑ ku rɑ sĩirɑ. Mɛyɑ kɑɑ n kpĩ kɑ yɛ̃si tiɑ ye, sere tɔ̃ɔ te nɑ nun burɑ mi, tu kɑ yibu. Kpɑ ɑ ɑlikɑmɑ kɑ swii kɑ gbɛɛ kɑ dɑ̃si kɑ dobi suɑ ɑ ye mɛnnɑ gbɛ̃ɛ teeru sɔɔ ɑ burinɑ ɑ kɑ pɛ̃ɛ ko. Yerɑ kɑɑ n dɑ di sere sɔ̃ɔ goobɑ wunɔbu kɑ wɛnɛ kɑ wɔku te, tu kɑ yibu, kpɑ ɑ n kpĩ kɑ yɛ̃si tiɑ ye. 10 Pɛ̃ɛ kure piibuwɑ kɑɑ n dɑ di nge gɑrɑmu goobun (200) sɑkɑ sɔ̃ɔ teeru. Nge mɛyɑ kɑɑ n dimɔ mi sere tɔ̃ɔ te, tu kɑ yibu. 11 Mɛyɑ nim mɛ kɑɑ mɑɑ nɔ mu ko n sɑkɑ mɔwɑ, ditiri tiɑn sɑkɑwɑ kɑɑ n dɑ nɔ sɔ̃ɔ teeru. 12 Tɔmbun bii gbebusɑ kɑɑ kɑ pɛ̃ɛ wɔ̃. Kɑɑ n dɑ ye wɔ̃wɑ ben nɔni biru. 13 Nge mɛyɑ Isirelibɑ bɑ ko n dɑ ben dĩɑnu di kɑ disi tɔn tukobun suunu sɔɔ mi kon bu yɑrinɑsiɑ.
14 Esekiɛli u Yinni Gusunɔ wisɑ u nɛɛ, nɑ tii nɛnuɑ disi kpuron di. Nɑ ǹ yɑɑ goru gɑru diire sɑɑ nɛn piiburun di. Nɑ ǹ mɑɑ yɑɑ disigiɑ gɑɑ tende. 15 Yinni Gusunɔ u wisɑ u nɛɛ, ɑ nɑɑ bisu suo ɑ kɑ wunɛn doo ko kpɑ ɑ tɔmbun bisu deri.
16 Kon dĩɑnu fiiko ye yɑ tie Yerusɑlɛmuɔ kpeesiɑ kpɑ bu bu dĩɑnu kɑ nim sɑkɑ kuɑ kpɑ bu di bu nɔ kɑ nuku sɑnkirɑnu kɑ wururɑbu. 17 Nge mɛyɑ bɑ koo dĩɑnu kɑ nim biɑ kpɑ bɑ n nuki sɑnkire be kpuro. Bɑ koo woorɑwɑ ben torɑnun sɔ̃.