Luda yã takada kũ Bisã yão ƐSITA 7

Amana lokona lía

1 Akũ kína kũ Amanao gɛ̀ɛ pↄ́ ble kũ Ɛsitao. 2 Gↄrↄ kũ òtɛn wɛ̃ mi a gↄrↄ plade pì zĩ, akũ kína Ɛsita là à pì: Ɛsita, bↄ́n ĩni wɛ́ kɛmaa? Mani kɛnnɛ. Yã kpaten ntɛn gbɛkamaa? Bee ma kpata kpadomɛ mani kpámma. 3 À wèa à pì: Tó ma n pↄnna lè akũsↄ̃ yã pìi kɛ̀nnɛ, ǹ tó màgↄ̃ kú wɛ̃̀ndiio. Wɛ́kɛ kũ ma kɛ̀mman gwe. Ǹ tó ma gbɛ̃nↄ gↄ̃ wɛ̃̀ndi vĩ. Yã kũ ma gbɛ̀kan gwe. 4 Zaakũ makũ kũ ma gbɛ̃nↄ, ò dìtɛ kũ ò ó dɛdɛ ò láka kũńwo ò ó buri bomɛ. Tó òtɛni ó yía zↄ̀nↄ ũ yãmɛ, de má yĩtɛna. Wari dí taka dí ká mà wari dↄmmaro. 5 Akũ kína a là à pì: Dímɛɛ? Dí mɛ́ ani fↄ̃ à zɛ kũ yã bire taka buri kɛnaaoo? 6 À wèa à pì: Amana vãni díkĩnan ibɛrɛ kũ à zã̀ógu pì ũ. Swɛ̃̀ɛ kɛ̃̀ Amanaa kína kũ a nanↄ pìio yã musu. 7 Kína fùtɛ a wɛ̃la pↄfɛ̃ gũn à gɛ̀ɛ líkpɛn a ↄnn. Amana sↄ̃ à gↄ̃̀ gwe kũ Ɛsitao, akũ Amana tɛn kútɛ kɛnɛ a wɛ̃̀ndi yã musu, zaakũ à è kũ kína zɛ̀o à vãni kɛarɛmɛ. 8 Kũ kína bò líkpɛn à sù pↄ́blekia gↄ̃̀nↄ, Amana lɛ̀lɛ gbà wutɛbↄ kũ Ɛsita gɛngɛsɛkɛnaaa, akũ à pì: À ye à kusi ma nanↄa ma wára kpɛ́ gũn lan yá? Kũ yã pìi bò kína lɛ́n gↄ̃̀nↄ, ò sù ò pↄ́ yĩ̀ Amana ãnnwa. 9 Kína dogarinↄ doke Abona pìnɛ: Lí pɛtɛna Amana pì bɛ sarɛ à kà gã̀sãkuru bupla akuri. Àkũ mɛ́ à lí pìi pɛ̀tɛ de à le à Mↄdekai kũ à yã mana kɛ̀nnɛ lokoa. Akũ kína pì: À a lokoa. 10 Kũ ò Amana lòko lí kũ à pɛ̀tɛ Mↄdekainɛ pìia, akũ kína pↄ kpàtɛ.