Luda yã takada kũ Bisã yão BONAA 6

Dikiri lɛ́sɛna Musanɛ Isarailanↄ surabana yã musu

1 Akũ Dikiri pìnɛ: Ĩni yã kũ mani kɛ Firi'aunanɛ e tera. Ani ń gbarɛ ma gbãna zↄ̃kↄ̃ yãi. Ani pɛ́ḿma a bùsun ma gbãna zↄ̃kↄ̃ yãi. 2 Akũ Luda ɛ̀ra à yã ò Musanɛ à pì: Makũmɛ Dikiri ũ, 3 ma bo ma su Ibrahĩ kũ Isaakuo kũ Yakubuooa Luda Gbãnasĩndapinkide ũ, ama odi ma dↄ̃ ma tↄ́ Dikiriaro. 4 Ma bàka kú kũńwo, ma pì mani Kanaanↄ bùsu kũ ò kú a gũn buri zĩ̀tↄ ũ kpáḿma. 5 Ma Isarailanↄ ndanaa mà ń zↄ̀blena Misilanↄnɛ yãi, akũ ma bàka kũ à kú kũńwoo pì yã dí sãmaguro. 6 A yã mɛ́ à tò ǹ o Isarailanↄnɛ makũmɛ Dikiri ũ. Mani á bo zĩ gbãna kũ Misilanↄ dàárɛ gũn, mani á bo zↄ̀blen. Mani yãkpatɛ kɛ kũńwo mani a bo kũ ma gã̀sã gbãnao. 7 Mani á sɛ́ ma gbɛ̃nↄ ũ màgↄ̃ de á Luda ũ, ánigↄ̃ dↄ̃ kũ makũmɛ Dikiri á Luda kũ à á bó Misila zĩ gbãna gũn ũ. 8 Mani gɛ́ kãáo bùsu kũ ma a la dà Ibrahĩnɛ kũ Isaakuo kũ Yakubuo gũn. Mani á gba àgↄ̃ vĩ. Makũmɛ Dikiri ũ.

9 Musa yã pìi ò Isarailanↄnɛ, ama odi a yã maro kũ zↄ̀zĩ pãsĩ ń mɛ̀ɛ yↄ̀ yãi. 10 Akũ Dikiri ò Musanɛ à pì: 11 Ǹ gɛ́ ǹ o Misilanↄ kína Firi'aunanɛ à Isarailanↄ gbarɛ ò bↄtɛ a bùsun. 12 Akũ Musa wè Dikiria à pì: Lákũ Isarailanↄ dì ma yã maro nà, makũ kũ ma lɛ́ tìkisi, deran Firi'auna ni ma yã ma sↄ̃ↄ?

Musa kũ Harunao buri bozirɛ

13 Dikiri yã ò Musanɛ kũ Harunao Isarailanↄ yã musu kũ Misila kínao, à òńnɛ ò bↄtɛ kũ Isarailanↄ Misila. 14 Ń buri ↄmbede káakunↄ tↄ́n dí. Isaraila daudu Rubɛni nɛ́gↄ̃gbɛ̃nↄn dí: Anↄku, Palu, Ɛzɛrↄnu, Kaami. Rubɛni burinↄn gwe danɛdanɛ. 15 Simɛↄ nɛ́gↄ̃gbɛ̃nↄn dí: Yemuɛli, Yami, Oada, Yakĩ, Zoa kũ Kanaa nↄgbɛ̃ nɛ́ Soluo. Simɛↄ burinↄn gwe danɛdanɛ. 16 Levi nɛ́gↄ̃gbɛ̃nↄ tↄ́n dí ń burinↄa: Gɛsↄmu, Koa, Mɛrari. Levi kɛ̀ wɛ̃̀ basuddo akuri awɛɛsupplamɛ. 17 Gɛsↄmu nɛ́gↄ̃gbɛ̃nↄn dí ń burinↄa danɛdanɛ: Libini kũ Simɛio. 18 Koa nɛ́gↄ̃gbɛ̃nↄ tↄ́n dí: Amlamu, Iza, Ɛblↄnu, Uziɛli. Koa kɛ̀ wɛ̃̀ basuddo akuri awɛɛ'aakↄ̃mɛ. 19 Mɛrari nɛ́gↄ̃gbɛ̃nↄn Mali kũ Musio ũ. Levi burinↄn gwe danɛdanɛ.

20 Amlamu a dasɛ̃ Yↄkɛbɛdi sɛ̀ nↄ ũ, akũ à Haruna kũ Musao ì kãao. Amlamu kɛ̀ wɛ̃̀ basuddo akuri awɛɛsupplamɛ. 21 Iza nɛ́gↄ̃gbɛ̃nↄn Kora kũ Nɛfɛgio kũ Zikirio ũ. 22 Uziɛli nɛ́gↄ̃gbɛ̃nↄn Misaili kũ Ɛlɛzafão kũ Sitirio ũ. 23 Haruna Aminadabu nɛ́ Ɛlisɛba, Nasↄ̃ dãre sɛ̀ nↄ ũ, akũ à Nadabu kũ Abiuo kũ Ɛlɛazao kũ Itamao ì kãao. 24 Kora nɛ́gↄ̃gbɛ̃nↄn Asi kũ Ɛlɛkanao kũ Abiasafao ũ. Kora burinↄn gwe danɛdanɛ. 25 Haruna nɛ́ Ɛlɛaza Putiɛli nɛ́nↄgbɛ̃nↄ doke sɛ̀ nↄ ũ, akũ à Finɛasi ì kãao. Levi buri ↄmbede káakunↄn gwe danɛdanɛ.

26 Haruna kũ Musa kũ Dikiri òńnɛ ò Isarailanↄ bↄtɛ Misila gã̀ kũ gã̀aon gwe. 27 Mↄ́kↄ̃nↄ mɛ́ ò yã ò Misilanↄ kína Firi'aunanɛ de ò Isarailanↄ bↄtɛ Misila. 28 Kũ Dikiri yã ò Musanɛ Misila, 29 à pì akãamɛ Dikiri ũ, yã kũ átɛn onɛn à o Firi'aunanɛ pínki. 30 Akũ Musa pìnɛ a lɛ́ tìkisi, deran Firi'auna ni a yã maa?