4
1 Matɛn oárɛ, gↄrↄ kũ túbibleri de nɛ́ ũ, bee tó a de aruzɛkɛnↄn de a pↄ́ ũ pínki, à de zↄ̀laro.
2 Àdi mì natɛ gwàrinↄnɛ kũ gbɛ̃ zↄ̃kↄ̃nↄ ari gↄrↄ kũ a de dìtɛa.
3 Lɛn ókↄ̃nↄ se, gↄrↄ kũ ódi kàsara kũro, odì zↄ̀ ble andunia pↄ́ kũ òdi mì natɛńnɛnↄnɛ.*fGal 4:9, Kↄl 2:8, 20*
4 Kũ gↄrↄ kũ Luda dìtɛ kà, à a Nɛ́ zĩ̀, ò a ì bisãsiri ina ũ Musa doka gũn,
5 de à ókↄ̃nↄ kũ ótɛn zↄ̀ ble Musa dokanɛnↄ bo, ò gↄ̃ a nɛ́nↄ ũ.
6 Luda a Nɛ́ Nini dà ó swɛ̃̀ɛ gũn, kũ ó de a nɛ́nↄ ũ yãi. Nini pìi dì wiki lɛ́ à pi: Baa, ma De!
7 Abire yãi zↄ̀ↄmɛ n ũ doro, nɛ́mɛ n ũ. Lákũ Luda nɛ́mɛ n ũ nà, à n kɛ a túbibleri ũmɛ.*fRom 8:15-17*
Pↄlu bídikɛna Galatianↄ yãa
8 Gↄrↄ kũ á Luda dↄ̃ro, adì do pↄ́ kũ ò de Luda ũronↄi.*f1Kↄ 8:4-6*
9 Lákũ á Luda dↄ̃ nà tera sà, atɛ̃nsa kũ Luda á dↄ̃, bↄ́yãi a ɛra átɛn arɛ dↄ pↄ́ gina futa gbãnasari pìnↄa dↄↄ? Bↄ́yãin a ɛra á ye à dońyĩ dↄↄ?
10 Adì gↄrↄ kenↄ kũ mↄ kenↄ kũ dikpɛ kenↄ kũ wɛ̃̀ kenↄ tɛ̃̀ bo.*fRom 14:5, Kↄl 2:16*
11 Vĩna ma kũ á yã musu. Ase zĩ pãn ma kɛ̀ á tɛ́ yá?
12 Ma gbɛ̃nↄ, ma wɛ́ kɛ̀áwa, à gↄ̃ lán ma bà, zaakũ ma gↄ̃ lán á bà. Ádi taari kɛmɛnɛ yãro.
13 Á dↄ̃ kũ gyãkɛnaa gũnn ma baaru nna kpàárɛ káaku.
14 Bee kũ ma gyãkɛna kɛ̀árɛ yↄ̃ogwana ũ, ádi ma gya boro ádi lɛ́'i kúmaro, a ma si lán Luda malaika kesↄ̃ Kirisi Yesu bàmɛ.
15 Arubarika kũ átɛn kɛmɛnɛ yã kɛ̀ deraa? Mani fↄ̃ mà o á yã musu mà pi, tó ani sí kɛ yã, de a á wɛ́ bòbo a kpàma.
16 Kũ ma yãpura òárɛ yãin ma gↄ̃ á zãnguri ũ sà yá?
17 Gbɛ̃ kũ̀nↄ mɛ̀ɛ wã̀ kũ á yão, ama a mana yãinlo. Ò ye à kɛ̃wámɛ, de à naḿma.
18 Mɛ̀wãna kũ gbɛ̃ yão a mana yãi mɛ́ à nna. Ma mɛ̀ɛ wã̀ kũ á yão gↄrↄ sĩnda pínkimɛ, adi kɛ gↄrↄ kũ má kú kãáo adonlo.
19 Ma nɛ́ yenyĩdenↄ, matɛni á ina wãwã kɛ dↄ ari Kirisi gↄ̃ sà da á gũn.
20 Má ye màgↄ̃ kú kãáo tera, de mà a yã'ona litɛ, zaakũ ma bídi kɛ̀ á yãamɛ.
Hazara kũ Sarao
21 À omɛnɛ, ákↄ̃nↄ kũ á ye doka iko vĩáwanↄ, ádi yã kũ à kɛ̃na Musa doka takada gũn maroo?
22 Ò pì Ibrahĩ nɛ́gↄ̃gbɛ̃nↄ ì gbɛ̃nↄn pla. À a do ì kũ zↄ̀ↄomɛ,*fNaa 16:15* akũ à a do ì kũ zĩdadeo.*fNaa 21:1-2*
23 Zↄ̀ↄ pì nɛ́ ì bisãsirikɛnaa gũmmɛ, akũ zĩdade a pↄ́ ì Luda lɛ́sɛna yãi.*fRom 9:7-8*
24 Nↄgbɛ̃ pìnↄ yã dewɛrɛ yáasi taka ũ, Luda bàka kunna kũńwo yã lɛu pla ũ. A do bò Sinai kpi kĩnaamɛ, àdi zↄ̀kɛna ińnɛ. Àkũ mɛ́ à Hazara ũ.
25 À de Sinai kpi kũ à kú Larubunↄ bùsun yáasi taka ũ. Yurusalɛmu tera de a ũ dↄ, zaakũ àtɛn zↄ̀ ble kũ a gbɛ̃nↄ ń pínkimɛ.
26 Yurusalɛmu kũ à kú musumɛ zĩdade ũ. Àkũmɛ ó da ũ.
27 Zaakũ à kɛ̃na Luda yãn ò pì:
Ǹ pↄnna kɛ, mↄkↄ̃n para kũ ńdi nɛ́ iro!
Ǹ ayuwii kɛ, mↄkↄ̃n kũ ńdi nↄ̀wãwã kɛro!
Zaakũ mↄkↄ̃n kũ n zã pã kpànyĩ,
n nɛ́ dasi de nↄgbɛ̃ kũ a zã arɛ dↄ̀a pↄ́la.
28 Ákↄ̃nↄ sↄ̃ ma gbɛ̃nↄ, Luda lɛ́sɛna nɛ́nↄn á ũ lán Isaaku bà.
29 Nɛ́ kũ ò a ì bisãsirikɛnaa gũn wari dↄ̀ nɛ́ kũ ò a ì kũ Luda Nini gbãnaooa. Lɛn à de lɛ kũ a terao.
30 À kɛ̃na Luda yãn deramɛɛ? Ò pì: Ǹ pɛ́ zↄ̀ↄ pìia kũ a nɛ́o, zaakũ zↄ̀ nɛ́ ni túbi ble kũ zĩdade nɛ́oro.*fNaa 21:10*
31 Abire yãi ma gbɛ̃nↄ, zↄ̀ nɛ́nↄn ó ũro, zĩdade nɛ́nↄn ó ũ.