37
Yusufu nana'onaa
1 Yakubu kú Kanaanↄ bùsun gu kũ a de vùtɛn.
2 Yakubu burinↄ yãn dí. Yusufu bi kɛfɛnnamɛ. A wɛ̃̀ gɛ̃ro awɛɛplade gũn kũ àtɛn sãnↄ dã kũ a vĩ̀ninↄ, a de nↄnↄ Bila kũ Zilipao nɛ́nↄ, akũ à dà vãni kũ ò kɛ̀ɛ kↄrↄmↄtↄↄ kɛ̀ a denɛ.
3 Isaraila ye Yusufui de a nɛ́ kparanↄla kũ à a ì a zĩkũnaa gũn yãi, akũ à utagyabaa zↄ̃̀nɛ.
4 Kũ a vĩ̀ninↄ è ń de ye Yusufui deńla, akũ ò zã̀agu òdi we ò yã nna o kãaoro.
5 Yusufu nana ò, akũ à bàba a vĩ̀ninↄnɛ, akũ ò ɛ̀ra ò zã̀agu de zĩ pↄ́la.
6 À pìńnɛ: À nana kũ ma ò ma.
7 Ma è ótɛn ése yĩyĩ bura, akũ ma ése baka fùtɛ à zɛ̀. Á pↄ́nↄ lìkai, akũ ò nàtɛnɛ.
8 Akũ a vĩ̀ninↄ pìnɛ: Ĩni kí blewán yá? Ĩni gbãna ble wán yá? Akũ ò ɛ̀ra ò zã̀agu de yã pↄ́la nana kũ à òo pì yãi.
9 Yusufu ɛ̀ra à nana ò dↄ, akũ à bàba a vĩ̀ninↄnɛ à pì: Ma ɛra ma nana ò dↄ. Ma è ifãntɛ̃ kũ mↄvuraao kũ susunɛ mɛ̀n kuri awɛɛdonↄ tɛn natɛmɛnɛ.
10 À nana pìi bàba a denɛ dↄ, akũ a de pàtaa à pì: Nana kpate takan n ò lɛɛ? Makũ kũ n dao kũ n vĩ̀ninↄ, óni su ò kútɛ n arɛn yá?
11 A vĩ̀ninↄ nɛ̀sɛgↄ̃baa sɛ̀ kãao. A de sↄ̃ à nana pì yã kũna a nɛ̀sɛɛ gũn.
12 A vĩ̀ninↄ gɛ̀ɛ ń de sãnↄ dã Sɛkɛmu.
13 Akũ Isaraila pì Yusufunɛ: N vĩ̀ninↄ tɛn sã dã Sɛkɛmu. Mani n zĩ ń kĩnaa. À wèa à pì: Ma laka.
14 Akũ à pìnɛ: Ǹ gɛ́ ǹ n vĩ̀ninↄ gwa kũ sãnↄ, tó ò aafia. Ǹ ɛra ǹ sumɛnɛ kũ ń baaruuo. Akũ à a gbàrɛ, à bò Ɛblↄnu guvutɛn à gɛ̀ɛ Sɛkɛmu.
15 Àtɛn likara sɛ̃̀n, akũ gↄ̃gbɛ̃ ke dàalɛ à a là: Bↄ́n ntɛn wɛtɛɛ?
16 À wèa à pì: Matɛni ma vĩ̀ninↄ wɛtɛmɛ. Tó ń ń sãdãki dↄ̃, ǹ omɛnɛ.
17 Gↄ̃gbɛ̃ pìi pì: Kũ ò bò gu dín, ma mà ò pì òtɛn gɛ́ Dotãmɛ. Akũ Yusufu pɛ̀tɛńyĩ à ń lé Dotã.
18 Kũ ò a è zã̀ dire, ari àgↄ̃ gɛ́ ká ń kĩnaa, ò lɛ́ kpàkũsũi ò pì ò a dɛ.
19 Ò pìkↄ̃nɛ: À gwa, nana'ori tɛn su zã̀ dire.
20 À tó ò a dɛ ò a zu lↄ̀gↄ dínↄ doke gũn. Óni pi nↄ̀bↄ pãsĩ mɛ́ à a dɛ̀ à sò. Ɛ̃hɛ̃ óni e lákũ a nananↄ ni mì dɛ nà.
21 Kũ Rubɛni yã pìi mà, à ye à a mì sí, akũ à pì: Òsun a dɛro,
22 àsun aru boaro. À a zu lↄ̀gↄ díkĩnan gbárannan la. Àsun a dɛro. Rubɛni òńnɛ lɛ, kũ à ye à a mì sí à a kpá a dea yãimɛ.
23 Kũ Yusufu kà a vĩ̀ninↄ kĩnaa, ò a uta bò, a utagyaba mana pìi.
24 Akũ ò a sɛ̀ ò a zù lↄ̀gↄↄ pìn. Lↄ̀gↄↄ pì da korimɛ à í vĩro.
25 Akũ ò vùtɛ òtɛn pↄ́ ble. Kũ ò wɛ́ sɛ̀, ò Sumaila buri lagatarinↄ è, ò bò Giliada bùsun òtɛn gɛ́ Misila. Ń lakuminↄn do pↄ́nↄ kũ lí'ↄ ɛzɛo kũ lí'ↄ gbĩ nnao sɛna.
26 Akũ Yuda pì a gbɛ̃nↄnɛ: Tó o ó dakũna dɛ̀, akũ o a gɛ̀ɛ ùtɛ, bↄ́ àreen óni lee?
27 À tó ò a yía Sumaila buri pìnↄa. Òsun a dɛro, ó dakũnanloo? Ó aru dokↄ̃nↄmɛ. Akũ a gbɛ̃nↄ a yã mà.
28 Kũ Midiã lagatari pìnↄ tɛn su gɛ̃ zɛ́la, akũ ò Yusufu gà ò bò lↄ̀gↄn, ò a yìa Sumaila buri pìnↄa andurufu baro, akũ ò tà kãao Misila.
29 Kũ Rubɛni sù lↄ̀gↄↄ pì kĩnaa, adi Yusufu e gwe doro, akũ à a pↄ́kasanↄ gà à kɛ̃̀kɛ̃,
30 akũ à gɛ̀ɛ a dakũnanↄ kĩnaa à pì: Nɛ́ pì kú gwe doro. Mani gɛ́ má kũ abireoo?
31 Ò blèkofĩnii kũ̀ ò dɛ̀, akũ ò Yusufu uta pìi sɛ̀ ò màtɛ a aru gũn.
32 Akũ ò a utagyabaa pìi sɛ̀ ò gɛ̀ɛo ń denɛ ò pì: Pↄ́ kũ o èn dí. N nɛ́ utan yá, ke a pↄ́nlo?
33 À dↄ̃̀, akũ à pì: Ma nɛ́ utamɛ, nↄ̀bↄ pãsĩ mɛ́ à a sò. Waiyoo, ò ma nɛ́ Yusufu kɛ̀ yákiyakimɛ.
34 Akũ à a uta zↄ̃kↄ̃ↄ gà à kɛ̃̀ à pↄ́kasa sɛ̀ à dà, akũ à a nɛ́ pì wɛ̃nda kɛ̀ gìkɛna.
35 A nɛ́gↄ̃gbɛ̃nↄ kũ a nɛ́nↄgbɛ̃nↄ sù a laakari kpátɛnɛ ń pínki, ama à gì a laakari kpátɛi à pì: Manigↄ̃ ma nɛ́ pìi gɛ̀ ↄ́ↄ dↄmɛ ari mà gɛ́ táo a kĩnaa gyãwãn. Akũ àtɛn wɛ̃nda ↄ́ↄ dↄ a nɛ́ pì yã musu.
36 Midiã pìnↄ sↄ̃ ò Yusufu yìa Pↄtifaa Misila. Firi'auna ìba kemɛ, àkũmɛ a dogarinↄ gbɛ̃ zↄ̃kↄ̃ ũ.