5
Luda Nɛ́ náanikɛnaa
Gbɛ̃ kũ àdi Yesu náani kɛ Arumasihu ũ, Luda mɛ́ à ade ì. Gbɛ̃ kũ à ye dei ye a nɛ́imɛ se. Tó ó ye Ludai, akũ ó yã kũ à dìtɛnↄ kũna, abire mɛ́ à mↄ̀wɛrɛ kũ ó ye Luda nɛ́nↄi. Zaakũ yena Ludai mɛ́ à de yã kũ à dìtɛnↄ kũna ũ. Yã kũ à dìtɛ pìnↄ de aso ũ sↄ̃ro. Zaakũ gbɛ̃ kũ Luda a ì dì zĩ̀ ble anduniaamɛ. Ó ludanaanikɛna mɛ́ àdi tó ò zĩ̀ ble anduniaa. Dí mɛ́ àdi zĩ̀ ble anduniaaa? Séde gbɛ̃ kũ à sì kũ Yesu bi Luda Nɛ́mɛ.
Yesu Kirisi sèedadenↄ
Yesu Kirisi pìin gbɛ̃ kũ à sù à da'itɛ kɛ̀ à a aru kↄ̀tɛ ũ. Adi kɛ da'itɛmɛ adoro, à da'itɛ kɛ̀ à a aru kↄ̀tɛ se. Luda Ninin a sèedade ũ, zaakũ àkũmɛ yãpurade ũ. Sèedadenↄ kun mɛ̀n aakↄ̃mɛ. Luda Nini kũ í pìio kũ aru pìio. Pↄ́ mɛ̀n aakↄ̃ pìnↄ pínki dokↄ̃nↄmɛ. Lákũ odì bisãsiri sèedakɛna sí nà, Luda sèedakɛna de abirekũla, zaakũ Luda yã pìi ò a Nɛ́ yã musumɛ. 10 Gbɛ̃ kũ àdi Luda Nɛ́ náani kɛ sèedaa pì vĩ a swɛ̃̀ɛ gũn. Gbɛ̃ kũ adi Luda yã síro Luda pìi dìtɛ ɛ́kɛde ũmɛ, zaakũ adi yã kũ Luda ò a Nɛ́ musu síro. 11 Yã kũ à òon dí: Luda ó gba wɛ̃̀ndi kũ àdi lákaro, wɛ̃̀ndii pì sↄ̃ à kú a Nɛ́ kĩnaamɛ. 12 Gbɛ̃ kũ à Luda Nɛ́ vĩ wɛ̃̀ndi kũ àdi lákaro vĩ. Gbɛ̃ kũ à Nɛ́ pì vĩro wɛ̃̀ndii pì vĩro.
Wɛ̃̀ndi kũ àdi lákaro
13 Matɛn yã birenↄ oárɛ, ákↄ̃nↄ kũ átɛn Luda Nɛ́ náani kɛnↄ, de àgↄ̃ dↄ̃ kũ á wɛ̃̀ndi kũ àdi lákaro vĩ. 14 Pↄ́ kũ à tò ó swɛ̃̀ɛ dìgↄ̃ ditɛna Luda arɛn dí: Tó o pↄ́ wɛ́ kɛ̀a lákũ à pↄ yei nà, àdi sí kũoo. 15 Lákũ ó dↄ̃ kũ àdi ó wɛ́kɛ ma nà, ó dↄ̃ kũ pↄ́ kũ o wɛ́ kɛ̀aa pì o gĩnakɛ o lè kↄ̀.
16 Tó gbɛ̃ a Yesude dake è, àtɛn durunna kũ àdi ń kakatɛro kɛ, à wɛ́ kɛ de Luda a gba wɛ̃̀ndii. Durunna kũ àdi ń kakatɛron má tɛ́a. Durunna kũ àdi ń kakatɛ kun, adi kɛ abirekũn ma pì à wɛ́ kɛ a musuro. 17 Yãvãnikɛna sĩnda pínki bi durunnamɛ, ama durunna kũ àdi ń kakatɛro kun.
18 Ó dↄ̃ kũ gbɛ̃ kũ Luda a ì dìgↄ̃ kpɛ́ àgↄ̃ durunna kɛro, zaakũ Luda Nɛ́ dì a dãkpã, Setan dì fↄ̃ à ↄ naaro. 19 Ó dↄ̃ kũ Luda gbɛ̃nↄn ó ũ, bee kũ andunia pínki kú Setan ↄĩmɛ. 20 Ó dↄ̃ kũ Luda Nɛ́ sù, akũ à ó wɛ́ kɛ̃̀, de ò le ò Yãpurade dↄ̃. Ó kú Yãpurade pìi gũn kũ a Nɛ́ Yesu Kirisio. Àkũmɛ Luda yãpurade pì ũ. Àkũmɛ wɛ̃̀ndi kũ àdi lákaro ũ.
21 Ma nɛ́ yenyĩdenↄ, à laakari kɛ tãnanↄi.