7
Gidiↄn kũ a gbɛ̃nↄ zĩ̀blena Midiãnↄa
1 Gidiↄn kũ gbɛ̃ kũ ò kú kãaonↄ fùtɛ kↄnkↄ káakukaaku ò gɛ̀ɛ ò bùraa kàtɛ Arodi ísɛ̃bokia. Midiãnↄ bùra kú guvutɛn gugbãnduru kpa Mↄre sĩ̀sĩgɛrɛɛi.
2 Akũ Dikiri pì Gidiↄnnɛ: Gbɛ̃ kũ ò kú kũnwonↄ kɛ̀ dasi, mani Midiãnↄ nańnɛ ń ↄĩro. Tó ma ń náńnɛ ń ↄĩ, oni ĩa dã ò pi ń zĩda gbãna mɛ́ à ń bó.
3 Ǹ kpàkpa kɛ gĩa ǹ pińnɛ, gbɛ̃ kũ swɛ̃̀ɛ kɛ̃̀agu àtɛn lukaluka, ade ɛra. Akũ gbɛ̃nↄn dúbu baro awɛɛpla ɛ̀ra, gbɛ̃nↄn dúbu kuri mɛ́ ò gↄ̃̀.
4 Akũ Dikiri pì Gidiↄnnɛ: Ò kpɛ́ dasi ari tera. Ǹ gɛ́ kũńwo í kĩnaa, mani ń plɛplɛnnɛ gwe. Gbɛ̃ kũ ma ònnɛ oni gɛ́ kũnwonↄ mɛ́ oni gɛ́, gbɛ̃ kũ ma ònnɛ oni gɛ́ kũnworonↄ sↄ̃ mɛ́ oni gↄ̃.
5 Kũ à gɛ̀ɛ kũńwo í kĩnaa, Dikiri pìnɛ: Ǹ gbɛ̃ kũ n è ò lɛ́ pɛ̀tɛ ía lán gbɛ̃ bànↄ sɛ́ kpado kũ gbɛ̃ kũ ò kùtɛ ń kosoa ò í dã̀ kũ ↄo òtɛn minↄ.
6 Gbɛ̃ kũ ò lɛ́ pɛ̀tɛ íanↄ gbɛ̃nↄn wàa do kpɛ́ basↄↄromɛ. Gbɛ̃ kparanↄ sↄ̃ ò kùtɛ ń kosoa ò í mì.
7 Akũ Dikiri pì Gidiↄnnɛ: Mani Midiãnↄ naárɛ á ↄĩ kũ gbɛ̃nↄn wàa do kpɛ́ basↄↄro kũ ò lɛ́ pɛ̀tɛ íanↄo sà mà á bo. Ǹ gbɛ̃ kparanↄ gbarɛ, ń baadi tá a bɛa.
8 Akũ Gidiↄn gbɛ̃nↄn wàa do kpɛ́ basↄↄro pìnↄ sɛ̀, ò gbɛ̃ kũ òtɛn tá bɛnↄ zànanↄ kũ ń kurunↄ sìḿma, akũ à ń gbárɛ.
Gidiↄn kú sĩ̀sĩi musu, Midiãnↄ bùra kú guvutɛn a gɛ̃i.
9 Gwãani birea Dikiri yã ònɛ à pì: Ǹ futɛ ǹ gɛ́ńyĩ ń bùran, zaakũ ma ń nánnɛ n ↄĩ.
10 Tó vĩna tɛni n kũ ǹ gɛ́ńyĩmɛ, ǹ kipa ǹ gɛ́ lɛɛlɛ kũ n zĩkɛri Purao
11 ǹ sã kpá yã kũ òtɛn oi. Yã pì ni n gba swɛ̃̀ de ǹ gɛ́ńyĩ ń bùran. Akũ à kìpa kũ a zĩkɛri Purao ò nà ń bùra lɛ́i.
12 Midiãnↄ kũ Amalɛkinↄ kũ ifãboki kpa gbɛ̃ pãndenↄn katɛna guvutɛn ń pínki, ò kpá lán sutɛ̃nↄ bà. Odi fↄ̃ ò ń lakuminↄ nàroro, ò dasi lán ísiralɛ bùsu'atɛ̃ bà.
13 Kũ Gidiↄn kà gwe, à gbɛ̃ke lè, àtɛni a nana baba a gbɛ̃ndonɛ à pì: Ǹ nana kũ ma ò ma. Ma è burodi bundurunna tɛn gbigiri kɛ, akũ à lɛ̀tɛ ó bùran à sì bizakutaa, akũ kuta pìi lɛ̀tɛ kpɛdangara à gↄ̃̀ katɛna.
14 Akũ a gbɛ̃ndo pìi pìnɛ: Yoasi nɛ́ Gidiↄn, Isaraila buri fɛ̃nɛdan n è gwe, adi kɛ pↄ́ pãndenlo. Luda Midiãnↄ kũ ó bùraao nànɛ a ↄĩ pínki.
15 Kũ Gidiↄn nana pì yã mà kũ a bↄkↄtɛnaao, à donyĩ kɛ̀ Dikirinɛ. Akũ à ɛ̀ra Isarailanↄ bùran à pì: À futɛ! Dikiri Midiãnↄ nàwɛrɛ ó ↄĩ.
16 À gbɛ̃nↄn wàa do kũ basↄↄroo pìnↄ kpàatɛ gã̀ aakↄ̃, akũ à kuru kũ lo korio kpà ń baadia. Akũ ò sɛ̃̀tɛ sↄ̀tↄsↄtↄ lo pìnↄ gũn.
17 À pìńnɛ: Matɛn gɛ́ ari ń bùra lɛ́a. Àgↄ̃ ma gwa. Lákũ a è ma kɛ̀ nà, à kɛ lɛ se.
18 À lika ń bùraai pínki. Tó makũ kũ gbɛ̃ kũ ò kú kũmaonↄ ó kuru pɛ̀, à á pↄ́ pɛ́ se à wiki lɛ́ à pi: Dikiri pↄ́mɛ kũ Gidiↄnwo.
19 Gidiↄn kũ gbɛ̃nↄn basↄↄro kũ ò kú kãaonↄ kà bùra lɛ́a lizãndo gudãkpãrinↄ kↄ̃ lilinkɛnaa gbɛra gↄ̃̀nↄ. Akũ ò ń kuru pɛ̀ ń pínki, ò lo kũ ò kũnanↄ wìwi.
20 Akũ gã̀ aakↄ̃ pìnↄ baadi a kuru pɛ̀ ò ń lonↄ wìwi. Ò sɛ̃̀tɛnↄ kũna ↄzɛn, ò kuru kũ òtɛn pɛ́nↄ kũna ↄplan. Akũ ò wiki lɛ̀ ò pì: Dikiri kũ Gidiↄnwo fɛ̃nɛdamɛ.
21 Baadi zɛ a gbɛ̀n likana bùraai, akũ bùradenↄ fùtɛ ò lɛ̀kↄ̃a kũ wikio ò bàa lɛ̀.
22 Kũ ò kuru mɛ̀n wàa do kũ basↄↄronↄ pɛ̀ lɛ, Dikiri tò bùraa pì denↄ kↄ̃ dɛ̀dɛ kↄ̃ tɛ̃nɛ kũ fɛ̃nɛdao. Zĩ̀karii pìnↄ bàa lɛ̀ ò tà Bɛtɛsita kũ Zererao ari Abɛli Mɛↄla lɛ́a Taba kpa.
23 Ò Nafatalinↄ kũ Asanↄ sìsi kũ Manasenↄ ń pínki, akũ ò pɛ̀tɛ Midiãnↄi.
24 Akũ Gidiↄn gbɛ̃nↄ zĩ̀ ò gɛ̀ɛ Ɛflaimunↄ gukpiden pínki, ò pìńnɛ: À kipa à gɛ́ Midiãnↄi. À zɛ́ zↄ̃ńnɛ Yoda bikũkinↄa ari Bɛtɛbara. Akũ ò Ɛflaimunↄ sìsi ń pínki ò gɛ̀ɛ ò zɛ́ zↄ̃̀ńnɛ Yoda bikũkinↄa ari Bɛtɛbara.
25 Akũ Ɛflaimunↄ Midiã kínanↄ kũ̀ gbɛ̃nↄn pla, Orɛbu kũ Zebuo. Ò Orɛbu dɛ̀ gbɛ̀ɛ sarɛ, kũ òdi pi tera Orɛbu gbɛ̀ɛ. Ò Zebu dɛ̀ dↄ, gu pìn òdi pi tera Zebu geepi'ifɛ̃ki. Akũ ò ɛ̀ra ò pɛ̀ Midiãnↄa. Akũ ò kína pìnↄ mìi zↄ̃̀zↄ̃ ò gɛ̀ɛo Gidiↄnnɛ Yoda bara dire.