5
Kpãkɛ̃na aruzɛkɛdenↄi
Ákↄ̃nↄ aruzɛkɛdenↄ, à yã ma sà. À ↄ́ↄ dↄ, à wiki lɛ́ kisira kũ ani á le yãi. Á aruzɛkɛnↄ yàka, kↄ̀kↄnↄ á pↄ́kasanↄ sòso. Á ↄgↄ dã̀a kpà, akũ a dã̀akpanaa pì ni á da yãn, ani á mɛ̀ piti lán tɛ́ bà. A aruzɛkɛ dì gↄrↄ kpɛde zĩ. À ma! A ↄgↄzĩkɛri kũ ò á burapↄnↄ kɛ̃̀árɛnↄ blè, akũ ↄgↄ pì yã Luda ki lè. Pↄ́kɛ̃rii pìnↄ wikilɛnaa gɛ̃̀ Dikiri Zĩ̀karide sãn. A á mɛ̀na mà zĩtɛ la á pↄyeinakɛnaa gũn. A mɛ̀ɛ kpà kùtukpana gↄrↄ pↄ́ ũ. A yã dà gbɛ̃ mananↄla, a ń dɛdɛ, odi gíárɛro.
Mɛna
Abire yãi ma gbɛ̃nↄ, àgↄ̃ mɛna fↄ̃ ari Dikiri sugↄrↄ. À gwa lán búbarii dì a burapↄ bɛ̀ɛrɛde kɛ̃gↄrↄ dã nà. Àdi mɛna fↄ̃ zaa kaburagↄrↄ ari sakare. Ákↄ̃nↄ sↄ̃, à mɛna fↄ̃ à zɛ gbãna, zaakũ Dikiri sugↄrↄ kà kãni. Ma gbɛ̃nↄ, àsun yãkete kákↄ̃iro, de Luda sún yãkpatɛ kɛ kãáoro yãi. Yãkpatɛkɛrii pì zɛna kpɛ́lɛlɛa fá! 10 Ma gbɛ̃nↄ, annabi kũ ò yã ò yã kũ Dikiri tↄ́onↄ, à mɛna kũ ò kɛ̀ warikɛnaa gũn zɛ́ dí taka sɛ́. 11 Odì pi ò arubarika vĩ, kũ ò mɛna fↄ̃̀ yãimɛ. A Ayuba mɛnakɛna baaruu mà, a mà lákũ Dikiri kɛ̀nɛ nà kpɛkpɛ, zaakũ wɛ̃nda kũ sùruuo papana Dikiria.
12 Atɛ̃nsa ma gbɛ̃nↄ, àsun la daro. Àsun pi a sì kũ ludambɛo ke kũ zĩtɛo kesↄ̃ kũ pↄ́ pãndeoro. À tó á ee gↄ̃ ee. À tó á oi gↄ̃ oi, de yã sún vutɛáwaro yãi.
Aduakɛna ludanaanikɛnaa gũn
13 Á gbɛ̃ke tɛn wari kɛ yá? À adua kɛ. Á gbɛ̃ke pↄ nna yá? À Luda sáabu kpá. 14 Á gbɛ̃ke tɛn gyã kɛ yá? Ade sↄsi gbɛ̃ zↄ̃kↄ̃nↄ sísi ò adua kɛnɛ, ò nísi máa kũ Dikiri tↄ́o. 15 Adua kũ ò kɛ̀ ludanaanikɛnaa gũn ni gyãre pì werekↄ̃a. Dikiri ni a futɛ. Tó à durunna kɛ̀ yã sↄ̃, ani kɛ̃a. 16 Abire yãi à á durunnanↄ okↄ̃nɛ, à adua kɛkↄ̃nɛ de à le àgↄ̃ aafia. Gbɛ̃ mana aduakɛna gbãna, àdi zĩ kɛ manamana. 17 Iliasu bi bisãsirimɛ lán ó bà. À adua kɛ̀ manamana, de legũ sún maro, akũ legũ dí tↄ́ zĩtɛaro ari wɛ̃̀ aakↄ̃ kũ mↄ suddoo. 18 À ɛ̀ra à adua kɛ̀ dↄ, akũ legũ'i bò manamana, zĩtɛ pↄ́ble kɛ̀.
19 Ma gbɛ̃nↄ, tó á gbɛ̃ mɛ̀n do zã̀ yãpura zɛ́a, akũ á gbɛ̃ke ɛ̀ra à a dà zɛ́n, 20 àgↄ̃ dↄ̃ kũ gbɛ̃ kũ à tò durunnakɛrii pìi bò sãtɛna zɛ́n à ɛ̀ra à sù, à a sì gaamɛ, akũsↄ̃ à lá kù durunna dasinↄla.