11
Isirelibɑ bɑ Yinni Gusunɔn
ɑrukɑwɑni kusiɑ
1 Gɑri yiniwɑ Yinni Gusunɔ u Yeremi sɔ̃ɔwɑ. U nɛɛ,
2 ɑ nɛn ɑrukɑwɑnin gɑri nɔɔwɔ, kpɑ ɑ Yudɑbɑ kɑ Yerusɑlɛmugibu sɔ̃ ɑ nɛɛ,
3 nɛ, Yinni Gusunɔ, nɑ geruɑ nɑ nɛɛ, bɔ̃rurowɑ wi u yinɑ u nɛn ɑrukɑwɑni yenin gɑri nɔ,
4 ye nɑ rɑɑ kɑ bɛɛn bɑɑbɑbɑ bɔkuɑ sɑnɑm mɛ nɑ bu yɑrɑ Egibitin di mi bɑ rɑɑ nɔni sɔ̃ɔre too. Miyɑ nɑ bu sɔ̃ɔwɑ nɑ nɛɛ, bu nɛn gɑri swɑɑ dɑkio, kpɑ bu ko ye nɑ bu sɔ̃ɔwɑ. Sɑɑ ye sɔɔrɑ bɑ ko n sɑ̃ɑ nɛn tɔmbu, kpɑ nɑ n mɑɑ sɑ̃ɑ ben Yinni.
5 Nge mɛyɑ kon kɑ nɛn nɔɔ mwɛɛru yibiɑ te nɑ bɛɛn bɑɑbɑbɑ kuɑ nɑ nɛɛ, kon bu tem wɛ̃ mɛ̀ sɔɔ tim kɑ bom mu kokumɔ. Tem mɛyɑ i wɑɑmɔ gisɔ.
Mɑ Yeremi u Yinni Gusunɔ wisɑ u nɛɛ, ɑmi.
6 Yinni Gusunɔ u mɑɑ Yeremi sɔ̃ɔwɑ u nɛɛ, ɑ gɑri yini geruo Yudɑbɑn wusu kpuro sɔɔ kɑ Yerusɑlɛmun nukurun swɛɛ kpuro sɔɔ, ɑ nɛɛ, bu nɛn ɑrukɑwɑnin gɑri swɑɑ dɑkio kpɑ bu yi mɛm nɔɔwɑ.
7 Sɑɑ dɔmɑ tèn di nɑ ben bɑɑbɑbɑ yɑrɑmɑ Egibitin di sere kɑ gisɔ, nɑ rɑ n bu sɔ̃ɔmɔwɑ bu de bu mɑn mɛm nɔɔwɑ.
8 Adɑmɑ bɑ ǹ nɛn gɑri yi swɑɑ dɑki, bu sere yi mɛm nɔɔwɑ. Ben bɑɑwure u win tiin gɔ̃ru kĩru swĩiwɑ. Mɑ nɑ derɑ bɔ̃ri yìn gɑri yi wɑ̃ɑ ɑrukɑwɑni ye sɔɔ, yi bu di.
9 Yinni Gusunɔ u mɑɑ Yeremi sɔ̃ɔwɑ u nɛɛ, wee Yudɑbɑ kɑ Yerusɑlɛmugibu bɑ nɔɔ tiɑ kuɑ.
10 Bɑ wurɑ ben bɑɑbɑbɑn yirɑ sɔɔ, be, be bɑ yinɑ bu nɛn gɑri swɑɑ dɑki. Mɑ bɑ kɑ bũnu ɑrukɑwɑni bɔkuɑ bɑ nu sɑ̃ɑmɔ. Isirelibɑ kɑ Yudɑbɑ bɑ nɛn ɑrukɑwɑni ye kusiɑ ye nɑ kɑ ben bɑɑbɑbɑ bɔkuɑ.
11 Yen sɔ̃nɑ nɛ, Yinni Gusunɔ, kon de kɔ̃sɑ yu bu wɔri. Bɑ ǹ yɑriɔ kɔ̃sɑ yen min di. Bɑ koo mɑn nɔɔgiru sue ɑdɑmɑ nɑ ǹ bu swɑɑ dɑkimɔ.
12 Yudɑbɑ kɑ Yerusɑlɛmugibu bɑ koo dɑ bu bũnu soku ni bɑ yɑ̃kunu koosimɔ. Adɑmɑ bũu ni, nu ǹ bu fɑɑbɑ mɔ̀ wɑhɑlɑn sɑɑ sɔɔ.
13 Bɛɛ Yudɑbɑ, nge mɛ bɛɛn wusu su geeru nɛ, nge mɛyɑ bɛɛn bũnu nu geeru nɛ. Nge mɛ Yerusɑlɛmun swɛɛ yi geeru nɛ, nge mɛyɑ yen sɑ̃ɑ yenu nu geeru nɛ, mi i rɑ bũu wi bɑ mɔ̀ Bɑɑli sɑ̃.
14 Adɑmɑ wunɛ Yeremi, ɑ ku kɑnɑru ko tɔn ben sɔ̃. Domi bɑɑ bɑ̀ n mɑn sokɑ ben wɑhɑlɑn sɑɑ sɔɔ, nɑ ǹ bu wurɑrimɔ.
Isirelibɑ bɑ sɑ̃ɑ nge dɑ̃ɑ
te tɑ ǹ mɑɑ ɑrufɑɑni mɔ
15 Yinni Gusunɔ u mɑɑ nɛɛ,
bɛɛ nɛn tɔn be nɑ kĩ,
mbɑ i kɑsu nɛn sɑ̃ɑ yerɔ.
Domi murɑfitirɑ i rɑ n mɔ̀.
I tɑmɑɑ kon mɑɑ bɛɛn yɑ̃kunu mwɑ,
kpɑ i kun mɑɑ nɔni sɔ̃ɔre?
I tɑmɑɑ kon de i yɑri wɑhɑlɑn di?
16 Yellu i sɑ̃ɑ nge nɛn dɑ̃ɑ geeru,
te tɑ kpɑre tɑ mɑɑ bii geenu mɑrumɔ.
Adɑmɑ tɛ̃ kon dɑ̃ɑ te kɑ ten kɑ̃ɑsi kpuro dɔ̃ɔ mɛni subɑru sɔɔ.
17 Nɛ, Gusunɔ wɔllu kɑ tem Yinniwɑ nɑ rɑɑ bɛɛ girɑ nge dɑ̃ɑ. Nɛnɑ kon de kɔ̃sɑ yu bɛɛ deemɑ bɛɛ Isirelibɑ kɑ bɛɛ Yudɑbɑ, kɔ̃sɑ ye i kuɑ i kɑ nɛn mɔru seeyɑn sɔ̃. Domi i bũu wi bɑ mɔ̀ Bɑɑli yɑ̃kunu koosimɔ.
Yeremin yɛnugibu
bɑ nùn seesi
18 Yinni Gusunɔ u mɑn sɔ̃ɔsi ye nɛn tɔmbu bɑ mɑn bɔkuɑmmɛ. U mɑn ben sɑnu sɑnusu sɔ̃ɔsi.
19 Nɑ rɑɑ bu nɑɑnɛ sɑ̃ɑwɑ nge yɑ̃ɑ te bɑ kɑ dɔɔ bu go. Nɑ ǹ yɛ̃ kɔ̃sɑ bɑ mɑn bwisikusimɔ, bɑ mɔ̀, bu de bu dɑ̃ɑ te surɑ kɑ ten mɑrum. Bu tu wunɑ wɑsobun suunu sɔɔn di kpɑ bu ku mɑɑ ten yĩsiru nɔ.
20 Adɑmɑ wunɛ Gusunɔ, wɔllu kɑ tem Yinni,
ɑ sɑ̃ɑwɑ wi u rɑ siri dee dee.
Wunɑ ɑ tɔnun gɔ̃ru kɑ win bwisikunu yɛ̃.
Wunɑ nɑ nɛn weeweenu nɔmu sɔndiɑ.
Nɑ mɑrɑwɑ n wɑ mɔru ye kɑɑ bu kɔsiɑ.
21 Mɑ Yinni Gusunɔ u nɛɛ, wee ye u koo Anɑtɔtugibu kuɑ, be, be bɑ kɑsu bu nɛn wɑ̃ɑru wunɑ bɑ mɔ̀, n ku Gusunɔn gɑri gere kɑ win yĩsiru. Nɑ̀ n mɑɑ yinɑ, bɑ koo mɑn go.
22 Yen sɔ̃nɑ wi, Gusunɔ wɔllu kɑ tem Yinni u koo bu mɔru kɔsiɑ. Ben ɑluwɑɑsibɑ bɑ koo gbi tɑbu sɔɔ, kpɑ ben bii tɔn durɔbu kɑ tɔn kurɔbu bu gbi gɔ̃ɔrun sɔ̃.
23 Domi u koo Anɑtɔtugibu nɔni swɑ̃ɑru kpɛ̃ɛwɑ wɔ̃ɔ gè sɔɔ u koo bu mɔru kɔsiɑ kpɑ goo kun tiɑre be sɔɔ.