14
Nim gɔ̃ɔ bɑkɑru
1 Sɑnɑm mɛ nim gɔ̃ɔrɑ wɑ̃ɑ, Yinni Gusunɔ u Yeremi sɔ̃ɔwɑ u nɛɛ,
2 Yudɑbɑ bɑ gɔɔ wooru sɔ̃.
Goo mɑɑ sɑri ben wuu mɑrosun kɔnnɔsɔ.
Wee bɑ wɔrukɑ temɔ bɑ nuki sɑnkire.
Mɑ Yerusɑlɛmugibu bɑ nɔɔgiru sue bɑ fɑɑbɑ kɑnɑmɔ.
3 Dɑmgibu bɑ bwɛ̃ɛbwɛ̃ɛbu gɔrimɔ bu nim kɑsumɑ.
Adɑmɑ bɑ̀ n dɔkɔ dɑ bɑ ku rɑ nim wɑ.
Bɑ rɑ gɔsirɑmɛwɑ kɑ koto gbebusu,
kpɑ seku bɑkɑru tɑ n bu mɔ̀, bɑ n wuswɑɑ gɑ̃ɑnu wukiri.
4 Tem mu bɛsikirɑ yèn sɔ̃ gurɑ kun nɛmɔ.
Mɑ sekurɑ gbee wukobu mɔ̀ bɑ wuswɑɑ gɑ̃ɑnu wukiri.
5 Yɑkɑ bekusu sɑri.
Bɑtumɑ sɔɔrɑ nɛnnu rɑ mɑ
kpɑ nu doonɑ nu binu deri.
6 Wee gbeeku kɛtɛkunu nu wɑ̃ɑ guunu wɔllɔ,
nu wom gɑbirimɔ nge gbeeku bɔ̃nu.
Nin nɔni tondɑ yèn sɔ̃ yɑkɑsu sɑri.
7 Yudɑbɑ bɑ gerumɔ bɑ mɔ̀,
bɑɑ mɛ sɑ tɑɑrɛ mɔ bɛsɛn durum sɔ̃,
Yinni Gusunɔ, ɑ sun somiɔ wunɛn yĩsirun bɛɛrɛn sɔ̃.
Wee sɑ kuɑ mɛm nɔɔ sɑribɑ, mɑ sɑ nun torɑri.
8 Wunɛ wi bɛsɛ Isirelibɑ sɑ nɑɑnɛ sɑ̃ɑ,
wunɑ ɑ rɑ sun fɑɑbɑ ko wɑhɑlɑn sɑɑ sɔɔ.
Mbɑn sɔ̃nɑ kɑɑ n sɑ̃ɑ nge sɔɔ wi u sɑrɔ bɛsɛn temɔ
u kpunɑ wɔ̃ku teeru tɔnɑ.
9 Mbɑn sɔ̃nɑ kɑɑ n sɑ̃ɑ nge wi bɑ wɔri subɑru sɔɔ,
ǹ kun mɛ nge tɑbu durɔ wi u kpɑnɑ u sun fɑɑbɑ ko,
ɑ sere wɑ̃ɑ bɛsɛn suunu sɔɔ.
Yinni Gusunɔ, mɑ sɑ wunɛn yĩsiru sɔɔwɑ,
ɑ ku sun deri.
10 Wee ye Yinni Gusunɔ u geruɑ win tɔmbun sɔ̃. U nɛɛ, bɑ rɑ kɑ̃ bɑ n yɑɑyɑɑre mɔ̀. Bɑ ku rɑ kpĩ bu sinɑ bu tii nɛnɛ. Bɑ ǹ mɑɑ nùn wɛ̃remɔ. U ben durum yɑɑye. Yen sɔ̃nɑ u bu sɛɛyɑsiɑmɔ.
11 Mɑ Yinni Gusunɔ u Yeremi sɔ̃ɔwɑ u nɛɛ, ɑ ku tɔn be kɑnɑru kuɑ n kɑ bu geɑ kuɑ.
12 Domi bɑɑ bɑ̀ n nɔɔ bɔkuɑ, nɑ ǹ ben kɑnɑru nɔɔmɔ. Bɑ̀ n mɑɑ yɑ̃ku dɔ̃ɔ mwɑɑrɑruginu kɑ kɛ̃nu gɑnu kuɑ, nɑ ǹ nu mwɑɑmɔ. Kon de bu gbiwɑ gɔ̃ɔrun sɔ̃ kɑ kɛ̃si kɛ̃si bɑrɑrun sɔ̃ kɑ mɑɑ tɑbu sɔɔ.
13 Mɑ Yeremi u wisɑ u nɛɛ, Yinni Gusunɔ, wee wunɛn sɔmɔbu bɑ wunɛn tɔmbu sɔ̃ɔmɔ bɑ mɔ̀, bɑ ǹ tɑbu wɑsi. Gɔ̃ɔrɑ kun mɑɑ duɔ ben temɔ. Kɑɑ de bɑ n wɑ̃ɑwɑ bɔri yɛndu sɔɔ kɑ toro sindu.
14 Yinni Gusunɔ u mɑɑ nùn sɔ̃ɔwɑ u nɛɛ, weesɑ bɑ gerumɔ kɑ nɛn yĩsiru. Nɑ ǹ bu gɔre, nɑ ǹ bu woodɑ gɑɑ wɛ̃. Mɛyɑ nɑ ǹ mɑɑ bu gɑri gɛɛ sɔ̃ɔwɑ. Kɑ̃sinu kɑ siɑn gɑri kɑ ben gɔ̃rusun gɑri yi bɑ gerumɔ, ye kpuro weesɑ.
15 Yen sɔ̃, sɔmɔ be nɑ ǹ gɔre mi, bɑ kɑ tɔmbu sɔ̃ɔmɔ bɑ mɔ̀, bɑ ǹ tɑbu wɑsi ben temɔ, gɔ̃ɔrɑ kun duɔ mi, kon de bu gbi tɑbu sɔɔ, kɑ gɔ̃ɔrun sɔ̃.
16 Kpɑ tɔn be bɑ mɑɑ weesun gɑri sɔɔmɔ mi, bɑ n wɔrukɑ Yerusɑlɛmun swɛɛ sɔɔ gɔ̃ɔ te, kɑ tɑɑ bin sɔ̃. Bɑ ǹ goo wɑsi wi u koo bu sike, be kɑ ben kurɔbu kɑ bibu. Kon de ben nuku kɔ̃suru tu wɔriwɑ ben tii sɔɔ.
17 Yeremi u nɛɛ, Gusunɔ u mɑn sɔ̃ɔwɑ n tɔn be sɔ̃ n nɛɛ,
nɛn nɔni yĩresu su kokumɔ bururu kɑ yokɑ,
su ǹ yɔ̃re.
Domi wɑhɑlɑ bɑkɑ yɑ nɛn tɔmbu deemɑ.
Bɑ bu so bɑ mɛɛrɑ kuɑ.
18 Nɑ̀ n yɑrɑ nɑ dɑ yɑkɑsɔ,
nɑ rɑ tɔn be bɑ go tɑbu sɔɔn gonu wɑwɑ nu kpĩ.
Nɑ̀ n mɑɑ wurɑmɑ wuuɔ,
kpɑ n deemɑ tɔmbɑ bɑrɔ gɔ̃ɔrun sɑɑbu.
Gusunɔn sɔmɔbu kɑ yɑ̃ku kowobu
bɑ rɑ n den sirenɛwɑ tem mɛ sɔɔ.
Bɑ ǹ yɛ̃ ye bɑ mɔ̀.
Isirelibɑ bɑ Yinni Gusunɔ
suuru kɑnɑmɔ
19 Yinni Gusunɔ,
ɑ bɛsɛ Yudɑbɑ biru kisiwɑ mɑm mɑm?
A sun bwɛ̃rɑ yɑrɑwɑ?
Mbɑn sɔ̃nɑ ɑ sun sɛɛyɑsiɑmɔ ɑ mɛɛrɑ mɔ̀
ye yɑ ǹ bɛkurɑmɔ.
Sɑ bɔri yɛndu mɑrɑ, ɑdɑmɑ sɑ ǹ tu wɑ.
Sɑ mɑrɑ ɑ sun bɛkiɑ, ɑdɑmɑ nɔni swɑ̃ɑru sɔɔrɑ sɑ wɑ̃ɑ.
20 Yinni Gusunɔ, sɑ durum kuɑ wunɛn mi.
Sɑ tubɑ mɑ nuku kɔ̃surɑ sɑ kuɑ, bɛsɛ kɑ bɛsɛn bɑɑbɑbɑ.
21 A wunɛn ɑrukɑwɑni yɑɑyo ye ɑ kɑ sun bɔkuɑ.
Wunɛn yĩsirun sɔ̃, ɑ ku sun gɛm.
A ku mɑɑ Yerusɑlɛmu funɛ wĩɑ
mi ɑ wunɛn sinɑ gɔnɑ yiikogiɑ yii.
22 Bũu goo sɑri wi u koo kpĩ u gurɑ nɛɛsiɑ,
wɔllun tii, tɑ ǹ kpɛ̃ tu gurɑ nɛɛsiɑ.
Gusunɔ bɛsɛn Yinni, wunɑ ɑ rɑ de gurɑ yu nɛ.
Wunɑ sɑ mɑɑ nɑɑnɛ sɑ̃ɑ. Domi wunɑ ɑ rɑ ye kpuro ko.