28
Yeremi
kɑ Gusunɔn sɔmɔ Hɑnɑniɑ
1 Sedesiɑsin bɑndun wɔ̃ɔ nnɛse te sɔɔ, yen suru nɔɔbuse sɔɔ, Hɑnɑniɑ, Asurin bii, wi u sɑ̃ɑ Gusunɔn sɔmɔ Gɑbɑoniɔ, u kɑ Yeremi gɑri kuɑ yɑ̃ku kowobu kɑ tɔmbu kpuron wuswɑɑɔ, Yinni Gusunɔn sɑ̃ɑ yerɔ.
2 U nɛɛ, ɑmɛniwɑ Gusunɔ, Isirelibɑn Yinni wi u wɔllu kɑ tem mɔ u geruɑ. U nɛɛ, u koo wigibu yɑrɑ Bɑbilonigibun yorun di, te tɑ sɑ̃ɑ nge sugu ben wĩinɔ.
3 N kɑ ko wɔ̃ɔ yiru u koo de Nɛbukɑnɛsɑɑ u kɑ wi, Yinni Gusunɔn sɑ̃ɑ yerun dendi yɑ̃ɑ ni wurɑmɑ, ni u rɑɑ gurɑ u kɑ dɑ Bɑbiloniɔ.
4 U koo mɑɑ de Yoyɑkini, Yoyɑkimun bii, Yudɑbɑn sinɑ boko u wurɑmɑ, kɑ sere Yudɑbɑn tɔn be bɑ kɑ dɑ Bɑbiloniɔ. Domi u koo bu yɑrɑ Bɑbilonin yorun di.
5 Yerɑ Yeremi u Gusunɔn sɔmɔ Hɑnɑniɑ wisɑ yɑ̃ku kowobu kɑ tɔn be bɑ wɑ̃ɑ Yinni Gusunɔn sɑ̃ɑ yeru mi kpuron wuswɑɑɔ,
6 u nɛɛ, ɑmi. Gusunɔ u de yu koorɑ nge mɛ ɑ geruɑ. Kpɑ u de tɔn be kpuro bu wurɑmɑ Bɑbilonin di kɑ Yinni Gusunɔn sɑ̃ɑ yerun dendi yɑ̃ɑ ni.
7 Adɑmɑ Hɑnɑniɑ, ɑ gɑri yini swɑɑ dɑkio ɑ nɔ, yi nɑ gerumɔ wunɛn wuswɑɑɔ kɑ tɔn ben wuswɑɑɔ.
8 Gusunɔn sɔmɔ be bɑ gbiɑ bɑ nɑ yellun di, sɑ sere nɑ, nɔni swɑ̃ɑru kɑ tɑbu kɑ bɑrɑnun gɑriyɑ bɑ bwese bɑkɑnu kɑ sinɑ bokobu sɔ̃ɔwɑ.
9 Tɛ̃ Gusunɔn sɔmɔ goo ù n seewɑ u bɔri yɛndun gɑri mɔ̀, ɑmɔnɑ tɔmbɑ koo kɑ tubu mɑ Gusunɔwɑ u yɛ̃ro gɔrimɑ, mɑ n kun mɔ ye u geruɑ mi, yɑ koorɑ.
10 Yerɑ Gusunɔn sɔmɔ Hɑnɑniɑ u Yeremi sugu ye wunɑ mɑ u ye bɔɔkɑ.
11 Mɑ u tɔmbu kpuro sɔ̃ɔwɑ u nɛɛ, ɑmɛniwɑ Yinni Gusunɔ u geruɑ. U nɛɛ, n kɑ ko wɔ̃ɔ yiru u koo Bɑbilonigibun dɑm mɛ buɑ nge mɛ nɑ sugu ye bɔɔkɑ.
Mɑ Yeremi u win swɑɑ mwɑ u n doonɔ.
12 Sɑnɑm mɛ Hɑnɑniɑ u sugu dɑ̃ɑ ye wunɑ Yeremin wĩirun di u bɔɔkɑ u kpɑ, yerɑ Yinni Gusunɔ u Yeremi sɔ̃ɔwɑ u nɛɛ,
13 ɑ doo ɑ Hɑnɑniɑ sɔ̃ ɑ nɛɛ, u kpĩɑ u sugu dɑ̃ɑgiɑ ye bɔɔkɑ, ɑdɑmɑ u koo yen kɔsire wɑ ye yɑ sɑ̃ɑ sisugiɑ.
14 Nɛ Gusunɔ, Isirelibɑn Yinni, nɛ wi nɑ wɔllu kɑ tem mɔ, nɑ nɛɛ, wee nɑ sugu sisugiɑ dokemɔ bwese ni kpuron wĩinɔ, kpɑ nu kɑ Nɛbukɑnɛsɑɑ, Bɑbilonin sinɑ boko yoru diiyɑ. Bɑɑ kɑ gbeeku yɛɛyɔ, kon nùn ye nɔmu bɛriɑwɑ.
15 Yerɑ Yeremi u Hɑnɑniɑ sɔ̃ɔwɑ u nɛɛ, ɑ swɑɑ dɑkio ɑ nɔ, Yinni Gusunɔ kun nun gɔre. Kɑ mɛ, ɑ dɑ ɑ tɔmbu gɑri weesugii sɔ̃ɔwɑ, mɑ bɑ yi nɑɑnɛ kuɑ.
16 Yen sɔ̃, tɛ̃, wee ye Yinni Gusunɔ u geruɑ. U nɛɛ, u koo nun wunɑ tem minin di, domi wunɛn gɑri yi derɑ tɔmbɑ nùn seesi. Kɑɑ gbi gisɔku ge.
17 Mɑ Gusunɔn sɔmɔ Hɑnɑniɑ wi, u gu wɔ̃ɔ gen suru nɔɔbɑ yiruse sɔɔ.