33
Nɔɔ mwɛɛ ni Yinni Gusunɔ
u kuɑ Yerusɑlɛmun sɔ̃
1 Yinni Gusunɔ u kpɑm kɑ Yeremi gɑri kuɑ sɑnɑm mɛ u wɑ̃ɑ pirisɔm sɔɔ.
2 U nɛɛ, nɛ wi nɑ rɑ n wɑ̃ɑ, nɛ wi nɑ tem tɑkɑ kuɑ mɑ nɑ mu nɛni, nɛnɑ nɑ nɛɛ,
3 ɑ mɑn sokuo, kon nun wurɑri. Kon nun gɑ̃ɑ bɑkɑ ɑsiriginu sɔ̃ɔsi ni ɑ ǹ yɛ̃.
4 Nɛ Gusunɔ, Isirelibɑn Yinni, nɑ gɑ̃ɑnu mɔ ni nɑ kĩ ɑ nɔ, Yerusɑlɛmun diɑ kɑ sere Yudɑbɑn sinɑ kpɑɑnun sɔ̃, ni Bɑbilonigibɑ wɔri bɑ sururɑ.
5 Mɑ be bɑ kɑ Bɑbilonigii be tɑbu kuɑ, ben gonu yibɑ wuu ge sɔɔ, nɛn mɔru bɑkɑn sɔ̃, domi Yerusɑlɛmugibu bɑ kɔ̃sɑ kuɑ sere nɑ ǹ mɑɑ kĩ n wuu ge wɑ.
6 Wee, sɑɑ gɑɑ sisi yè sɔɔ kon gu nɔɔri nge bɑrɔ. Kon gu bɛkiɑ n bwɑ̃ɑ dorɑsiɑ, kpɑ n de gen tɔmbu bɑ n wɑ̃ɑ bɔri yɛndu sɔɔ.
7 Kon de be bɑ yoru mwɛɛrɑ Yudɑn di, ben wɑ̃ɑru tu kɔsi, kpɑ n bu swĩi nge yellu.
8 Kon bu ben durum kpuro wɔkɑ ye bɑ mɑn koosi. Kon ben torɑ ni bɑ mɑn torɑri sɑnɑm mɛ bɑ mɑn seesi suuru kuɑ.
9 Sɑɑ ye sɔɔ, nɑ kon nuku dobu mɔ Yerusɑlɛmun sɔ̃, kpɑ yɑ n nɛn yĩsiru bɛɛrɛ wɛ̃ɛmɔ, kpɑ bwese tukunu nu n mɑn siɑrɑmɔ. Bwese ni, nù n wɑ durom bɑkɑm mɛ kon ye kuɑ kɑ doo nɔɔ te kon ye wɛ̃, nu koo biti ko sere nu diiri.
10 Yinni Gusunɔ u nɛɛ,
bɛɛ Yudɑbɑ, i nɛɛ, bɛɛn tem mu kuɑ bɑnsu. Tɔmbu kɑ yɛɛ mɑɑ sɑri mi. Mɑ Yerusɑlɛmu kɑ Yudɑbɑn wusun swɛɛ yi kuɑ swɛɛ gonu yi goo ku rɑ mɑɑ sĩ.
11 Adɑmɑ bɑ koo wure bu nuku dobun kuuki nɔ kɑ tɔ̃ɔ bɑkɑrugii. Bɑ koo kurɔ kpɑɑnun womusu nɔ. Bɑ koo mɑɑ wure bu womu geni nɔ, ge gɑ nɛɛ,
i Gusunɔ, wɔllu kɑ tem Yinni siɑro.
Domi u sɑ̃ɑ tɔn geo.
Win kĩru tɑ ǹ nɔru mɔ.
Mɛyɑ bɑ koo mɑɑ tɔn be bɑ kɑ yɑ̃kunu nɑ sɑ̃ɑ yerɔn womusu nɔ. Domi kon de tɔn be bɑ rɑɑ yoru mwɛɛrɑ mi, bu wurɑmɑ tem mɛ sɔɔ, kpɑ n bu wesiɑ nge yellu. Nɛ, Yinni Gusunɔwɑ nɑ yeni geruɑ.
12 Yinni Gusunɔ u mɑɑ Yeremi sɔ̃ɔwɑ u nɛɛ,
tem mɛ, mu rɑɑ kuɑ bɑnsu mi goo sɑri, yɑɑ sɑbenu sɑri mɛn wusu kpuro sɔɔ. Adɑmɑ tɛ̃, yɑ̃ɑ kpɑrobu bɑ koo wɑ̃ɑ yeru wɑ mi, kpɑ ben yɑɑ sɑbenu nu wɛ̃rɑ.
13 Yɑ̃ɑ kpɑrobu bɑ koo mɑɑ yɑ̃ɑnu kpɑrɑ bɑɑmɑ kpuro wuu si su wɑ̃ɑ guunun berɑ giɑ kɑ si su wɑ̃ɑ wɔwi sɔɔ, kɑ si su wɑ̃ɑ sɔ̃ɔ yɛ̃sɑn nɔm dwɑru giɑ, kɑ Bɛnyɑmɛɛn temɔ kɑ Yerusɑlɛmun bɑru kpɑɑnɔ kɑ Yudɑbɑn wusɔ. Nɛ, Yinni Gusunɔwɑ nɑ yeni geruɑ.
Gusunɔ
ku rɑ win nɔɔ mwɛɛru kɔbie
14 Yinni Gusunɔ u nɛɛ, tɔ̃rɑ sisi tè sɔɔ kon nɛn nɔɔ mwɛɛ gee ni yibiɑ ni nɑ Isirelibɑ kɑ Yudɑbɑ kuɑ.
15 Sɑɑ ye, yɑ̀ n tunumɑ, kon goo seeyɑ nge dɑ̃ɑ kpii pɔturɑ Dɑfidin bweseru sɔɔ u n sɑ̃ɑ gemgii, kpɑ u tɔmbu kpɑrɑ gem sɔɔ.
16 Yen tɔ̃ɔ te, Yuubɑ bɑ koo fɑɑbɑ wɑ kpɑ Yerusɑlɛmu yɑ n wɑ̃ɑ bɔri yɛndu sɔɔ, kpɑ bu ye yĩsiru kɛ̃, Yinni Gusunɔn miyɑ bɛsɛn gem wɑ̃ɑ.
17 Yinni Gusunɔ u mɑɑ nɛɛ, Dɑfidi sinɑ boko u ǹ goo biɑmɔ wi u koo sinɑ win bweserun sinɑ gɔnɑɔ Isireliɔ sere kɑ bɑɑdommɑɔ.
18 Mɛyɑ mɑɑ Lefibɑ be bɑ sɑ̃ɑ yɑ̃ku kowobu, bɑ ǹ kɔsire biɑmɔ ben bweseru sɔɔ bu kɑ mɑn yɑ̃ku dɔ̃ɔ mwɑɑrɑruginu kuɑ, kpɑ bu mɑn turɑre dɔ̃ɔ dokeɑ kpɑ bɑ n dɑ yɑ̃kunu ko tɔ̃ɔ bɑɑtere.
19 Yinni Gusunɔ u mɑɑ Yeremi sɔ̃ɔwɑ u nɛɛ,
20 nɛnɑ nɑ kɑ sɔ̃ɔ sɔɔ kɑ wɔ̃kuru ɑrukɑwɑni bɔkuɑ. Ì n ko i kpĩ i yen gɑɑ yɔ̃rɑsiɑ yu ku mɑɑ sɔmburu ko yen sɑɑ sɔɔ, kpɑ yu nɛn ɑrukɑwɑni ye kusiɑ,
21 sɑɑ yerɑ nɛn tii, kon mɑɑ nɛn ɑrukɑwɑni kusiɑ ye nɑ kɑ Dɑfidi nɛn sɔm kowo bɔkuɑ, kpɑ u kɔsire biɑ win bweseru sɔɔ wi u koo bɑndu di. Kon mɑɑ nɛn ɑrukɑwɑni kusiɑ ye nɑ kɑ yɑ̃ku kowobu Lefin bweseru bɔkuɑ be bɑ rɑ sɔmburu ko nɛn sɑ̃ɑ yerɔ.
22 Adɑmɑ n ǹ koorɔ mɛ. Kon Dɑfidin bweseru kɑ yɑ̃ku kowobun bweseru dɑbiɑsiɑwɑ nge kperi, ǹ kun mɛ nge yɑni sɛɛri yi yi wɑ̃ɑ dɑɑrun goorɔ yi bɑ ǹ kpɛ̃ bu gɑri.
23 Yinni Gusunɔ u mɑɑ Yeremi sɔ̃ɔwɑ u nɛɛ,
24 ɑ ǹ nɔɔmɔ ye tɔmbɑ gerumɔ? Bɑ mɔ̀, nɑ Isirelibɑn bweseru kɑ Yudɑbɑn bweseru ni nɑ gɔsɑ biru kisi. Yen sɔ̃nɑ bɑ bu gɛmɑ, bɑ ǹ bu gɑrisi bweseru.
25 Adɑmɑ wee ye nɑ gerumɔ, nɛ wi nɑ kɑ sɔ̃ɔ sɔɔ kɑ wɔ̃kuru ɑrukɑwɑni bɔkuɑ, mɑ nɑ wɔllu kɑ tem woodɑ yiiyɑ,
26 nɛnɑ kon Isirelibɑn bweseru kɑ Dɑfidi nɛn sɔm kowon bweseru biru kisi? Kpɑ nɑ kun win bweseru sɔɔ goo gɔsɑ u bɑndu di Aburɑhɑmu kɑ Isɑki kɑ Yɑkɔbun bweserun suunu sɔɔ?
Aɑwo. Kon ben wɔnwɔndu ko be bɑ yoru mwɛɛrɑ mi, kpɑ n de bu wurɑmɑ.