42
Yudɑbɑ bɑ Yeremi bikiɑ
u bu Gusunɔ kɑnɑ
1 Yerɑ tɑbu sinɑm be bɑ rɑɑ kpikiru suɑ, kɑ Yokɑnɑni, Kɑreɑn bii, kɑ Yesɑniɑ, Hoseen bii, kɑ tɔn be bɑ tie kpuro, sɑɑ wirugibun di sere kɑ bwɛ̃ɛbwɛ̃ɛbɔ, bɑ nɑ bɑ Yeremi sɔ̃ɔwɑ bɑ nɛɛ,
2 ɑ de ɑ nɔ ye sɑ nun bikiɑmɔ. A sun Gusunɔ kɑnɔ, bɛsɛ be sɑ tien sɔ̃, domi sɑ rɑɑ dɑbi, ɑdɑmɑ tɛ̃ sɑ kɑɑrɑ, nge mɛ ɑ wɑɑmɔ.
3 A Gusunɔ wunɛn Yinni kɑnɔ u sun sɔ̃ɔsi mi sɑ ko dɑ kɑ ye sɑ ko ko.
4 Mɑ Yeremi u bu wisɑ u nɛɛ, nɑ nuɑ. Kon Gusunɔ bɛsɛn Yinni kɑnɑ nge mɛ i mɑn bikiɑ kpɑ n wurɑmɑ n bɛɛ sɔ̃ ye u mɑn sɔ̃ɔwɑ. Nɑ ǹ bɛɛ gɑ̃ɑnu beruɑmmɛ.
5 Mɑ bɑ Yeremi wisɑ bɑ nɛɛ, sɑ wurɑ su ko mɑm mɑm ye Yinni Gusunɔ u koo nun sɔ̃ su ko. Wiyɑ u koo ko bɛsɛn seedɑ dio gemgii kɑ nɑɑnɛgii sɑ̀ kun bɛsɛn nɔɔ mwɛɛru yibie.
6 Wee bɛsɛrɑ sɑ nun gɔrɑ ɑ sun Gusunɔ bɛsɛn Yinni bikiɑ. Yen sɔ̃, sɑ ko ko ye u sun sɔ̃ɔwɑ su ko, bɑɑ yɑ̀ kun sun wɛ̃re. Kɑ mɛ, sɑ ko n nuku dobu mɔ yèn sɔ̃ sɑ nùn mɛm nɔɔwɑmmɛ.
Yinni Gusunɔ u Yeremi wisɑ
7 Sɔ̃ɔ wɔkurun biru, Yinni Gusunɔ u Yeremi wisɑ.
8 Mɑ Yeremi u Yokɑnɑni, Kɑreɑn bii sokusiɑ kɑ tɑbu sinɑm be bɑ nùn swĩi kɑ sere ben tɔmbu kpuro be bɑ wɑ̃ɑ mi, wirugibu kɑ bwɛ̃ɛbwɛ̃ɛbu.
9 Mɑ u bu sɔ̃ɔwɑ u nɛɛ, wee bɛɛyɑ i mɑn gɔrɑ n Gusunɔ bɛɛ Isirelibɑn Yinni bikiɑ. Ye u mɑn sɔ̃ɔwɑ wee. U nɛɛ,
10 ì n sinɑ tem mɛ sɔɔ,
u koo de bɛɛn tɔmbu bu tɑ̃si.
U ǹ mɑɑ bu goomɔ.
U koo bɛɛ swĩiwɑ i n nuuru mɔ.
U ǹ bɛɛ wukɑmɔ,
u ǹ mɑɑ derimɔ kɔ̃sɑ yu bɛɛ deemɑ
ye u rɑɑ bwisikɑ u bɛɛ kuɑ.
11 Ǹ n mɛn nɑ, i ku mɑɑ Bɑbilonin sinɑ bokon bɛrum ko.
Domi wi, Yinni Gusunɔ u ko n kɑ bɛɛ wɑ̃ɑ kpɑ u bɛɛ fɑɑbɑ ko.
12 Wi, Gusunɔ u koo de u bɛɛn wɔnwɔndu wɑ.
Kpɑ u de i wurɑmɑ bɛɛn temɔ.
13 Adɑmɑ ì n nɛɛ, i ǹ wi, Yinni Gusunɔ mɛm nɔɔwɑmmɛ, i ǹ sinɑmɔ tem mɛni sɔɔ,
14 i ko i dɑwɑ Egibitiɔ mi i ǹ tɑbu wɑsi, bɑɑ bin kɔbɑn swĩi i ǹ nɔɔmɔ, i ǹ mɑɑ dĩɑnu biɑmɔ, yen sɔ̃, miyɑ i ko sinɑ,
15 tɛ̃ i swɑɑ dɑkio ye Gusunɔ, bɛɛ Isirelibɑn Yinni wi u wɔllu kɑ tem mɔ, u gerumɔ. U nɛɛ,
bɛɛ Yudɑ be i tie, ì n gɔ̃ru doke i kɑ dɑ Egibitiɔ kɑ gem,
kpɑ i n wɑ̃ɑ mi,
16 sɑnɑm mɛyɑ tɑɑ bìn bɛrum i mɔ̀,
bu koo bɛɛ deemɑ Egibiti mi.
Gɔ̃ɔ tèn weeweenu i mɑɑ mɔ̀ mi,
tɑ koo bɛɛ deemɑ,
kpɑ i gbisuku mi giɑ.
17 Be bɑ gesi niɑ kuɑ
bu kɑ dɑ Egibitiɔ bu kuke,
bɑ koo gbiwɑ tɑbu sɔɔ,
kɑ gɔ̃ɔru sɔɔ, kɑ bɑrɑnu sɔɔ.
Ben goo kun kisirɑmɔ kɔ̃sɑ yen di
ye u koo bu suremɑ mi.
18 Yeremi u nɛɛ, wee ye Gusunɔ, Isirelibɑn Yinni wi u wɔllu kɑ tem mɔ u geruɑ. U nɛɛ, nge mɛ u Yerusɑlɛmugibu win mɔru seesi, nge mɛyɑ u koo mɑɑ bɛɛ ye seesi, ì n dɑ Egibitiɔ. Sɑɑ ye sɔɔrɑ bɑ ko n dɑ kɑ bɛɛn yĩsiru tɔmbu bɔ̃rusi, ǹ kun mɛ, bu kɑ goo gɑ̃ɑ kɔ̃sunu sie, kpɑ bu bɛɛ gɛm i seku bɑkɑru wɑ kpɑ i kun mɑɑ sinɛ tem mɛ sɔɔ.
19 U mɑɑ nɛɛ, i ku Egibiti dɑ, bɛɛ be i tie Yudɑbɑn bweseru sɔɔ. I de i n yɛ̃ mɑ u bɛɛ ye yinɑriwɑ gisɔ.
20 Sɑnɑm mɛ i mɑn gɔrɑ n bɛɛ Yinni Gusunɔ kɑnɑ, ye nɑ wurɑmɑ, i geruɑ i nɛɛ, n bɛɛ sɔ̃ɔwɔ mɑm mɑm ye Gusunɔ bɛɛn Yinni u mɑn sɔ̃ɔwɑ kpɑ i ye ko. Adɑmɑ weesɑ i tii kuɑ.
21 Domi gisɔ, nɑ kɑ win wisibu nɑ ɑdɑmɑ i ǹ bin gɑbu swɑɑ dɑki bi u nɛɛ, n bɛɛ sɔ̃.
22 Tɛ̃, mi i dɔɔ i sinɑ mi, i n yɛ̃ mɑ tɑbu sɔɔrɑ i ko i gbi, ǹ kun mɛ gɔ̃ɔru sɔɔ, ǹ kun mɛ bɑrɑnu sɔɔ.