50
Bɑbiloni yɑ kɑm kuɑ
1 Wee gɑri yi Yinni Gusunɔ u geruɑ Bɑbilonin sɔ̃ kɑ yen tem kpuron sɔ̃, sɑɑ Yeremin min di. U nɛɛ,
2 i bwesenu lɑbɑɑri yeni nɔɔsio.
I yĩrenu koowo nu kɑ ye giɑ.
I ye kpɑro i nɛɛ,
Bɑbiloni yɑ wɔrumɑ.
Yen bũnu nu sekuru suɑ.
Bũu ni bɑ mɔ̀ Bɛli kɑ Mɛrodɑki
nu wɑ̃ɑ sekuru sɔɔ.
Nin bwɑ̃ɑrokunu nu bɛrum soorɑ.
3 Bweseru gɑrɑ ye wɔrim wee
sɑɑ sɔ̃ɔ yɛ̃sɑn nɔm geu giɑn di.
Tɑ koo tem mɛ gɔsiɑwɑ bɑnsu.
Goo kun ko n mɑɑ wɑ̃ɑ mi.
Tɔmbu kɑ yɛɛ kpuro koo yɑrinɑ min di.
4 Yinni Gusunɔ u nɛɛ,
yen tɔ̃ɔ te, Isirelibɑ kɑ Yudɑbɑ bɑ koo wurɑmɑ ben temɔ sɑnnu,
bɑ n sumɔ, bɑ n nɛ Gusunɔ, ben Yinni kɑsu.
5 Bɑ koo Siɔnin swɑɑ bikiɑ,
bu wɔrimɑ yen mi,
kpɑ bu nɑ
bu kɑ mɑn ɑrukɑwɑni bɔke
ye bɑ ǹ duɑrimɔ sere kɑ bɑɑdommɑɔ.
6 Be, nɛn tɔmbu, wee bɑ sɑ̃ɑ nge yɑ̃ɑ gɔ̃ɔ
ge gɑ rɑɑ kɔ̃ɔre.
Ben kpɑrobɑ rɑɑ bu kɔ̃
bɑ derɑ bɑ sirenɛ guunu wɔllɔ
bɑ gɑsirimɔ gee kɑ giɔ,
sere bɑ ben wɑ̃ɑ yeru duɑri.
7 Yibɛrɛ be bɑ bu wɔri gesi,
bɑ rɑ bu gurewɑ.
Kpɑ yibɛrɛ be, bu nɛɛ,
bɑ ǹ kɔ̃sɑ kue.
Be, Isireli ben tiiwɑ bɑ Yinni Gusunɔ torɑri,
wi, wi u sɑ̃ɑ gemgii
kɑ wi ben sikɑdobɑ bɑ nɑɑnɛ sɑ̃ɑ.
8 Bɛɛ Isirelibɑ, i yɑrio i duki su Bɑbilonin di,
nge boo ni nu gɔ̃ɔ gbiiye.
9 Domi wee, kon bwesenu seeyɑ wuu wuukɑ
kpɑ n de nu Bɑbiloni wɔri.
Bɑ koo nɑwɑ sɑɑ sɔ̃ɔ yɛ̃sɑn nɔm geu giɑn di,
kpɑ bu ye tɑrusi bu mwɑ.
Ben sɛ̃ɛnu nu ǹ kɑm wɔrimɔ.
Bɑɑ ben tɑbu durɔ turo kun gɔsirɔ nɔm dirɑ.
10 Bɑbilonigibu bɑ ǹ kisirɑmɔ kɑm koo bin di.
Be bɑ koo ben yɑ̃nu gurɑ kpuro,
bɑ koo nu gurɑwɑ kɑ nuku tiɑ.
Nɛ, Yinni Gusunɔwɑ nɑ yeni geruɑ.
11 Bɛɛ Bɑbilonigibu, bɛɛ be i nɛn ɑrumɑni gurɑ,
i nuki doro.
I n yɔ̃ɔkumɔ nge nɑɑ kpɛmi yɑkɑsɔ.
I n sumɔ nge dum dwɛɛ.
12 Adɑmɑ i bɛɛn tem mɛɛrio.
Wee, mu wɑ̃ɑ sekuru sɔɔ.
Wee, mu kuɑ bɑnsu, nge tem mi gɑ̃ɑnu ku rɑ kpi.
Mɑ mu biru wurɑ tem kpuro sɔɔ.
13 Yinni Gusunɔn mɔrun sɑɑbu, mu kuɑ bɑnsu.
Be bɑ koo sɑrɑ Bɑbilonin tem mi, biti koo bu mwɑ
kpɑ bu wiɑ ko.
14 Bɛɛ be i rɑ tɛndu to,
i nɑ i Bɑbiloni tɑrusi.
I ye sɛ̃ɛnu tweeyo.
I ku yen wɔnwɔndu ko.
Domi yɑ nɛ, Yinni Gusunɔ torɑri.
15 I tɑbun kuuki koowo bɑɑmɑ
domi Bɑbilonin gɑni yi wɔrukɑ,
yen gbɑ̃rɑrɑ subɑ.
Wee yen tɔmbɑ nɔmɑ yiiye
bɑ tii yibɛrɛbɑ wɛ̃.
Nɛ, Yinni Gusunɔwɑ nɑ ye mɔru kɔsiemɔ,
nɑ mɔ̀, i ye mɔru kɔsieyo.
I ye kuo nge mɛ yɑ rɑɑ gɑbu kuɑ.
16 Tɑbu wee kɑ kɑm kobu sɑnnu.
I bu goowo be bɑ duurumɔ
kɑ be bɑ gɛ̃ɛmɔ.
Bɑɑwure u seewo u dɑ win temɔ mi win bweserɑ wɑ̃ɑ.
17 Yinni Gusunɔ u nɛɛ,
Isirelibɑ bɑ sɑ̃ɑwɑ nge yɑ̃ɑ ni nu kɔ̃ɔrɑ
mɑ gbee sinɑnsu su nu nɑɑ swĩi.
Asirin sinɑ bokowɑ u gbiɑ u nu wɔri u gurɑ, mɑ Bɑbilonin sinɑ boko u mɑɑ nɑ u nu wɔri u kɔsukɑ.
18 Yen sɔ̃nɑ, nɛ Gusunɔ Isirelibɑn Yinni, wi u wɔllu kɑ tem mɔ, nɑ nɛɛ, kon Bɑbilonin sinɑ boko kɑ win temgibu sɛɛyɑsiɑ nge mɛ nɑ Asirin sunɔ sɛɛyɑsiɑ.
19 Adɑmɑ kon de Isirelibɑ bu wurɑmɑ ben wɑ̃ɑ yerɔ,
kpɑ bu ben dĩɑnu yewe guu te bɑ mɔ̀ Kɑɑmɛliɔ
kɑ Bɑsɑniɔ kɑ guu te bɑ mɔ̀ Efɑrɑimuɔ,
kɑ sere mɑɑ Gɑlɑdin temɔ.
Bɑ ǹ mɑɑ gɑ̃ɑnun yɑ̃ɑru mɔ̀.
20 Yen domɑ te, bɑ koo Isirelibɑ kɑ Yudɑbɑn durum kɑsu bɑ kun wɑ,
domi be, be bɑ tie mi, kon bu ben durum wɔkɑ.
21 Yinni Gusunɔ u nɛɛ,
i Mɛrɑtɑimugibu kɑ Pekodigibu wɔrio.
I bu goowo i kɑm koosiɑ mɑm mɑm.
I nɛn woodɑbɑ kpuro yibio.
22 Wee, tɑbun wurenu nɔɔrɑmɔ tem mɛ kpuro sɔɔ.
Asɔrɔ bɑkɑ yɑ tunumɑ.
23 Bɑbiloni ye yɑ hɑnduniɑ kpuro kɔsukɑ, nge mɑtɑlɑkɑ,
yen tii wee, yɑ kɔsikirɑ,
yɑ kuɑ bɑnsu bwesenu kpuron suunu sɔɔ.
24 Bɑbiloni, nɑ nun yinɑ bɛriɑ,
mɑ yɑ nun mwɑ ɑ ǹ kɑ bɑɑru.
Wee, tɛ̃, ɑ kuɑ pirisɔm,
domi ɑ nɛ, Yinni Gusunɔ wɔri.
25 Mɑ nɑ nɛn tɑbu yɑ̃nun beru yeru wukiɑ.
Mɑ nɑ nɛn mɔru sɔ̃ɔsi kɑ tɑbu yɑ̃ɑ ni.
Domi nɛ Gusunɔ, wɔllu kɑ tem Yinni,
nɑ sɔmburu mɔ te kon ko Bɑbiloniɔ.
26 Bɛɛ hɑnduniɑgibu kpuro,
i nɑ i Bɑbilonigibun birɑnu suriri,
kpɑ i ben yɑ̃nu gurɑ i subu subu nge yɑkɑsu,
i ye kɑm koosiɑ.
Gɑ̃ɑnu nu ku mɑɑ tiɑrɑ mi.
27 I ben tɑbu durɔ dɑmgibu goowo.
I bu sɑkirio nge yɑɑ sɑbenu.
Bɑ kɑm kuɑ, domi ben tɔ̃rɑ tunumɑ,
tè sɔɔ bɑ koo bu sɛɛyɑsiɑ.
28 Yerɑ Isirelibɑ be bɑ kpikiru suumɑ
bɑ nɑ Yerusɑlɛmuɔ bɑ mɔ̀,
Yerusɑlɛmu, Yinni Gusunɔ u nun mɔru kɔsiɑ.
U win sɑ̃ɑ yee dɛɛrɑru mɔru kɔsiɑ.
29 I tɛn towobu mɛnnɔ bu Bɑbiloni wɔri,
kpɑ bu ben sɑnsɑni girɑ bu kɑ ye sikerenɑ,
kpɑ bu ku rɑɑ de goo u kisirɑ min di.
Bu bu kɔsieyo nge mɛ ben dɑɑ yɑ nɛ.
Bu bu kuo nge mɛ bɑ rɑɑ gɑbu kuɑ.
Domi bɑ tii wɔlle suɑ nɛ, Yinni Gusunɔn wuswɑɑɔ,
nɛ wi nɑ sɑ̃ɑ Isirelibɑn Yinni Dɛɛro.
30 Yen sɔ̃, mi ben ɑluwɑɑsibɑ bɑ wɑ̃ɑ kpuro, bɑ koo gbisukuwɑ, kpɑ ben tɑbu kowobun tii bu gbisuku tɔ̃ɔ te.
31 Nɛ, Gusunɔ, wɔllu kɑ tem Yinni, nɑ nɛɛ,
wunɛ Bɑbiloni, wunɛ wi ɑ tii sue,
nɑ kɑ nun mɔru sɑ̃ɑ.
Wunɛn tɔ̃rɑ tunumɑ tè sɔɔ kon nun sɛɛyɑsiɑ.
32 Wunɛ wi ɑ tii sue mi, kɑɑ fukurɑ ɑ wɔrumɑ.
Goo sɑri wi u koo nun seeyɑ.
Kon wuu si su kɑ nun sikerenɛ dɔ̃ɔ doke
kpɑ u sin tem kpuro di.
33 Nɛ, Gusunɔ, Isirelibɑn Yinni, nɛ wi nɑ wɔllu kɑ tem mɔ, nɑ mɑɑ nɛɛ,
wee bɑ Isirelibɑ kɑ Yudɑbɑ dɑm dɔre
bɑ bu yoru nɛnusi,
mɑ bɑ yinɑmɔ bu bu yɔ̃su.
34 Adɑmɑ nɛ, ben yɑkio, nɑ dɑm mɔ.
Nɛn yĩsirɑ Gusunɔ, wɔllu kɑ tem Yinni.
Kon kɑ bu yinɑ kpɑ n ben tem bɔri yɛndu wɛ̃,
kpɑ n Bɑbilonigibu burisinɑ.
Himbɑ ye Yinni Gusunɔ u yi
Bɑbilonin sɔ̃
35 Yinni Gusunɔ u mɑɑ nɛɛ,
i Bɑbilonigibu tɑbu wɔrio
kɑ sere ben wuu bɔkɔ gen tɔmbu
kɑ ben sinɑ ɑsɑkpɔbu kɑ ben bwisigibu.
36 I ben sɔmɔ tii suo be tɑbu wɔrio
kpɑ bu gɔsirɑ wiirobu.
I ben tɑbu durɔ dɑmgibu wɔrio
kpɑ bu nɑndɑ.
37 I ben dumi kɑ ben tɑbu kɛkɛ yi dumi gɑwe tɑbu wɔrio.
I tɔn be bɑ kɑnɑ bɑ bu somimɔ tɑbu sɔɔ, tɑbu wɔrio,
kpɑ bu bɛrum soorɑ nge tɔn kurɔbu.
I ben dukiɑ wɔrio i gurɑ.
38 Ben dɑɑnun nim mu gbero.
Domi tem mi, bũnɑ bɑ rɑ sɑ̃,
mɑ nu derɑ bɑ wiru bie.
39 Yen sɔ̃nɑ kon de Bɑbiloni yu ko bɑnsu sere kɑ bɑɑdommɑɔ,
kpɑ purukɑnu kɑ tɑɑtɑɑnu nu nɑ nu n wɑ̃ɑ mi.
40 Kon Bɑbiloni ye kɔsukuwɑ nge Sodomu kɑ Gomɔrɑ
kɑ sin wuu si nɛ, Yinni Gusunɔ nɑ kɑm koosiɑ.
Goo kun mɑɑ sinɑmɔ mi.
Nɛ, Yinni Gusunɔwɑ nɑ yeni geruɑ.
41 Wee, bweseru gɑrɑ wee sɑɑ sɔ̃ɔ yɛ̃sɑn nɔm geu giɑn di.
Bwese te, tɑ kpɑ̃.
Ten sinɑmbu bɑ dɑm mɔ.
Be wee, bɑ swɑɑ mɔ̀ bɑ wee sɑɑ tontonden di.
42 Ben tɑbu kowobu bɑ tɑkobi kɑ tɛmɑ nɛni.
Bɑ ǹ wɔnwɔndu mɔ, bɑ bɔɔbu.
Bɑ wɔki nge nim wɔ̃kun nim.
Bɑ dumi yɔɔwɑ bɑ swĩinɛ swɛɛ swɛɛ.
Bɑ tɑbun sɔɔru sɑ̃ɑ bu kɑ Bɑbilonigibu wɔri.
43 Ye Bɑbilonin sinɑ boko u lɑbɑɑri ye nuɑ,
yerɑ win gɔmɑ dwiiyɑ.
Bɛrum kɑ wuriribu nùn mwɑ
nge tɔn kurɔ wi u yiire u kĩ u mɑ.
44 Nɛ, Yinni Gusunɔ, kon wuu gbɑ̃rɑruguu wɔri
nge gbee sunɔ ge gɑ yɑrimɑ
sɑɑ Yuudɛnin gbee surorun di,
kpɑ n gen tɔmbu kpuro yɑrinɑsiɑ subɑru sɔɔ.
Sɑɑ ye sɔɔ, kon bu sunɔ kpɑo wɛ̃
wi nɛn tii nɑ gɔsɑ.
Nge wɑrɑ u kɑ mɑn nɛ.
Wɑrɑ u koo kpĩ u mɑn woodɑ wɛ̃.
Sinɑ boko wɑrɑ u koo kpĩ u yɔ̃rɑ nɛn wuswɑɑɔ.
45 Yen sɔ̃, i swɑɑ dɑkio i nɔ himbɑ ye nɑ yi
Bɑbiloni kɑ yen tɔmbun sɔ̃.
Nɑ nɛɛ, kɑm kɑm kon de bu be kpuro gurɑ
nge yɑ̃ɑnu bu kɑ dɑ tem tukumɔ.
Bɑ koo ben wɑ̃ɑ yeru kpuro kɑm koosiɑwɑ.
46 Bɑbilonin kɑm koo bin wurenu sɔɔ,
tem mu koo yĩiri,
kpɑ wɔki bɑkɑnu nu se sɑɑ hɑnduniɑn bɑɑmɑ kpuron di.