8
1 Yinni Gusunɔ u nɛɛ, yen tɔ̃ɔ te, bɑ koo Yudɑbɑn sinɑmbu kɑ ben ɑsɑkpɔbun kukunu sikiɑ sikirun di kɑ ben yɑ̃ku kowobuginu kɑ ben sɔmɔbuginu kɑ sere mɑɑ Yerusɑlɛmun tɔmbuginu.
2 Sɔ̃ɔ sɔɔ, nu ko n sɔ̃ɔ soore. Wɔ̃kuru kpɑ nu n wɑ̃ɑ suru kɑ kperin tɑrum sɔɔ. Bɑ ǹ mɑɑ nu gurɑmɔ bu sike. Nu koo kowɑ tɑɑki tem sɔɔ. Domi sɔ̃ɔ kɑ suru kɑ kperi yiyɑ bɑ rɑɑ kĩɑ mɑ bɑ yiirɑ bɑ yi sɑ̃wɑ.
3 Be bɑ koo tiɑrɑ be, Yudɑ dɑɑ kɔ̃sɑgii be sɔɔ, mi nɑ bu yɑrinɑsiɑ kpuro, gɔɔwɑ bɑ ko n kĩ n kere wɑ̃ɑru. Nɛ, Yinni Gusunɔwɑ nɑ yeni geruɑ.
Yudɑbɑn bwisikunu
kun ɑsɑnsi mɔ
4 Yinni Gusunɔ u Yeremi sɔ̃ɔwɑ u nɛɛ, ɑ nɛn tɔmbu bikio ɑ nɛɛ,
tɔnu ù n wɔrumɑ, u ku rɑ se?
Goo ù n gɛrɑ win swɑɑn di, u ku rɑ wurɑmɛ?
5 Ǹ n mɛn nɑ, mbɑn sɔ̃nɑ nɛn tɔmbu Yudɑbɑ
bɑ swɑɑ kɔ̃sɑ swĩi bɑ dɔɔ.
Bɑ yɔ̃rɑriwɑ dim dim ben weesu sɔɔ
bɑ n bũnu sɑ̃ɑmɔ.
Bɑ ǹ kĩ bu gɔsirɑmɑ nɛn mi.
6 Nɑ yɔ̃ sɛ̃ɛ nɑ bu swɑɑ dɑki kɑ lɑɑkɑri.
Bɑ gɑri gerumɔ yi yi ǹ ɑsɑnsi gɑɑ mɔ.
Ben goo kun gɔ̃ru gɔsiɑmɔ win nuku kɔ̃surun di,
u nɛɛ, mbɑn sɔ̃nɑ u yeni mɔ̀.
Be kpuro bɑ ben tiin swɑɑ swĩiwɑ
nge dumɑ ye yɑ wɑ̃ɑ tɑbu sɔɔ.
7 Bɑɑ tionko kɑ kpurɑbu kɑ kpɑɑru bɑniku
nu yɛ̃ sɑɑ ye n weenɛ nu sĩ
kɑ sɑɑ ye n weenɛ nu wurɑmɑ nin wɑ̃ɑ yerɔ.
Adɑmɑ nɛn tɔmbu bɑ ǹ nɛn woodɑ yɛ̃
ye nɑ kɑ bu kpɑre.
Be bɑ tii gɑrisi bwisigibu
8 Yinni Gusunɔ u mɑɑ nɛɛ,
ɑmɔnɑ bɑ koo kɑ kpĩ bu nɛɛ bɑ bwisi mɔ.
Beyɑ bɑ nɛ Gusunɔn woodɑ mɔ.
Domi be bɑ woodɑ ye yoruɑ, bɑ ye gɔsiɑwɑ.
9 Wee bwisigibɑ nɛ, Yinni Gusunɔn gɑri gɛmɑ.
Mɑ bɑ yibɛrɛbɑn yinɑ mwɑɑrɑ
bɑ wɑ̃ɑ biti kɑ sekuru sɔɔ.
Ǹ n mɛn nɑ, bwisi yirɑ̀ bɑ mɑɑ mɔ.
10 Yen sɔ̃nɑ nɛ, Yinni Gusunɔ,
kon de yibɛrɛbɑ bu ben kurɔbu kɑ ben gbeɑ mwɛɛri.
Domi sɑɑ ben bwɛ̃ɛbwɛ̃ɛbun di
n kɑ girɑri ben dɑmgibɔ,
ben tii tiin ɑrufɑɑniwɑ bɑ rɑ n nɑɑ gire kɑ tɑki.
Nɛn sɔmɔbu kɑ yɑ̃ku kowobu, weesɑ bɑ rɑ n mɔ̀.
11 Bɑ rɑ n nɛn tɔmbun wɑhɑlɑ ɑtɑfiiru sɑ̃ɑwɑ,
bɑ n mɔ̀, ɑlɑfiɑ wɑ̃ɑ,
ɑdɑmɑ ɑlɑfiɑ gɑɑ sɑri.
12 N weenɛwɑ sekuru tu bu mwɑ kɔ̃sɑ ye bɑ mɔ̀n sɔ̃.
Adɑmɑ sekurɑ ku rɑ bu mwɛ bu tukɑ.
Bɑ ku rɑ mɑɑ ben torɑnu tubu.
Yen sɔ̃nɑ bɑ koo wɔrumɑ bu gbi
dɔmɑ te kon bu sɛɛyɑsiɑ.
Nɛ, Yinni Gusunɔwɑ nɑ yeni geruɑ.
Yinni Gusunɔ kɑ win tɔmbu
13 Yinni Gusunɔ u nɛɛ,
gbɑɑ wuko u rɑ win dĩɑnu gɛ̃wɑ u mɛnnɑ.
Adɑmɑ wee, nɑ kĩ n nɛn dĩɑnu mɛnnɑ Isirelibɑn mi,
mɑ nɑ deemɑ bɑ sɑ̃ɑwɑ nge resɛm
ǹ kun mɛ nge figie ye yɑ wurusu dɛllɑ
yɑ ǹ binu mɔ.
Yen sɔ̃nɑ kon bu deri swɑɑ sɑrobun sɔ̃.
14 Yudɑbɑ bɑ nɛɛ,
mbɑn sɔ̃nɑ sɑ sɔ̃ mini.
I de su mɛnnɑ
kpɑ su dɑ wuu si su gbɑ̃rɑnu mɔn mi,
sɑ n gɔɔ mɑrɑ.
Domi Gusunɔ bɛsɛn Yinni u yiwɑ su gbi.
U koo sun nim dɛ̃ɛgim nɔrusiɑ,
yèn sɔ̃ sɑ nùn torɑri.
15 Wee, sɑ tɑmɑɑ wɑ̃ɑrɑ koo kɔsi,
ɑdɑmɑ yɑ ǹ koore.
Sɑ tɑmɑɑ sɑɑ gɑɑ wee yè sɔɔ bɛsɛn nɔni swɑ̃ɑru
tɑ koo kpe,
ɑdɑmɑ nɑndɑbɑ bu sun deemɑ.
16 Wee sɑ yibɛrɛbɑn dumin wɔkinu nɔɔmɔ Dɑnun berɑ giɑ.
Mɑ yi wuri mɔ̀, yi tem kpuro nɛni mu diirimɔ.
Yibɛrɛ be, bɑ dĩɑnu gurɑmɔ bɑ gbeɑ mwɑɑmɔ,
kɑ sere Yerusɑlɛmu kɑ yen tɔmbu.
17 Adɑmɑ Yinni Gusunɔ u wisɑ u nɛɛ,
nɑ ǹ dɑɑ bɛɛ sɔ̃ɔwɑ mɛ ro?
Wee kon bɛɛ wɛɛ dɛ̃ɛgii kpɑremɑ
yi yi ǹ dobo dobogibun gɑri nɔɔmɔ.
Yi koo bɛɛ dwɛ̃ɛwɑ.
Yeremin nuki sɑnkirɑ
18 Yeremi u nɛɛ,
nɛn nuki sɑnkirɑ nɛn tɔmbun wɑhɑlɑn sɔ̃.
Nɑ kĩ n tii nukuru yɛmiɑsiɑ,
ɑdɑmɑ yɑ ǹ koorɔ.
19 Wee, nɑ nɛn tɔmbun weeweenu nɔɔmɔ bɑɑmɑn di.
Bɑ mɔ̀, Yinni Gusunɔ u sɑriwɑ Siɔniɔ?
Yen sunɔ u ǹ mɑɑ wɑ̃ɑwɑ mi?
Mɑ Yinni Gusunɔ u wisɑ u nɛɛ,
mbɑn sɔ̃nɑ bɑ nɛn mɔru seeyɑ
bɑ bũnu sɑ̃ɑmɔ nìn bwɑ̃ɑrokunu
bɑ wɑɑmɑ tɔn tukobun min di.
20 Mɑ Yeremi u nɛɛ,
sɑɑ ye sɑ rɑɑ yĩiyɔ su fɑɑbɑ wɑ,
yɑ doonɑ nge gɛ̃ɛbun sɑɑ.
Wee, sɑ ǹ fɑɑbɑ wɑ.
21 Nɛn tɔmbu bɑ nɔni sɔ̃ɔre.
Ben nɔni swɑ̃ɑ te, tɑ mɑn bɔkɑnɑ.
Nɑ nɑnde, nɑ nuki sɑnkire.
22 Tibu sɑriwɑ Gɑlɑdiɔ?
Dokotoro goo sɑriwɑ mi?
Nge mbɑn sɔ̃nɑ Isirelibɑn bosu kun kpeemɔ.
23 Nɛn wiru tɑ̀ n dɑɑ nim yibɑ
mɑ nɛn nɔni yi sɑ̃ɑ nge bwii,
kon dɑɑ wuri kowɑ sɔ̃ɔ sɔɔ kɑ wɔ̃kuru
nɛn tɔn be bɑ gun sɔ̃.