10
Aronin bibɑ dɔ̃ɔ mwɑɑrɑ
1 Aronin bibu Nɑdɑbu kɑ Abihu ben bɑɑwure u win dɔ̃ɔ gurɑtiɑ suɑ bɑ dɔ̃ɔ gure, mɑ bɑ turɑre doke mi. Yen biru bɑ kɑ Yinni Gusunɔ dɑɑwɑ kuu bekurugirɔ. Nge mɛyɑ bɑ kɑ dɔ̃ɔ tuko dɑ kuu ten mi. N deemɑ Yinni Gusunɔ u bu ye yinɑri.
2 Yerɑ u derɑ dɔ̃ɔ u yɑrɑ u bu di mɑ bɑ gu mi.
3 Mɑ Mɔwisi u Aroni sɔ̃ɔwɑ u nɛɛ, Yinni Gusunɔ u ǹ dɑɑ bɛɛ sɔ̃ɔwɑ u nɛɛ,
u kĩwɑ be bɑ nùn susimɔ bu win dɛɛrɑru nɑsiɑ,
kpɑ bu nùn bɛɛrɛ wɛ̃ tɔmbu kpuron wuswɑɑɔ?
Mɑ Aroni u win nɔɔ mɑri.
4 Mɑ Mɔwisi u Misɑɛli kɑ Elisɑfɑni Usiɛlin bibu sokɑ. Usiɛli wi, u sɑ̃ɑwɑ Aronin tundon wɔnɔn bii. Mɔwisi u bu sɔ̃ɔwɑ u nɛɛ, i nɑ i bɛɛn wɔnɔbun gonu suɑ kuu ten min di i kɑ nu dɑ sɑnsɑnin biruɔ.
5 Mɑ bɑ nɑ bɑ goo ni suɑ kɑ nin tɑkobɑ sɑnnu bɑ kɑ dɑ sɑnsɑnin biruɔ nge mɛ Mɔwisi u geruɑ.
6 Mɑ Mɔwisi u Aroni kɑ win bibu yiru be bɑ tie Eleɑsɑɑ kɑ Itɑmɑɑ sɔ̃ɔwɑ u nɛɛ, i ku bɛɛn winu deri diinu, i ku mɑɑ bɛɛn yɑ̃nu gɛ̃ɛku nuku sɑnkirɑnun sɔ̃ kpɑ Gusunɔ u ku rɑɑ bɛɛ go kpɑ u kɑ Isirelibɑ mɔru ko. Adɑmɑ i de bɛɛn mɛro bisibu Isirelibɑ bu swĩ be dɔ̃ɔ u din sɔ̃.
7 Bɛɛn tii i ku doonɑ kuu ten kɔnnɔn di kpɑ i ku rɑ kɑ gbin sɔ̃. Domi gum mɛ bɑ bɛɛ tɑ̃re mi, mu bɛɛ kuɑwɑ mi Yinni Gusunɔn yɑ̃ku kowobu.
Mɑ Aroni kɑ win bii be, bɑ kuɑ ye Mɔwisi u geruɑ.
Gusunɔ u yɑ̃ku kowobu
yinɑri bu tɑm nɔ
8 Yinni Gusunɔ u Aroni sɔ̃ɔwɑ u nɛɛ,
9-11 ɑ ǹ kɑɑ tɑm bɔɔbɔm gɑm nɔ wunɛ kɑ wunɛn bibu ì n dɔɔ nɛn kuu bekurugirɔ, kpɑ i ku rɑ kɑ gbin sɔ̃. Kpɑ i kɑ kpĩ i wunɑnɑ ye yɑ sɑ̃ɑ sɑ̃ɑrugiɑ kɑ ye yɑ ǹ sɑ̃ɑ sɑ̃ɑrugiɑ. Mɛyɑ i ko i mɑɑ kpĩ i wunɑnɑ ye yɑ dɛɛre kɑ ye yɑ ǹ dɛɛre. Mɛyɑ i ko i mɑɑ kpĩ i Isirelibɑ Gusunɔn woodɑbɑ kpuro sɔ̃ɔsi ye u Mɔwisi wɛ̃. Yeni yɑ ko n sɑ̃ɑwɑ woodɑ sere kɑ bɛɛn bibun bweserɔ.
Woodɑ ye bɑ yi
yɑ̃ku dĩɑnun sɔ̃
12 Mɔwisi u Aroni kɑ win bibu yiru be bɑ nùn tie, Eleɑsɑɑ kɑ Itɑmɑɑ sɔ̃ɔwɑ u nɛɛ, i som mɛ suo mɛ bɑ kɑ yɑ̃kunu kuɑ mu tiɑrɑ. Kpɑ i kɑ mu pɛ̃ɛ ko ye i kun seeyɑtiɑ doke. Kpɑ i ye di yɑ̃ku yerun bɔkuɔ. Domi nu kuɑwɑ mi dĩɑ dɛɛrɑnu.
13 I ko ye diwɑ yɑm dɛɛrɑm sɔɔ. Yerɑ yɑ ko n sɑ̃ɑ wunɛ kɑ wunɛn bibugiɑ nge mɛ Yinni Gusunɔ u mɑn sɔ̃ɔwɑ.
14 Mɛyɑ wunɛ kɑ wunɛn bii tɔn durɔbu kɑ tɔn kurɔbu i ko i yɑɑ nɔmu ge bɑ kpɑrɑ mi di kɑ guro guro te bɑ sɔ̃ɔsi beri berikɑ Yinni Gusunɔn wuswɑɑɔ. Yerɑ yɑ ko n sɑ̃ɑ wunɛ kɑ wunɛn bibugiɑ Isirelibɑ bɑ̀ n siɑrɑbun yɑ̃kuru kuɑ.
15 Isirelibɑ bɑ ko n dɑ kɑ yen nɔmu ge kɑ guro guro te nɛwɑ kɑ sere mɑɑ yɑɑ gum mɛ bɑ rɑ dɔ̃ɔ doke yɑ̃ku yerun wɔllu mi. Bɑ̀ n ye kpuro sɔ̃ɔsi beri berikɑ bɑ kpɑ, yɑ koo kowɑ wunɛ kɑ wunɛn bibugiɑ. Yɑ ko n sɑ̃ɑwɑ woodɑ sere kɑ bɑɑdommɑɔ nge mɛ Yinni Gusunɔ u geruɑ.
16 Yerɑ Mɔwisi u torɑrun yɑ̃ku boo ge bikiɑ. Adɑmɑ u deemɑ bɑ gu dɔ̃ɔ mɛni. Yerɑ u kɑ Aronin bibu yiru Eleɑsɑɑ kɑ Itɑmɑɑ mɔru bɑrɑ u nɛɛ,
17 mbɑn sɔ̃nɑ i ǹ boo gen yɑɑ temɛ Yinni Gusunɔn kuru mini. Domi gɑ sɑ̃ɑwɑ dĩɑ dɛɛrɑnu. Yinni Gusunɔ u bɛɛ gu wɛ̃wɑ i kɑ Isirelibɑ kpuron torɑnun yɑ̃kuru ko.
18 Adɑmɑ i ǹ kɑ gen yɛm duumɛ Yinni Gusunɔn kuu ten sɔɔwɔ. N deemɑ i ko i rɑɑ gen yɑɑ temwɑ kuu ten mi nge mɛ Yinni Gusunɔ u mɑn sɔ̃ɔwɑ.
19 Aroni u Mɔwisi sɔ̃ɔwɑ u nɛɛ, ɑ yɛ̃ ye n mɑn deemɑ sɑnɑm mɛ Isirelibɑ bɑ Yinni Gusunɔ yɑ̃kuru kuɑ ben torɑnun sɔ̃ kɑ mɑɑ yɑ̃ku dɔ̃ɔ mwɑɑrɑrugiru. Yen dɔmɑ te, nɑ̀ n torɑrun suurun yɑ̃ku ten yɑɑ di, yɑ koo Gusunɔ dore? Aɑwo! Yɑ ǹ Gusunɔ doremɔ.
20 Mɑ Aronin wisi bi, bu Mɔwisi dore.