14
Wi u rɑɑ bɑrɑ disigiru mɔn
dɛɛrɑsiɑbu
1 Yinni Gusunɔ u Mɔwisi sɔ̃ɔwɑ u nɛɛ,
2 wee nge mɛ bɑ koo kɑ tɔnu dɛɛrɑsiɑ wi u rɑɑ bɑrɑ disigiru mɔ. Bɑ koo kɑ nùn dɑwɑ yɑ̃ku kowon mi,
3 kpɑ yɑ̃ku kowo u kɑ nùn yɑri sɑnsɑnin di u nùn mɛɛri. Ù n deemɑ u bɛkurɑ,
4 yɑ̃ku kowo u koo nùn sɔ̃wɑ ye bɑ koo kɑ nùn dɛɛrɑsiɑ. U koo gunɔminu yiru suɑ ni bɑ rɑ kɑ yɑ̃kuru ko kɑ sere dɑ̃ɑ ye bɑ mɔ̀ sɛduru kɑ wɛ̃ɛ wunɔmgii kɑ dɑ̃ɑ kiku gɑgun kɑ̃ɑsɑ ge bɑ mɔ̀ isɔpu.
5 Yɑ̃ku kowo u koo de bu gunɔ gen teu sɑkɑwɑ wekeru sɔɔ te bɑ kuɑ kɑ sɔndu te tɑ nim gem mɔ.
6 Yen biru u koo gunɔ ge gɑ wɑsi mi, kɑ sɛdurun dɑ̃ɑ ye, kɑ wɛ̃ɛ wunɔmgii yi, kɑ isɔpun kɑ̃ɑsɑ ye dokewɑ yɛm mɛ sɔɔ, mɛ bɑ wisi nim sɔɔ mi.
7 U koo ye yɛ̃kɑwɑ nɔn nɔɔbɑ yiru wi bɑ koo dɛɛrɑsiɑn wɔllɔ. Yen biru u koo nùn gɑrisiwɑ u dɛɛre kpɑ u gunɔ ge yɔ̃su gu doonɑ.
8 Wi u koo tii dɛɛrɑsiɑ, u koo win yɑ̃nu teɑwɑ kpɑ u win sɑnsu kɔni, kpɑ u wobure nim sɔɔ. Sɑɑ ye sɔɔrɑ bɑ koo nùn gɑrisi u dɛɛre. Yen biru, u koo kpĩ u wurɑmɑ sɑnsɑniɔ. Adɑmɑ u koo kowɑ sɔ̃ɔ nɔɔbɑ yiru tɔɔwɔ u kun due win kuu bekurugirɔ.
9 Sɔ̃ɔ nɔɔbɑ yiruse te, u koo win sɑnsu kɔniwɑ kɑ win seri kɑ win toburu kɑ win nɔni burosu. Ye yɑ sɑ̃ɑ sɑnsu kpuro gesi, u koo kɔniwɑ. U koo mɑɑ win yɑ̃nu teɑwɑ kpɑ u wobure u dɛɛrɑ.
10 Sɔ̃ɔ nɔɔbɑ itɑse, u koo yɑ̃ɑnu yiru suɑ ni nu ǹ ɑlebu mɔ kɑ yɑ̃ɑ nii teeru wɔ̃ɔ tiɑgiru kɑ som kilo nɔɔbɑ nnɛ mɛ bɑ burinɑ kɑ gum kɑ sere mɑɑ gum litirin bɔnu.
11 Yɑ̃ku kowo wi u koo tɔnu wi dɛɛrɑsiɑ u koo nùn tusiɑ Yinni Gusunɔn wuswɑɑɔ kuu ten kɔnnɔwɔ kɑ mɑɑ win yɑ̃ku dĩɑnu.
12 Yɑ̃ku kowo u koo yɑ̃ɑ nin teeru suɑwɑ kpɑ u kɑ tu yɑ̃kuru ko te bɑ rɑ kɑ torɑru sɔmɛ kɑ sere gum litirin bɔnu ye, kpɑ u ye kpuro sɔ̃ɔsi beri berikɑ Yinni Gusunɔn wuswɑɑɔ.
13 Kpɑ u tu sɑkɑ yɑm dɛɛrɑm mi, mi bɑ rɑ torɑrun yɑ̃kuru kɑ yɑ̃ku dɔ̃ɔ mwɑɑrɑrugirun yɑɑ sɑke. Domi torɑrun yɑ̃ku yɑɑ kɑ ye bɑ rɑ kɑ torɑnu sɔmɛgiɑ yɑ sɑ̃ɑwɑ dĩɑ dɛɛrɑnu ni nu koo ko yɑ̃ku kowoginu.
14 Yɑ̃ku kowo u koo torɑrun yɑ̃ku yɑɑ yen yɛm suɑ u tɛɛni wi u dɛɛrɑsiɑmɔn soo nɔm geuguuɔ kɑ win nɔm geun niki biɑ bɑkɑɔ kɑ sere win nɔɔ nɔm geuguun niki biɑ bɑkɑɔ.
15 Yɑ̃ku kowo u koo mɑɑ gum litirin bɔnu ye wisiwɑ win nɔm dwɑrun nɔm wɔɔrɔ.
16 Kpɑ u kɑ win nɔm geun niki biɑ gum mɛ dɛkɑ u mu yɛ̃kɑ nɔn nɔɔbɑ yiru Yinni Gusunɔn wuswɑɑɔ.
17 Yen biru, kpɑ u gum mɛ mu tie tɛɛni wi u dɛɛrɑsiɑmɔn soo nɔm geuguuɔ kɑ mɑɑ win nɔm geun niki biɑ bɑkɑɔ kɑ win nɔɔ nɔm geuguun niki biɑ bɑkɑɔ. U koo mu tɛɛniwɑ mi u rɑɑ yɛm mɛ doke.
18 Kpɑ u mɑɑ mɛ mu tie win nɔmɑ sɔɔ doke yɛ̃ron wiru wɔllɔ kpɑ u nùn dɛɛrɑsiɑbun wororu koosi Yinni Gusunɔn wuswɑɑɔ.
19 Kpɑ u nùn torɑrun yɑ̃kuru kuɑ. Nge mɛyɑ u koo kɑ nùn dɛɛrɑsiɑ. Yen biruwɑ u koo yɑ̃ku dɔ̃ɔ mwɑɑrɑrugirun yɑɑ go.
20 Kpɑ u ye dɔ̃ɔ doke yɑ̃ku yerɔ kɑ kɛ̃nu. Nge mɛyɑ u koo kɑ yɛ̃ro torɑrun yɑ̃kuru kuɑ kpɑ u dɛɛrɑ.
Bwɛ̃ɛbwɛ̃ɛ wi u rɑɑ
bɑrɑ disigiru mɔn dɛɛrɑsiɑbu
21 Wi u bɑrɑ disigiru mɔ mɑ u ǹ dɑm mɔ u kɑ yɑ̃ku yɑɑ sɑberu wɑ, yɑ̃ɑ teerɑ u koo kɑsu u kɑ yɑ̃kuru ko te tɑ sɑ̃ɑ torɑrun sɔmbugiru. Yɑ̃ku kowo u koo kɑ tu suuru kɑnɑbun wororu ko Yinni Gusunɔn wuswɑɑɔ. Yen biru durɔ wi, u koo som kilo itɑ wɛ̃ mɛ bɑ burɑ kɑ gum kɑ sere mɑɑ gum litirin bɔnu.
22 U koo mɑɑ kɑ kpɑrukonu yiru nɑ ǹ kun mɛ totobɛrɛnu yiru nge mɛ win wɑɑrɑ nɛ. Bɑ koo gen teu go win torɑrun suurun sɔ̃. Kpɑ bu mɑɑ kɑ teu ge gɑ tie yɑ̃ku dɔ̃ɔ mwɑɑrɑrugiru ko.
23 Win dɛɛrɑsiɑbun sɔ̃ɔ itɑserɑ u koo kɑ ye kpuro yɑ̃ku kowo nɑɑwɑ sɑ̃ɑ yerun kɔnnɔwɔ Yinni Gusunɔn wuswɑɑɔ.
24 Yɑ̃ku kowo wi, u koo yɑ̃ɑ te mwɑ kɑ gum litirin bɔnu ye, kpɑ u ye kpuro sɔ̃ɔsi beri berikɑ Yinni Gusunɔn wuswɑɑɔ.
25 Yen biru u koo yɑ̃ɑ te sɑkɑ kpɑ u ten yɛm suɑ u tɛɛni wi u rɑɑ bɑrɑ disigiru mɔn soo nɔm geuguuɔ kɑ win nɔm geun niki biɑ bɑkɑɔ kɑ sere mɑɑ win nɔɔ nɔm geuguun niki biɑ bɑkɑɔ.
26 Yen biru yɑ̃ku kowo wi, u koo gum mɛ wie win nɔm dwɑrun nɔm wɔɔrɔ.
27 Kpɑ u kɑ win nɔm geun niki biɑ gum mɛ dɛkɑ u yɛ̃kɑ nɔn nɔɔbɑ yiru Yinni Gusunɔn wuswɑɑɔ.
28 U koo mɑɑ gum mɛ tɛɛni wi u rɑɑ bɑrɑ disigiru mɔn soo nɔm geuguuɔ kɑ nɔm geun niki biɑ bɑkɑɔ kɑ sere win nɔɔ nɔm geuguun niki biɑ bɑkɑɔ. U koo mu dokewɑ mi u rɑɑ gesi yɛm tɛɛni.
29 Yen biru gum mɛ mu tie win nɔmɑɔ, u koo mu wisiwɑ wi u rɑɑ bɑrɑ disigiru mɔn wirɔ u sere nùn dɛɛrɑsiɑbun wororu kuɑ Yinni Gusunɔn wuswɑɑɔ.
30 Yen biru, u koo gunɔ gen teu go, gèn bweseru u wɑ.
31 Bɑ koo kɑ gen teu torɑrun suurun yɑ̃kuru ko. Teu mɑɑ yɑ̃ku dɔ̃ɔ mwɑɑrɑrugiru kɑ som mɛ, kɑ gum mɛ. Kpɑ yɑ̃ku kowo wi, u wi u rɑɑ bɑrɑ disigiru mɔ dɛɛrɑsiɑbun wororu kuɑ Yinni Gusunɔn wuswɑɑɔ.
32 Woodɑ yeniwɑ wi u bɑrɑ disigiru mɔ mɑ u ǹ dɑm mɔ u koo swĩi u kɑ dɛɛrɑsiɑbun yɑ̃kuru ko.
Disi gɔmi dirun gɑni sɔɔ
33 Yinni Gusunɔ u Mɔwisi kɑ Aroni sɔ̃ɔwɑ u nɛɛ,
34 sɑnɑm mɛ i ko i du Kɑnɑnin temɔ mɛ kon bɛɛ wɛ̃, nɑ̀ n derɑ disi gɔmi yi kpiɑ diru gɑru sɔɔ tè sɔɔ i wɑ̃ɑ,
35 wi u dii te mɔ, u koo dɑwɑ u yɑ̃ku kowo sɔ̃ u nɛɛ, wee u gɑ̃ɑnu wɑɑmɔ win dirɔ nge disi gɔmi.
36 Yɑ̃ku kowo wi, u sere du u kɑ dii te mɛɛri, u koo dewɑ bu ten yɑ̃nu kpuro yɑrɑ kpɑ yɑ̃ɑ nin tii nu ku rɑɑ disi duurɑ. Yen biru u koo du kpɑ u disi gɔmi yi mɛɛri.
37 Ù n deemɑ gɔmi yi sɑ̃ɑ nge wuru bekusu, ǹ kun mɛ yi sɔ̃ri, kpɑ yi n sɑ̃ɑ nge wɔru gɑnɑ ye sɔɔ,
38 u koo yɑriwɑ kpɑ u dii te kɛnɛ sɔ̃ɔ nɔɔbɑ yiru.
39 Sɔ̃ɔ nɔɔbɑ yiruse, yɑ̃ku kowo u koo wurɑ diru mi. Ù n deemɑ disi gɔmi yi yɑbi dii ten gɑni sɔɔ,
40 u koo de bu dii ten kpenu wɔɔriwɑ nìn mi disi gɔmi yi, yi kpiɑ bu kɑ nu yɑri wuun di bu kɔ̃ mi n kun dɛɛre.
41 U koo dewɑ bu dii ten sɔɔwɔ kpuro kɛrɑ kpɑ bu yɑnim mɛ bɑ kɛrɑ mi yɑri wuun biruɔ mi n kun dɛɛre.
42 Yen biru kpɑ bu kpee kpɑɑnu kɔsire ko. Kpɑ bu wure bu dii te tɑ̃wɑ.
43 Amɛn biru, disi gɔmi yi, yì n mɑɑ wurɑmɑ dii te sɔɔ,
44 yɑ̃ku kowo u koo mɑɑ sewɑ u dɑ u tu mɛɛri. Ù n deemɑ disi gɔmi yi, yi mɑɑ kpiɑ dii ten gɑni sɔɔ, sɑɑ ye sɔɔ, n ǹ mɑɑ koorɔ bu yi wĩɑ min di. Dii te, tɑ disi duurɑwɑ mi.
45 Bɑ koo tu surɑwɑ kpɑ bu ten kpenu kɑ dɑ̃ɑ kɑ tem gurɑ bu kɑ dɑ wuun biruɔ mi n kun dɛɛre.
46 Wi u duɑ diru mi sɑnɑm mɛ bɑ tu kɛnusi, u disi duurɑwɑ mi sere kɑ yokɑɔ.
47 Wi u kpunɑ mi, ǹ kun mɛ u gɑ̃ɑnu di mi, u koo win yɑ̃nu teɑwɑ.
48 Sɑnɑm mɛ bɑ dii te sɔnwɑ bɑ kpɑ, yɑ̃ku kowo ù n wurɑ u kɑ tu mɛɛri, mɑ u deemɑ disi gɔmi yi sɑri, u koo dii te gɑrisiwɑ tɑ dɛɛre. Domi disi gɔmi yi, yi doonɑ.
49 Bu kɑ dii ten dɛɛrɑsiɑbun woronu ko, bɑ koo gunɔsu yiru kɑsuwɑ kɑ dɑ̃ɑ ye bɑ mɔ̀ sɛduru kɑ kiku ge bɑ mɔ̀ isɔpu kɑ wɛ̃ɛ wunɔmgii.
50 U koo gunɔ gen teu sɑkɑwɑ wekeru sɔɔ te bɑ kuɑ kɑ sɔndu tɑ nim gem mɔ.
51 Yen biru, u koo ge gɑ wɑsi suɑ kɑ sɛduru ye, kɑ isɔpu ye, kɑ wɛ̃ɛ wunɔmgii yi, kpɑ u ye kpuro doke gunɔ ge bɑ sɑkɑn yɛm mɛ sɔɔ, mɛ bɑ wisi nim sɔɔ mi, kpɑ u mu yɛ̃kɑ nɔn nɔɔbɑ yiru dii te sɔɔ.
52 U koo kɑ gunɔ gen yɛm mɛ bɑ wisi nim sɔɔ mi, disi wɔkɑ kɑ gunɔ ge gɑ wɑsi kɑ sɛduru ye, kɑ isɔpu kɑ wɛ̃ɛ wunɔmgii yi.
53 Kpɑ u gunɔ ge gɑ wɑsi yɔ̃su gu doonɑ yɑkɑsɔ. Sɑɑ ye sɔɔrɑ u koo dii te dɛɛrɑsiɑbun wororu koosi kpɑ tu dɛɛrɑ.
54 Woodɑ yenibɑrɑ bɑ ko n dɑ swĩi bɑrɑ disigiru kɑ wii kpɑkin sɔ̃
55-56 kɑ mɔsiru kɑ debu kɑ disi gɔmi yi yi rɑ kpi yɑ̃nu sɔɔ kɑ diɑ sɔɔ.
57 Woodɑ yerɑ yɑ koo sɔ̃ɔsi gɑ̃ɑ ni nu dɛɛre kɑ ni nu kun dɛɛre.