27
Nɔɔ mwɛɛnun yibiɑbu
1 Yinni Gusunɔ u Mɔwisi sɔ̃ɔwɑ u nɛɛ,
2 ɑ Isirelibɑ woodɑ yeni sɔ̃ɔwɔ ɑ nɛɛ, goo ù n nɔɔ mwɛɛru kuɑ u nɛɛ, u koo nɛ, Yinni Gusunɔ tɔnu kɛ̃, u koo kpĩ u gobi kɔsiɑ tɔnu win ɑyerɔ nge mɛni u kɑ win nɔɔ mwɛɛru yibiɑ.
3 Sɑɑ tɔn durɔ wi u wɔ̃ɔ yɛndu mɔn di n kɑ dɑ wɔ̃ɔ wɑtɑgii, sii geesun gobi weerɑɑkurɑ u koo kɔsiɑ nge mɛ bɑ rɑ sɑ̃ɑ yerun gobi kɔsi.
4 Ǹ n tɔn kurɔn nɑ, sii geesun gobi tɛnɑ.
5 Tɔn durɔ wi u mɔ wɔ̃ɔ nɔɔbu n kɑ dɑ wɔ̃ɔ yɛndugii, sii geesun gobi yɛndɑ u koo kɔsiɑ. Ǹ n mɑɑ tɔn kurɔn nɑ, sii geesun gobi wɔkuru.
6 Sɑɑ tɔn durɔ suru tiɑgii sere n kɑ dɑ wɔ̃ɔ nɔɔbugii, sii geesun gobi nɔɔbuwɑ u koo kɔsiɑ. Ǹ n mɑɑ tɔn kurɔn nɑ, sii geesun gobi itɑwɑ u koo kɔsiɑ.
7 Goo ù n mɑɑ wɔ̃ɔ wɑtɑ mɔ ǹ kun mɛ ù n kere mɛ, sii geesun gobi wɔkurɑ nɔɔbuwɑ u koo kɔsiɑ. Ǹ n mɑɑ tɔn kurɔn nɑ, sii geesun gobi wɔkurɑ u koo kɔsiɑ.
8 Goo ù n sɑ̃ɑ sɑ̃ɑro too, mɑ u ǹ kpɛ̃ u kɔsiɑ mɛ bɑ geruɑ, bɑ koo kɑ yɛ̃ro dɑwɑ yɑ̃ku kowon mi, kpɑ yɑ̃ku kowo wi, u nùn sɔ̃ mɛ̀n nɔɔ u koo kɔsiɑ nge mɛ win wɑɑrɑ nɛ.
9 Goo ù n nɛ, Yinni Gusunɔ nɔɔ mwɛɛru kuɑ mɑ u koo mɑn yɑɑ sɑberu kɛ̃ te bɑ rɑ kɑ yɑ̃kuru ko, yɑɑ sɑbe te, tɑ ko n sɑ̃ɑwɑ nɛgiru.
10 Bɑ ǹ kɑ tu gɑru kɔsinɑmɔ te tɑ kun wɑ̃. Bɑɑ tɑ̀ kun mɑɑ wɑ̃, bɑ ǹ kɑ tu gɑru kɔsinɑmɔ te tɑ wɑ̃. Kɑ mɛ, bɑ̀ n mɑɑ kɑ tu kɔsinɑ, ni yiru kpuro nu ko n sɑ̃ɑwɑ nɛginu.
11 Goo ù n kɑ yɑɑ sɑberu nɑ te bɑ ku rɑ kɑ yɑ̃kuru ko, bɑ koo kɑ tu dɑwɑ yɑ̃ku kowon mi.
12 Kpɑ yɑ̃ku kowo u tu mɛɛri u ten geeru burɑ.
13 Wi u kɑ yɑɑ sɑbe te nɑ, mɑ u kĩ u tu yɑkiɑ, gee te yɑ̃ku kowo u nùn bure, terɑ u koo kɔsiɑ. Kpɑ u mɑɑ gee ten bɔnu nɔɔbun tiɑ sosi.
14 Goo ù n win diru Yinni Gusunɔ kɑ̃, yɑ̃ku kowowɑ u koo dɑ u tu mɛɛri kpɑ u ten geerun sɑkɑ gere. Gee te u geruɑ mi, terɑ bɑ koo kɑ sɔmburu ko.
15 Adɑmɑ ù n kĩ u win dii te yɑkiɑ, u koo ginɑ gee te yɑ̃ku kowo u burɑ mi kɔsiɑwɑ kpɑ u ten wɔllɔ bɔnu nɔɔbusen tiɑ sosi dii te, tu sere mɑɑ ko wigiru.
16 Goo ù n mɑɑ win gberu Yinni Gusunɔ wɛ̃, bɑ koo ten geeru burɑwɑ. Dĩɑ ni bɑ koo duuren kpɑ̃ɑrɑ bɑ koo mɛɛri. Nge tɛ̃ bɑ̀ n dĩɑ ni bɑ mɔ̀ ɔɔsu duurɑ, mɑ nu kilo goobɑ wunɔbu (300) kuɑ, sii geesun gobi weerɑɑkurɑ bɑ koo kɔsiɑ.
17 Ǹ n sɑ̃ɑn nɑ yɑkiɑbun tɔ̃ɔ bɑkɑrun diyɑ u gbee te wɛ̃, ten gobi kpurowɑ u koo kɔsiɑ.
18 Ù n gbee te Yinni Gusunɔ wɛ̃ yɑkiɑbun tɔ̃ɔ bɑkɑrun biru, yɑ̃ku kowo u koo ten gobi kɑwɑwɑ. U koo wɔ̃ɔ si su tie sere yɑkiɑbun tɔ̃ɔ bɑkɑru tu kɑ turin gobi kɔsiɑwɑ.
19 Yɛ̃ro ù n kĩ u win gbee te yɑkiɑ, u koo kɔsiɑwɑ ye bɑ burɑ mi, kpɑ u yen bɔnu nɔɔbun tiɑ sosi gbee te, tu sere mɑɑ ko wigiru.
20 Ù kun tu yɑkie, mɑ bɑ tu goo dɔre, u ǹ mɑɑ kpɛ̃ u tu yɑkiɑ win tii.
21 Yɑkiɑbun tɔ̃ɔ bɑkɑru tɑ̀ n tunumɑ, tɑ koo kowɑ Yinni Gusunɔgiru. Yɑ̃ku kowobɑ bɑ ko n tu mɔ sere kɑ bɑɑdommɑɔ.
22 Goo ù n Yinni Gusunɔ gberu wɛ̃ te u dwɑ, n ǹ mɔ te u tubi di,
23 yɑ̃ku kowowɑ u koo tu mɛɛri kpɑ u ten geeru burɑ. U koo wɔ̃su gɑriwɑ si su tie yɑkiɑbun tɔ̃ɔ bɑkɑru tu kɑ turi. Wɔ̃ɔ si kpuron gobiyɑ u koo gere kpɑ gobi yi, yi ko Yinni Gusunɔgii.
24 Adɑmɑ yɑkiɑbun tɔ̃ɔ bɑkɑru tɑ̀ n tunumɑ, gbee te, tɑ ko n sɑ̃ɑwɑ wi u rɑɑ nùn tu dɔregiru.
25 Bɑ koo gɑ̃ɑnu kpuron geeru burɑwɑ nge mɛ bɑ rɑ sɑ̃ɑ yerun gobi kɔsi. N deemɑ gobi yin tiɑn bunum mu rɑ n sɑ̃ɑwɑ gɑrɑmu wɔkuru.
Kɛ̃ɛ bwese bwesekɑ
26 Goo u ku rɑɑ win yɑɑ sɑberun buu gbiikuu Yinni Gusunɔ kɛ̃. Domi gɑ sɑ̃ɑwɑ Yinni Gusunɔguu kɔ yèn sɔ̃ gɑ sɑ̃ɑ buu gbiikuu. Bɑɑ ǹ n yɑ̃ɑrun nɑ ǹ kun mɛ kɛtɛ, gɑ sɑ̃ɑwɑ Yinni Gusunɔguu.
27 Gɑ̀ n mɑɑ sɑ̃ɑn nɑ sɑbe te bɑ ku rɑ kɑ yɑ̃kuru kon buu gbiikuu, wi u kɑ tu nɑ u koo kpĩ u tu yɑkiɑ ù n gee te yɑ̃ku kowo u nùn bure kɔsiɑ kpɑ u mɑɑ ten bɔnu nɔɔbun tiɑ sosi. Ù n kpɑnɑ u tu yɑkiɑ, yɑ̃ku kowo u koo kpĩ u tu goo dɔre nge mɛ u ten geeru bure.
28 Gɑ̃ɑ ni bɑ Yinni Gusunɔ kɑ̃ sere kɑ bɑɑdommɑɔ, ɑɑ tɔnuwɑ? Ǹ kun mɛ yɑɑ sɑberɑ? Ǹ kun mɛ gbee te u tubi diwɑ? Gɑ̃ɑ ni bɑ gɔsɑ bɑ yi Yinni Gusunɔn sɔ̃ gesi, n ǹ mɑɑ koorɔ u nu yɑkiɑ ǹ kun mɛ u nu dɔrɑ. Nu ko n sɑ̃ɑwɑ Yinni Gusunɔginu sere kɑ bɑɑdommɑɔ.
29 Bɑɑ ǹ n tɔnun nɑ n ǹ koorɔ u nùn yɑkiɑ. Bɑ koo yɛ̃ro gowɑ.
30 I ko i n dɑ Yinni Gusunɔ bɛɛn gberun dĩɑnun subɑ wɔkuru sɔɔ tiɑ yiiyewɑ sere kɑ dɑ̃ɑ mɑrumɔ.
31 Goo ù n kĩ u ye yɑkiɑ, u koo yen gee te kɔsiɑwɑ kpɑ u mɑɑ yen bɔnu nɔɔbun tiɑ sosi.
32 Mɛyɑ mɑɑ yɑɑ sɑbenu sɔɔ. Yɑ̃ɑrɑ? Kɛtɛwɑ? Boowɑ? Sɑbe ni bɑ kpɑre gesi, wɔkuru bɑɑteren wɔllɔ Yinni Gusunɔ u teeru mɔ.
33 Wi u sɑbe ni mɔ, u ǹ koo gɔsi te tɑ wɑ̃ ǹ kun mɛ te tɑ kun wɑ̃. U ǹ mɑɑ kɑ tu gɑru kɔsinɑmɔ. Bɑɑ ù n kɑ tu gɑru kɔsinɑ, ni yiru kpuro nu ko n sɑ̃ɑwɑ Yinni Gusunɔginu. N ǹ koorɔ bu nu yɑkiɑ.
34 Woodɑ yenibɑrɑ Yinni Gusunɔ u Mɔwisi wɛ̃ Isirelibɑn sɔ̃ Sinɑin guurɔ.