6
Nɛɛmaya ibɛrɛnↄ zɛ́wɛtɛna ò ↄ̃ndↄ̃ kɛnɛ
Ma bĩni bò ma làka a foro kú gukea doro, ama mádi a bĩnilɛ gbànↄ pɛ́tɛpɛtɛ gĩaro. Kũ Sambala kũ Tobiao kũ Larubu buri Gɛsɛmuo kũ ma ibɛrɛ kparanↄ a baaruu mà, Sambala kũ Gɛsɛmu pìio lɛ́gbãzã kɛ̀mɛnɛ ò pì mà mↄ́ mà dańlɛ Onↄ guvutɛ lakutu ke gũn. Yã vãnin òtɛn wɛtɛ kũmao. Ma gbɛ̃nↄ zĩ̀ḿma ma pì: Matɛn zĩ zↄ̃kↄ̃ kɛmɛ, mani le mà suro. Mani le mà zĩ pì tón mà su á kĩnaaro. Ò lɛ́gbãzã pìi kɛ̀mɛnɛ gɛ̃̀n siikↄ̃, akũ ma yã mɛ̀n do pìi sìńla. A gɛ̃̀n sↄↄrode Sambala a ìba ke zĩ̀ma. À takada kũ òdi kãni'ↄ naaro kũna. Ò kɛ̃̀ takada pìi gũn ò pì: O yãke mà burinↄ kĩnaa, akũ Gɛsɛmu pì yãpuramɛ. À pì mↄkↄ̃n kũ Yuda kparanↄ a zɛo à bo kína yã kpɛmɛ. Abire yãin átɛn bĩni pì bo. Ò pì dↄ ń ye ǹ gↄ̃ Yudanↄ kína ũmɛ, akũ n annabinↄ dìtɛ ò o Yurusalɛmu, mↄkↄ̃mmɛ ń kína ũ. Kína ni yã pì ma. A yã mɛ́ à tò ǹ mↄ́ ò lɛ́ kpákũsũ. Akũ ma lɛ́gbãzã kɛ̀nɛ ma pì: Yã kũ ntɛn o kunlo. Mↄkↄ̃mmɛ n yã pìi ò n zĩdaa. Ń pínki ò ye vĩna ma kũ ò pì, ó ↄ ni gↄ̃ dↄwáimɛ, óni le ò zĩ pì lákaro. Ma Luda, ǹ ma ↄ gba gbãna.
10 Ma gɛ Delaya nɛ́ Semaya, Mɛtabɛli daikore bɛa, zaakũ à a zĩda yĩ̀ a kpɛ́n. À pì: Ò dakarɛ Luda kpɛ́n ò a gbà taólɛ, zaakũ gbɛ̃nↄ tɛn su n dɛmɛ. Oni su ò n dɛ gwãanimɛ. 11 Akũ ma pì: Ma taka dì bàa sí yá? Ma taka ni fↄ̃ à gɛ́ utɛ Luda kpɛ́n ma zĩda surabana yãi yá? Mani gɛ́ro. 12 Má dↄ̃ ma zĩdaa a yã pì dí bo Luda kĩnaaro. À annabikɛyã pìi ò ma yã musu kũ Tobia kũ Sambalao fĩnaa bònɛ yãimɛ. 13 À fĩnaa bònɛ de vĩna le à ma kũ mà durunna kɛ mà gɛ́ gwe, gbasa ò ma tↄ́ yaka ò ma sↄ̃sↄ̃. 14 Ma Luda, Tobia kũ Sambalao yãkɛnaa pì gↄ̃ dↄngu. Nↄgbɛ̃ annabi Nↄadia yã gↄ̃ dↄngu dↄ kũ annabi kpara kũ ò ye vĩna ma kũnↄ.
Yurusalɛmu bĩni lakanaa
15 Gↄrↄ bupla akuri awɛɛpla gbɛra ò bĩni pìi làka Ɛlulu mↄ gↄrↄ baraasↄↄrodea. 16 Kũ ó ibɛrɛnↄ a baaruu mà akũsↄ̃ buri kũ ò likanawáinↄ wɛ́ sìalɛ, ń kã gà ò dↄ̃̀ sà kũ o zĩ pìi kɛ̀ kũ ó Luda gbãnao. 17 Gↄrↄ birea Yudanↄ kínɛnↄ tɛn takada kpãzã Tobianɛ dasi, akũsↄ̃ Tobia pì tɛn kpãzãńnɛ. 18 Yudanↄ yã yĩ̀ kãao dasi, zaakũ Ara nɛ́ Sɛkaniamɛ a anzure ũ akũsↄ̃ Bɛrɛkia nɛ́ Mɛsulamu mɛ́ à Tobia nɛ́ Yoanana anzure ũ. 19 Òdi a sáabu kpá ma wára dↄ, akũ òdi ɛra ò ma yã babanɛ. Tobia pì takadanↄ kpã̀zãmɛnɛ dↄ de vĩna le à ma kũ.