16
1 Bisãsiri dì yã ditɛ a swɛ̃̀n,
ama a mìdɛnaa dì bo Dikiri lɛ́mmɛ.
2 Baadi dì a yãkɛna e manamɛ,
ama Dikiri dì ń nɛ̀sɛgũnyãnↄ yↄ̃ à gwa.
3 Ǹ yã kũ ntɛn kɛ na Dikiri ↄĩ,
n pↄyeina ni bo mana.
4 Dikiri pↄ́ sĩnda pínki kɛ̀ a pↄyeina yãimɛ,
yãvãnikɛrinↄ pↄ́n wɛ́tãmmagↄrↄ ũ.
5 Dikiri tɛ̃̀ɛmɛ zĩdabirinↄ ũ,
yãpura, oni bo pãro.
6 Gbɛ̃kɛ kũ náanio dì lá ká taarila,
vĩnakɛna Dikirinɛɛ dì tó ò pã yã vãninɛ.
7 Tó gbɛ̃ yãkɛnanↄ kɛ̀ Dikirinɛ nna,
àdi tó a ibɛrɛnↄ kɛ kãao nna se.
8 Pↄ́ fíti lena manakɛnaa gũn
mana de àre vãni zↄ̃kↄ̃ lenala.
9 Bisãsiri dì zɛ́ kũ àtɛn sɛ́ laasun lɛ́,
ama Dikiri dì a gɛ̀sɛ da zɛ́a.
10 Lákũ kína dì yã ditɛ Luda gɛ̃nɛ ũ nà,
à mana a yã bo yãzɛde kpɛro.
11 Zaka mana kũ kiloo súsuo bi Dikiri pↄ́mɛ,
pↄ́tikisigwabↄ sĩnda pínki bi a pↄ́kɛnanↄmɛ.
12 Adi kↄ̃ sío kína yã vãni kɛro,
òdi kpata zĩni pɛ́tɛ yãzɛde musumɛ.
13 Yãzɛde'orii dì kɛ kínanɛ nna,
àdigↄ̃ ye yãpura'oriii.
14 Kína pↄfɛ̃ de lán ga zĩ̀rii bàmɛ,
ama ↄ̃ndↄ̃de dì a tɛ́ dɛ.
15 Kína ãn werenaa dìgↄ̃ aafia vĩ,
a manakɛnnɛna de lán pↄ́tↄ̃gↄrↄ legũ bàmɛ.
16 Ɔ̃ndↄ̃kũna mana de wurala zã̀,
gↄ̃na laakaride ũ bɛ̀ɛrɛ vĩ de andurufu manala.
17 Gbɛ̃ mana zɛ́ kũ àdi sɛ́ pã̀ zɛ́ vãninɛ,
gbɛ̃ kũ à a zĩda kũna dↄ̃ dì a wɛ̃̀ndi dãkpã.
18 Ĩadãnaa dì su kũ lɛtɛnaao,
zĩdabinaa dì su kũ kakatɛnaao.
19 Zĩdabusana talakanↄ tɛ́ mana
de baka kunna kũ zĩdabirinↄla.
20 Gbɛ̃ kũ àdi yã'onnɛna ma dì yã mana le,
Dikiri náanikɛri dìgↄ̃ pↄnna vĩ.
21 Gbɛ̃ kũ a nɛ̀sɛ panan òdi sísi laakaride,
gbɛ̃ kũ a lɛ́ nnan òdi a yãdↄ̃na zɛ́ e.
22 Laakariimɛ wɛ̃̀ndi mì ũ gbɛ̃ kũ ò vĩnↄnɛ,
fayasaridenↄ yãfayasari dì wɛ́ tãḿma.
23 Ɔ̃ndↄ̃de laasun dì a lɛ́ da zɛ́n,
a lɛ́ dì tó ò a yãdↄ̃na zɛ́ e.
24 Yãnna'ona bi zↄ́mɛ,
à nna nɛ̀sɛn akũsↄ̃ àdi mɛ̀ gba aafia.
25 Zɛ́ ke kun àdi kɛ gbɛ̃nↄnɛ mana,
ama a mìdɛki bi gamɛ.
26 Búbarii nɛ̀sɛɛ dì a da zĩn,
zaakũ nàa dì tɛ́ káimɛ.
27 Gbɛ̃ pã dì yã vãni gↄ̃gↄ̃,
a lɛ́gbɛ de lán tɛ́ kũ àtɛn kũ bàmɛ.
28 Gbɛ̃ dↄ̀rↄsaride dì fìti da,
kↄrↄmↄtↄde dì gbɛ̃nnanↄ kɛ̃kↄ̃a.
29 Gbɛ̃ pãsĩ dì manafiki kɛ a gbɛ̃dakenɛ,
gbasa à a da zɛ́ vãnin.
30 Gbɛ̃ kũ àtɛn wɛ́ lɛ́ laasun dìgↄ̃ kpɛdangara,
gbɛ̃ kũ àtɛn lɛ́zuki kɛ zɛ̀ kũ yã vãniomɛ.
31 Mìkã pura bi fùra gakuridemɛ,
manakɛnaa dì ń káa.
32 Nɛ̀sɛyĩdade mana de zĩ̀karila,
gbɛ̃ kũ à a zĩda kũna dↄ̃ mana de wɛ̃tɛsirila.
33 Òdi yã gbɛka kũ ↄgↄ purao,
ama a bↄkↄtɛnaa dì bo Dikiri kĩnaamɛ.