18
1 Zĩda pↄyeina dì do gbɛ̃ kũ àdi kɛ̃ḿmanɛ arɛ,
àdi gí lɛ́damma sĩnda pínkii.
2 Yↄ̃nkↄ dì pↄnna kɛ laakari yã musuro,
yã kũ à bò a lɛ́n àdi o.
3 Vãnikɛnaa dì su kũ gbɛ̃ gyabonaaomɛ,
kpeboyã dì su kũ wé'io.
4 Bisãsiri lɛ́gbɛ bi í lòkotoomɛ,
swa'i bàasinaamɛ, ísɛ̃boki wɛ̃̀ndidemɛ.
5 Kɛna vãnikɛriinɛ kɛ̀rɛkɛrɛ
ke yãkɛna taarisaridenɛ lɛ́kpɛrɛ manaro.
6 Yↄ̃nkↄ lɛ́ dì a da fìtin,
a yã'onaa dì a kpá gbɛ̃naai.
7 Yↄ̃nkↄ lɛ́ dì a yaka,
a yã'onaa dì a kũ lán tankutɛ bà.
8 Gbɛ̃piri yã dì kɛńnɛ lán zↄ́ bà,
àdi gɛ̃ lɛ́n dↄ̃̀ↄ ari nɛ̀sɛɛ gũn.
9 Gbɛ̃ kũ àdi pã kpá a zĩi bi
ásarude dakũnamɛ.
10 Dikiri tↄ́ bi utɛki leimɛ,
gbɛ̃ mana dì bàa lɛ́ à gɛ̃̀n à aafia le.
11 Ɔgↄde aruzɛkɛ denɛ lán wɛ̃tɛ kũ ò lɛ̀kara likai bà,
lán bĩni kũ oni fↄ̃ ò didiaro bà.
12 Zĩdabinaa dì su gbɛ̃nɛ kũ lɛtɛnaao,
zĩdabusanaa dì su kũ bɛ̀ɛrɛɛo.
13 Gbɛ̃ kũ àdi weḿma sãkpanaa sari,
yↄ̃nkↄkɛ kũ kpebonaao gↄ̃̀nɛ.
14 Kãgbãnakɛ dì gbɛ̃ gba gbãna gyãpɛɛa,
ama dí mɛ́ ani pↄsira fↄ̃ↄ?
15 Laakaride dì yã dada a swɛ̃̀n,
ↄ̃ndↄ̃de sã dìgↄ̃ dↄ dↄ̃naai.
16 Gba kũ gbɛ̃ dàa dì zɛ́ kɛkɛnɛ,
àdi zɛ́ wɛ̃nɛ gɛna gbɛ̃ zↄ̃kↄ̃nↄ kĩnaa.
17 Gbɛ̃ kũ à yã ò káakun òdi a gwa yãnnade ũ,
ari a ibɛrɛ gↄ̃ gɛ́ a ɛ́kɛ bo.
18 Líkpanaa dì fìti mì dɛ,
àdi gↄ̃sa gbãnanↄ kpaatɛ.
19 Danɛ kũ ò taari kɛ̀nɛ yã dìgↄ̃ gbãna lán bĩni bà,
ń fìti de lán zɛ́kakana kũ lɛ̀ɛo bà.
20 Yã'ona dↄ̃ dì su gbɛ̃nɛ kũ kãnaao,
a lɛ́gbɛɛ dì tó pↄ́ mↄ́a.
21 Ga kũ wɛ̃̀ndiio kú lɛ́mmɛ,
gbɛ̃ kũ à ye yã'onaai ni a gbɛ̀ le.
22 Gbɛ̃ kũ à nↄ lè à sɛ̀ pↄ́ mana lè,
arubarika dí bò Dikiri kĩnaamɛ.
23 Takaside dì yã o wɛ̃ndawɛ̃nda,
aruzɛkɛde dì weḿma gbãnagbãna.
24 Gbɛ̃nna bɛrɛkɛtɛ dì yã vãni ińnɛmɛ,
gbɛ̃nna kenↄ kun òdi na gbɛ̃i de ↄn gbɛ̃la.