25
Sulemanu yáasi pãndenↄ
1 Sulemanu yáasi kũ Yudanↄ kína Ɛzɛkaya gbɛ̃nↄ kɛ̃̀ takada gũnnↄn dí.
2 Luda gakuri vĩ à yã utɛ,
kínanↄ gakuri vĩ ò yã tàasi ká.
3 Lán óni fↄ̃ ò ludambɛ lei kũ zĩtɛ lòkotooo dↄ̃ro nà,
lɛn óni fↄ̃ ò kína laasun dↄ̃ro lɛ.
4 Ǹ andurufu gbãsĩ bↄtɛ,
a pìri ni pↄ́ mana pio,
5 ǹ yãvãnikɛrinↄ bↄtɛ kína arɛ,
a kpata ni gbãna kũ yãzɛde musu.
6 Ǹsun n zĩda sɛ́ lei kína arɛro,
ǹsun vutɛ gbɛ̃ zↄ̃kↄ̃nↄ vutɛkiaro.
7 Zaakũ à sã̀na à pinnɛ ǹ su arɛ la
de à n ditɛ kĩana gbɛ̃ bɛ̀ɛrɛdenↄ arɛla.
8 Yã kũ n wɛ́ è,
ǹsungↄ̃ wãna kũ a gↄ̃gↄ̃naaoro,
zaakũ tó ò n yã ɛ́kɛ bò,
bↄ́n ĩni láka ǹ kɛɛ?
9 Tó ntɛn yã gↄ̃gↄ̃ kũ n gbɛ̃dakeo,
ǹsun bo kũ gbɛ̃ pãnde asirioro.
10 Tó à mà, ani wé'i dammamɛ,
n tↄ́ vãni ni láka doro.
11 Yãmana'ona a gↄrↄa nna
lán mangoro tɛ̃ra kũ à da andurufu tan bà.
12 Ɔ̃ndↄ̃de lɛ́damma mana gbɛ̃ kũ à nɛ̀sɛ vĩnɛ
à de lán wura nↄmanablebↄↄ bàmɛ.
13 Lákũ í yĩda dìgↄ̃ de nà pↄ́kɛ̃rinↄnɛ,
lɛn zĩ̀ri náanide de lɛ gbɛ̃ kũ ò a zĩ̀nↄnɛ,
àdi ń nɛ̀sɛ yĩda kũńnɛ.
14 Gbɛ̃ kũ àdi gbadana lɛ́ sɛ́ akũ àdi daro
de lán legũ kũ à sìsi a ĩa kàka adi maro bàmɛ.
15 Mɛnana dì tó kína a yãzɛ e,
kpatɛna yãii dì tó a yã ble.
16 Tó n zↄ́ lè, ǹ ble n nɛ̀sɛ lɛ́n,
de ǹsun ble dasi ǹ lɛ́ sukparo yãi.
17 Ǹsun n gbɛ̃dake bɛ zɛ́ sↄro,
de àsun kpasa kũnwo à zãnguro yãi.
18 Gbɛ̃ kũ à yã dì a gbɛ̃dakea
de lán gò ke fɛ̃nɛda ke kàlɛ sↄ̃ntɛ bàmɛ.
19 Nana náanisaridea warikɛgↄrↄa
de lán saka gyãre ke gbá ɛrɛɛ bàmɛ.
20 Pↄnna lɛ̀sina pↄsiradenɛ
de lán utasimmana ĩampurugↄrↄ
ke yũku kana bↄ̀ↄa bàmɛ.
21 Tó nà tɛni n ibɛrɛ dɛ, ǹ pↄ́ble kpáa,
tó ímimɛ sↄ̃, ǹ a gba í.
22 Tó n kɛ̀ lɛ, ntɛni a ↄ kúnɛ a lɛ́amɛ,
Dikiri ni fĩna bonnɛ.
23 Lákũ gugbãnduru kpa ĩa dì su kũ legũo nà,
lɛn gbɛ̃pinaa dì su ãnsisinaao lɛ.
24 Ina kpɛ́ laasin mana
de kunna kpɛ́n lɛɛlɛ kũ nↄ fìtideola.
25 Baaru nna bonaa bùsu zã̀zãn
de lán íyĩdakpana gbɛ̃ kũ a gbãna làkaaa bàmɛ.
26 Gbɛ̃ mana kũ àdi we vãnikɛriinɛ
de lán ísɛ̃boki kũ a í yanaa bàmɛ,
lán lↄ̀gↄ kũ a í yàkaa bà.
27 Zↄ́blena dasi manaro,
gbɛ̃ bɛ̀ɛrɛlina a zĩdanɛ gakuri vĩro.
28 Gbɛ̃ kũ à a zĩda kũna dↄ̃ro
de lán wɛ̃tɛ kũ a bĩni gboronaa bàmɛ.