6
Fĩna kũ ma'ão kũ bisãsiri pão yã
1 Ma nɛ́, tó n n gbɛ̃dake fĩna dì n musu,
tó n zɛnkpɛkɛ sɛ̀ gbɛ̃nɛ,
2 tó n lɛ́ n ásaru kɛ̀,
tó n yã'ona n da yãn,
3 ǹ kɛ dí bà, ma nɛ́, ǹ lɛ́ bo yã pìn,
zaakũ n na n gbɛ̃dake ↄĩ.
Ǹ gɛ́ ǹgↄ̃ zɛzɛ n gbɛ̃dake pìii,
ǹ kútɛ kɛnɛ.
4 Ǹsun tó i gɛ̃ n wɛ́ gũnlo,
ǹsun tó n wɛ́bara tìkisi kũro,
5 ǹ n zĩda sía lákũ gã dì ń kɛ̃ nà,
lákũ bã dì bo gbàgidikpakpari ↄn nà.
6 Ma'ãde, ǹ gɛ́ blɛ̀nↄ gwa,
ǹ a yãkɛna tàasi ká ĩni ↄ̃ndↄ̃ kũ.
7 À don'arɛde vĩro,
à gbɛ̃ zↄ̃kↄ̃ ke dikiri vĩro.
8 Àdi zàna zĩ di sakaremɛ,
àdi a pↄ́ble kakara pↄ́kɛ̃gↄrↄa.
9 Ma'ãde, ĩnigↄ̃ wutɛna ari bↄrɛɛ?
Bↄrɛn ĩni vu inn?
10 Ndì kámma bo fíti ndì i o fíti,
ndì wútɛ fíti ↄkpana n kùsɛɛa.
11 Takasi ni gɛ̃nyĩ lán kpãni wɛ́dewɛ bà,
pↄ́kĩammana ni summa
lán gbɛ̃ kũ à gↄ̃kɛbↄ kũna bà.
12 Bisãsiri pã bi gbɛ̃ vãnimɛ,
àdigↄ̃ kure kũ ɛ́kɛo da a lɛ́n.
13 Àdi yã o kũ wɛ́o kũ ↄo,
àdi sèeda kɛńnɛ kũ gbáo.
14 Manafiki mɛ́ à a nɛ̀sɛ pana,
yã vãni laasunnn àdigↄ̃ lɛ́ gↄrↄ sĩnda pínki.
15 Abire yãi kisira ni sua lɛ́zammanaa sari,
kakatɛna ni gɛ̃i kãnto, anigↄ̃ futɛna vĩro.
16 Yã mɛ̀n suddo kun kũ Dikiri zã̀agu,
à kà se suppla kũ à denɛ tɛ̃̀ ũ.
17 Zĩdabinaa, ɛ́kɛtonaa, taarisaride dɛnaa,
18 yã pãsĩ laasunlɛnaa, wãna vãnii,
19 sèeda ɛ́kɛtona kũ danɛnↄ dↄkↄ̃anaao.
Laakarikɛna zinakɛnaai
20 Ma nɛ́, ǹgↄ̃ n de yãditɛnanↄ kũna,
ǹsun pã kpá n da yãdannɛnaairo.
21 Ǹgↄ̃ kũna n swɛ̃̀ɛ gũn,
ǹgↄ̃ dana mↄ̀wakarɛ ũ.
22 Ani donnɛ arɛ n táa'onaa gũn,
ani n dãkpã n wutɛnaa gũn.
Tó n vu, ani lɛ́ damma.
23 Zaakũ yãditɛnaa pìnↄ bi fitilamɛ,
yãdannɛnaa pì bi gupuramɛ,
lɛ́damma kũ foruo bi zɛ́ wɛ̃̀ndidemɛ.
24 Ani n sí nↄgbɛ̃ vãni ↄĩ,
ani n bo gbɛ̃ pãnde nↄ yãnnanna'onnɛnan.
25 Ǹsun a manakɛ ni dɛro,
ǹsun tó a wɛ́kpãntɛ̃ n kũro.
26 Karuaa dì ń kɛ kori,
gbɛ̃ pãnde nↄ sↄ̃ àdi ń wɛ̃̀ndi bɛ̀ɛrɛde kakatɛ.
27 Tó gbɛ̃ tɛ́ sɛ̀ à dà a pↄtɛn,
a pↄ́kasa ni gí tɛ́ kũi yá?
28 Tó gbɛ̃ gɛ̀sɛɛ pɛ̀tɛ tɛ́yↄ̃a,
ani gí a kpátai yá?
29 Lɛn à de lɛ kũ gbɛ̃ kũ à gɛ̃̀ a gbɛ̃dake nↄiio,
zaakũ tó à ↄ kɛ̀a, ani bo pãro.
30 Tó nà tɛn gbɛ̃ dɛ, tó à kpãni ò,
òdi a yã da pã yá?
31 Tó ò a kũ̀, ani a fĩna bo lɛu suppla,
ani pↄ́ kũ à vĩ a ↄnn kpá pínki.
32 Zinakɛri laasun vĩro,
gbɛ̃ kũ àdi abirekũ kɛ dì a zĩda kakatɛmɛ.
33 Gbɛ̃na mana kũ kpebonaaoomɛ a baka ũ,
a tↄ́ vãni ni kɛ̃aro.
34 Zaakũ gↄ̃gbɛ̃ nɛ̀sɛgↄ̃ba mɛ́ ani su kũ pↄfɛ̃o,
tó àtɛn fĩna boḿma, ani ń wɛ̃nda dↄ̃ro.
35 Ani kútɛkɛbↄ ke síro,
bee tó à gba zↄ̃kↄ̃ↄ dànɛ, ani weiro.