8
Ɔ̃ndↄ̃ tɛni ó sisi
1 Ɔ̃ndↄ̃ mɛ́ àtɛn lɛ́ zuwáiroo?
Wɛ́zɛ̃ mɛ́ àtɛni ó sísiroo?
2 À kú sĩ̀sĩi musu zɛ́ kpado,
à zɛna zɛ́rankpakↄ̃a.
3 À kú wɛ̃tɛ bĩnilɛ sarɛ,
a kòto dↄ bĩnilɛ pìi gbànↄ kĩnaa.
4 Gbɛ̃nↄ, ákↄ̃nↄ matɛni á sisi,
bisãsirinↄ, matɛn lɛ́ zuái.
5 Nigãzĩkɛrinↄ, à laakari wɛtɛ àgↄ̃ vĩ,
yↄ̃nkↄnↄ, à tó àgↄ̃ laasun vĩ.
6 À sã kpá, zaakũ yã tìkisiin mani oárɛ,
yã dↄ̀rↄde mɛ́ ani bo ma lɛ́n.
7 Zaakũ ma lɛ́ dì yãpura o,
ma zã yã vãnigu.
8 Yã kũ ò da ma lɛ́nnↄn mana,
ń ke manafiki ke sãtɛna vĩro.
9 À súsu asãnsĩnidenↄnɛ pínki,
à zɛ́ vĩ gbɛ̃ kũ ò dↄ̃na vĩnↄnɛ.
10 À ma lɛ́damma sɛ́ de andurufula,
à dↄ̃na sɛ́ de wura manala.
11 Zaakũ ↄ̃ndↄ̃ bɛ̀ɛrɛ vĩ de gbɛ̀ bɛ̀ɛrɛdenↄla,
pↄ́ke ni kúmma kũ à kà a ũro.
12 Makũ ↄ̃ndↄ̃ má laakari vĩ,
má yãkɛna a zɛ́a dↄ̃na vĩ.
13 Vĩnakɛna Dikirinɛɛmɛ zãna yã vãnigu ũ.
Ma zã zĩdabinan kũ ĩadãnaao
kũ kunna vãnio kũ yãlɛkpɛrɛ'onaao.
14 Lɛ́damma kũ fayayãkɛnaao bi ma pↄ́mɛ,
ma kĩnaan gbãna dì bon kũ asãsĩnio.
15 Kínanↄ dì kpata ble ma gãimɛ,
kpatablerinↄ dì yãzɛde ditɛ kũ ma gbãnao.
16 Gbãnadenↄ dì iko kɛ ma gãimɛ
kũ andunia kpatadenↄ ń pínki.
17 Má ye gbɛ̃ kũ ò yemainↄi,
gbɛ̃ kũ òdi ma wɛtɛnↄ mɛ́ òdi ma e.
18 Aruzɛkɛ kũ gakurio kú ma ↄĩ
kũ ↄgↄda karanaao kũ kunna nnao.
19 Nɛ́ kũ madì ińnɛ sã̀na de wura manala,
karana kũ madì kɛńnɛ de andurufu swáswala.
20 Má tɛ́ yã mana zɛ́n,
madì táa o zɛ́ súsu gũn.
21 Madì gbɛ̃ kũ ò yemainↄ gba pↄ́,
madì ń aruzɛkɛkatɛkinↄ pańnɛ.
22 Dikiri ma kɛ a zĩ naanagↄrↄa,
ari àgↄ̃ gɛ́ yã kũ à kɛ̀ zaa káakunↄ kɛ.
23 À ma ditɛ zaa káakumɛ,
zaa a naana gↄrↄa, de adi andunia kɛ kↄ̀ro.
24 À ma i zaade ísira kunlo,
ísɛ̃boki ke kun gↄrↄ kũ̀aro.
25 À ma i kpinↄ ã,
ari àgↄ̃ gɛ́ sĩ̀sĩnↄ zĩni pɛ́tɛ,
26 ari àgↄ̃ gɛ́ andunia kátɛ,
ke sɛ̃̀ntɛ ke bùsu wɛ́n do.
27 Kũ àtɛn pↄ́ kũ ò kú musunↄ kɛ,
kũ àtɛn sarapura da ísirala,
28 kũ àtɛn legũ na musu,
kũ àtɛn zĩtɛ í zɛ́ fↄ̃,
29 kũ àtɛn ísira lɛ́zɛki kɛ
de a í sún vĩalaro,
kũ àtɛn andunia kátɛ, má kú gwe.
30 Má kú a sarɛ ↄzĩkɛri mana ũ,
ma pↄ dìgↄ̃ nna a arɛ lákũ gu dìgↄ̃ dↄ nà,
madìgↄ̃ pↄnna kɛ kãao gↄrↄ sĩnda pínki.
31 Ma pↄ dìgↄ̃ nna Dikiri anduniaa,
bisãsirinↄ de ma pↄnnakɛbↄ ũ.
32 Tera sà, ma nɛ́nↄ, à ma yã ma,
arubarikaden gbɛ̃ kũ à ma zɛ́ kũna ũ.
33 À ma lɛ́damma ma à ↄ̃ndↄ̃ kũ,
àsun pã kpáiro.
34 Arubarikaden gbɛ̃ kũ àtɛn sã kpá ma yãi ũ
kũ àdigↄ̃ ma wɛtɛ ma kpɛ́lɛlɛa,
kũ àdigↄ̃ ma dã gↄrↄ sĩnda pínki.
35 Zaakũ gbɛ̃ kũ à ma e wɛ̃̀ndii è,
anigↄ̃ nna kũ Dikirio.
36 Gbɛ̃ kũ à kùramai yã vãni ì a zĩdanɛmɛ,
gbɛ̃ kũ à zã̀magunↄn ye gaimɛ.