118
Gɛna Dikiri ↄnn kũ sáabukɛnaao
1 À Dikiri sáabu kɛ, zaakũ à mana,
a gbɛ̃kɛ lakana vĩro.
2 Isarailanↄ o:
A gbɛ̃kɛ lakana vĩro.
3 Haruna burinↄ o:
A gbɛ̃kɛ lakana vĩro.
4 A vĩnakɛrinↄ o:
A gbɛ̃kɛ lakana vĩro.
5 Ma lɛ́ zù Dikirii ma warikɛnaa gũn,
akũ à wèma à ma gba mɛ̀poroki.
6 Dikiri kú kũmao, vĩna ni ma kũro.
Bↄ́n bisãsiri ni fↄ̃ à kɛmɛnɛɛ?
7 Dikiri kú kũmao ma kpanyĩri ũ,
mani yↄ̃̀gↄ̃ kɛ ma ibɛrɛnↄa.
8 Nana Dikirii mana de
bisãsiri náanikɛnala.
9 Nana Dikirii mana de
gbãnadenↄ náanikɛnala.
10 Buri sĩnda pínki lìkamai,
akũ ma ń kakatɛ kũ Dikiri tↄ́o.
11 Ò lìkamai kpa sĩnda pínki,
akũ ma ń kakatɛ kũ Dikiri tↄ́o.
12 Ò fĩ̀ma lán zↄ́nↄ bà,
akũ ò làka lán kãni tɛ́kũnaa bà,
ma ń kakatɛ kũ Dikiri tↄ́o.
13 Ò ↄ sↄ̃̀mai kpɛ, má ye mà lɛ́tɛ,
akũ Dikiri kpàmai.
14 Dikiri mɛ́ à ma gbãna ũ, a táakin madì lɛ́,
àkũ mɛ́ à gↄ̃̀ ma surabari ũ.
15 À ma, pↄnna wiki dↄ gbɛ̃ mananↄ bùran,
Dikiri ↄpla zĩ zↄ̃kↄ̃ↄ kɛ̀.
16 Dikiri ↄpla kú musu,
Dikiri ↄpla zĩ zↄ̃kↄ̃ↄ kɛ̀.
17 Mani garo, manigↄ̃ kun,
manigↄ̃ Dikiri yãkɛnanↄ baba.
18 Dikiri ma toto manamana,
ama adi tó ga ma sɛro.
19 À zɛ́ mana gbànↄ wɛ̃mɛnɛ,
de mà gɛ̃ mà Dikiri sáabu kpá.
20 Dikiri ↄn zɛ́n dí,
gbɛ̃ mananↄ mɛ́ òdi gɛ̃n.
21 Ma n sáabu kɛ̀ Dikiri, zaakũ n wema,
n gↄ̃ ma surabari ũ.
22 Gbɛ̀ kũ kpɛ́borinↄ pã kpài
mɛ́ à gↄ̃̀ kpɛ́ kusuru gbɛ̀ mìde ũ.
23 Dikiri mɛ́ à abirekũ kɛ̀,
akũ à kɛ̀wɛrɛ yãbonsarɛ ũ.
24 Gↄrↄ kũ Dikiri dìtɛn dí,
ò pↄnna kɛn ó nɛ̀sɛ kɛ nna.
25 N yã nna Dikiri! Ǹ ó sura ba!
Ǹ sùru kɛ Dikiri! Ǹ tó ò sa'a le!
26 Arubarikademɛ gbɛ̃ kũ àtɛn su kũ Dikiri tↄ́o ũ,
zaa Dikiri ↄnn ótɛn gbãnakɛ kpányĩ.
27 Dikirimɛ Luda ũ, à gu pùwɛrɛ.
À zà lá kpákpa àgↄ̃ tɛ́o dikpɛkɛrinↄi
ari sa'oki bɛ̃nɛnↄ kĩnaa.
28 Ma Ludamɛ n ũ, mani n sáabu kɛ,
ma Luda, mani n tↄ́ sɛ́ lei.
29 À Dikiri sáabu kɛ, zaakũ à mana,
a gbɛ̃kɛ lakana vĩro.