Luda yã takada kũ Bisã yão ZABURA 138

138

Dikiri sáabukpana a gbɛ̃kɛ yãi

Dauda lɛ̀ɛ.

1 Mani n sáabu kpá kũ nɛ̀sɛdoo,

mani n táaki lɛ́ gbãnadenↄ arɛ.

2 Mani kútɛ mà arɛ dↄ

n kpɛ́ kũ à kú adona kpa,

mani n tↄ́ bo n gbɛ̃kɛ kũ n náanio yãi,

zaakũ n n tↄ́ kũ n yãoo sɛ̀ lei de pↄ́ sĩnda pínkila.

3 Kũ ma n sisi, n wema,

ǹ ma kù kɛ gbãna, ǹ ma swɛ̃̀ kpátɛ.

4 Tó andunia kínanↄ yã kũ n òo mà,

oni n sáabu kpá ń pínki, Dikiri.

5 Oni lɛ̀ sí Dikiri yãkɛnanↄ musu,

zaakũ Dikiri gakuri zↄ̃kↄ̃.

6 Bee kũ Dikiri kunnamusukɛo,

àdi gbɛ̃ kĩananↄ wɛ̃nda gwa,

àdi wɛ́ tá zĩdabirinↄla.

7 Bee tó wɛ́tãmmanaa lìkamai,

ndì ma wɛ̃̀ndi dãkpã,

ndì ma ibɛrɛnↄ pↄfɛ̃ kpátɛ,

ndì ma sura ba kũ n gã̀ gbãnao.

8 Dikiri ni yã kũ à ò papamɛnɛ.

Dikiri, n gbɛ̃kɛ lakana vĩro,

ǹsun makũ kũ n ma kɛ tóro.