140
Aduakɛna gbɛ̃ vãninↄ musu
Dauda lɛ̀ɛ.
1 Dikiri, ǹ ma sí gbɛ̃ vãninↄa,
ǹ ma dãkpã gbɛ̃ pãsĩnↄ yãi.
2 Òdi yã vãni laasun lɛ́ ń swɛ̃̀ɛ gũn,
fìtiin òdigↄ̃ wɛtɛ gↄrↄ sĩnda pínki.
3 Òdi ń lɛ́ kɛkɛ lán mlɛ̃̀ɛ bà,
ń lɛ́gbɛ bi pitiko sɛwɛmɛ.
4 Dikiri, ǹsun tó gbɛ̃ vãninↄ ↄ namaro,
ǹ ma sí gbɛ̃ pãsĩnↄa,
òdi lɛ́ kpákũsũ de ò ma pãtɛ.
5 Zĩdabirinↄ wɛ̀ɛɛ yↄ̃̀mɛnɛ,
ò tankutɛ kpàkpamɛnɛ,
ò bàa kpàmɛnɛ zɛ́n.
6 Dikiri, ma pìnnɛ: Ma Ludamɛ n ũ,
ǹ sã kpá ma wɛ̃nda wikii, Dikiri.
7 Dikiri Luda, ma surabari gbãna,
mↄkↄ̃n kũ ndì ↄ kúmala zĩ̀lan,
8 ǹsun tó gbɛ̃ vãninↄ ń pↄyeina zɛ́ lero,
Dikiri, ǹsun tó ń lɛ́kpakũsũna kↄ̃ sɛ́ro.
9 Gbɛ̃ kũ ò likamainↄ,
ǹ tó yã vãni kũ òtɛni ma kpákpao wí ń musu.
10 Ǹ tó tɛ́yↄ̃ wãna kúḿma, ǹ tó ò ń zu tɛ́n,
ǹ tó ò si wɛ̀ɛ kũ oni bonlo gũn.
11 Ǹsun tó gbɛ̃yakarinↄ zɛki le andunia gũnlo,
ǹ tó kisira gↄ̃ gbɛ̃ pãsĩnↄ wɛ zɛnaa sari.
12 Má dↄ̃ kũ Dikiri dì yã nna kpá wɛ̃ndadenↄa,
àdi yã kɛkɛ takasidenↄnɛ a zɛ́a.
13 Yãpura, gbɛ̃ mananↄ ni n tↄ́ bo,
nɛ̀sɛpuradenↄ nigↄ̃ kú n arɛ.