148
Dikiri pↄ́ kũ à kɛ̀nↄ a táakilɛnaa
1 Aleluya!
À Dikiri táaki lɛ́, a bedenↄ!
À a táaki lɛ́ zaa musu!
2 À a táaki lɛ́, a malaikanↄ á pínki!
À a táaki lɛ́, a ìbanↄ á pínki!
3 À a táaki lɛ́, ifãntɛ̃ kũ mↄvuraao!
À a táaki lɛ́, susunɛ ínnanↄ pínki!
4 À à táaki lɛ́, sarapura musumusu pↄ́nↄ
kũ í kũ à kú ludambɛlanↄ.
5 Ò Dikiri tↄ́ bo,
zaakũ à yã ò, akũ ò kun.
6 À ń pɛpɛ ń pɛ́pɛkia
de ògↄ̃ kú gwe gↄrↄ sĩnda pínki,
à doka dìtɛńnɛ, oni fↄ̃ ò vĩalaro.
7 À Dikiri táaki lɛ́, pↄ́ kũ ò kú zĩtɛnↄ,
kpↄ̀ gbɛ̃̀ntɛ̃nↄ kũ ísira lↄ̀nↄ
8 kũ legũpinaao kũ legũgbɛɛo kũ legũsisinaao
kũ zàga'ĩa kũ àdi mìi natɛ a yãnɛɛo,
9 kũ kpinↄ kũ sĩ̀sĩnↄ pínki
kũ lí nɛ́'irinↄ kũ sida línↄ pínki,
10 kũ nↄ̀bↄsɛ̃ntɛnↄ kũ pↄ́kãdenↄ pínki
kũ pↄ́ kũ òdi táa o kũ kùaonↄ kũ bãnↄ,
11 kũ andunia kínanↄ kũ burinↄ pínki
kũ kínanɛnↄ kũ bùsu gbãnadenↄ ń pínki,
12 kũ kɛfɛnnanↄ kũ nↄkparenↄ ń pínki
kũ gbɛ̃ zↄ̃kↄ̃nↄ kũ nɛ́ fítinↄo.
13 Ò Dikiri tↄ́ bo,
zaakũ a mɛ̀n do tↄ́ mɛ́ à zↄ̃kↄ̃,
a gakuri de musu kũ zĩtɛola.
14 À kína kà a gbɛ̃nↄnɛ,
kũ a yãmarinↄ dì a táaki lɛ́,
Isaraila kũ ò kãni kãaonↄ.
Aleluya!