19
Ludambɛ gakuri kũ Luda yã gakurio
Dauda lɛ̀ɛ.
1 Musu dì Luda gakuri bo gupuraa,
sarapurapↄnↄ dì a ↄzĩ mↄńnɛ.
2 Àdigↄ̃ yã o'ońnɛ lán gu dìgↄ̃ dↄ nà,
àdi dↄ̃na kpáńnɛ gwãani kũ gwãanio.
3 Àdi yã oro, a yã'ona buri ke kunlo,
òdi a kĩni maro.
4 A kòtoo dì da anduniala pínki,
a yã'onaa dì gɛ́ ari zĩtɛ lɛ́a.
Luda kpɛ́ bò ifãntɛ̃nɛ gwe,
5 àdi bo kpɛ́n à futɛ lán nↄsɛrii bà,
àdi futɛ táo kũ pↄnnao lán gↄ̃sa gbãna bà.
6 Àdi futɛ ludambɛlɛa la,
àdi bikũ à gɛ́ ari a lɛ́a dire,
pↄ́ke dìgↄ̃ utɛna a puusuiro.
7 Dikiri doka papana,
àdi ń kunna kɛkɛ à kɛńnɛ dↄ.
Dikiri yã náani vĩ,
àdi lɛ́ da ↄ̃ndↄ̃saridenↄa.
8 Dikiri dì ↄdↄki dↄńnɛ súsu,
àdi ń pↄ kɛ nna.
Dikiri yãditɛnanↄn gbãsĩ vĩro,
àdi ń ãn wereńnɛ.
9 Mìnatɛna Dikirinɛ zɛ́ pì wɛ́bona,
onigↄ̃ tɛ́i gↄrↄ sĩnda pínki,
Dikiri yãkpatɛkɛna yãpura vĩ,
àdigↄ̃ mana swáswa.
10 A mana de wurala, bee wura mana,
a nna de zↄ́'ila, bee zↄ́ búsu.
11 Abire musu ndì lɛ́ da makũ n zↄ̀bleriia,
gbɛ̃ kũ à n yã kũnaa àree dìgↄ̃ zↄ̃kↄ̃.
12 Dí mɛ́ ani fↄ̃ à yã kũ à zã̀anↄ dↄ̃ↄ?
Ǹ sùru kɛ kũmao kũ ma taari kũ ò utɛnanↄ.
13 Ǹsun tó makũ n zↄ̀bleri taari kɛnnɛ gbĩnigbĩniro,
ǹsun tó durunnanↄ kí blemaro,
manigↄ̃ kun swáswa taari zↄ̃kↄ̃ sari.
14 Ǹ tó yã kũ àtɛn bo ma lɛ́n kángu
kũ laasun kũ à kú ma swɛ̃̀ɛ gũnwo,
Dikiri, ma gbɛ̀si, ma surabarii.