31
Zĩdakpana Dikiria
Dauda lɛ̀ɛ.
1 Dikiri, mↄkↄ̃nn ma nanyĩ,
ǹsun tó wé'i ma kũ zikiro.
Ǹ ma sura ba n manakɛna yãi.
2 Ǹ sã kpámai ń ma faaba kɛ likalika,
ǹ gↄ̃ ma utɛki gbɛ̀ ũ,
zɛki gbãna kũ ani ma faaba kɛ ũ.
3 Ma gbɛ̀si kũ ma zɛki gbãnaoomɛ n ũ,
ǹ domɛnɛ arɛ ń ma da zɛ́a n tↄ́ yãi.
4 Ǹsun tó mà zu bà kũ ò kpàkpamɛnɛnlo,
zaakũ ma surabariimɛ n ũ.
5 Ma a nini nànnɛ n ↄĩ,
ǹ ma sura ba Dikiri Luda yãpurade.
6 Ma zã gbɛ̃ kũ òdi na tãnanↄinↄn,
Dikirin ma náani kɛ̀.
7 Mani yáa dↄ mà pↄnna kɛ kũ n yenyĩo,
zaakũ n ma yã'ũmmanaa è,
n ma warikɛnaa dↄ̃̀mɛnɛ.
8 Ńdi ma na ma ibɛrɛnↄnɛ ń ↄĩro,
n ma gba mɛ̀poroki.
9 Ǹ ma wɛ̃nda gwa Dikiri,
zaakũ má kú wari gũmmɛ,
pↄsira tò ma wɛ́ gↄ̃̀ súkusuku,
ma pↄ sira kũ̀ ma nɛ̀sɛɛ yàka.
10 Pↄsira tɛni ma swɛ̃̀ ble,
ndana tɛni ma wɛ̃̀ lago,
laasun tò má gbãna vĩ doro,
ma wánↄ bùsa.
11 Ma gbɛ̃dakenↄ dì ma gya bo ma ibɛrɛnↄ yãi,
ma yã dì ma gbɛ̃nↄ gba vĩna manamana,
gbɛ̃ kũ odì dakarɛ batunↄ dì pãmɛnɛ.
12 Ma yã dí dↄ gbɛ̃kegu doro,
ma gↄ̃ lán gɛ̀ɛ bà,
ma gↄ̃ńnɛ lán oro kaso bà.
13 Madì ma kũ gbɛ̃nↄ tɛni ma pi dasi,
vĩnapↄnↄn likamai.
Òdi kakara ò lɛ́ kpákũsũmai,
òdi lɛ́dokↄ̃nↄ kɛ ma wɛ̃̀ndibona yãi.
14 Ama ma n náani kɛ̀ Dikiri,
madì pi ma Ludamɛ n ũ.
15 Ma wɛ̃̀ndii dìgↄ̃ kú n ↄĩ gↄrↄ sĩnda pínki,
ǹ ma sí ma ibɛrɛ kũ òtɛni ma wɛtɛ
ò ma dɛnↄ ↄĩ.
16 Ǹ ãn were makũ n zↄ̀bleriia,
ń ma sura ba n yenyĩ gũn.
17 Dikiri, ǹsun tó wé'i ma kũro,
zaakũ ma wiki lɛ̀mma.
Ǹ tó wé'i yãvãnikɛrinↄ kũ,
ǹ tó ń lɛ́ gↄ̃ nakↄ̃ana gyãwãnn,
18 ǹ tó ɛ́kɛtorii pìnↄ nɛ́nɛ natɛ.
Òdi dↄkɛ kũ gbɛ̃ mananↄ,
òdi ń gya bo kũ ĩadãnaao.
19 Aruzɛkɛ kũ n kàkara n vĩnakɛrinↄnɛ zↄ̃kↄ̃,
ndì arubarika da gbɛ̃ kũ ò nanyĩnↄgu
gbɛ̃ sĩnda pínki wára.
20 Tó gbɛ̃nↄ lɛ́ kpàkũsũńyĩ, ndì ń utɛ n kuru,
tó òtɛn lɛ́kpakↄ̃a kɛ kũńwo, ndì ń dãkpã n kukia.
21 Arubarikademɛ Dikiri ũ,
zaakũ à yenyĩ zↄ̃kↄ̃ↄ mↄ̀mɛnɛ
wɛ̃tɛ kũ ò lìkaii gũn.
22 Swɛ̃̀ɛ kɛ̃̀magu gwe,
akũ ma dà, n ma zukũnamɛ.
Kũ ma faaba lɛ́ zùnyĩ,
n ma wɛ̃nda ↄ́ↄdↄnaa mà.
23 Àgↄ̃ ye Dikirii, ákↄ̃nↄ á gbɛ̃nↄ.
Dikiri dì a náanikɛrinↄ dãkpã,
àdi fĩna bo zĩdabirinↄnɛ pãsĩpãsĩ.
24 Ákↄ̃nↄ kũ á wɛ́ dↄ Dikiriinↄ,
àgↄ̃ gbãna à á swɛ̃̀ kpátɛ.