33
Luda sáabukpanaa
À ayuwii kɛ Dikirinɛ gbɛ̃ mananↄ,
à kũ̀ nɛ̀sɛpuradenↄ a sáabu kpá.
À Dikiri tↄ́ kpá kũ gidigboo,
à lɛ̀ sínɛ kũ mↄrↄↄo.
À lɛ̀ dufu sínɛ,
à pↄ́'ũborinↄ lɛ́ kũ dↄ̃naao kũ pↄnna wikio.
 
Zaakũ yã kũ Dikiri ò bi yãpuramɛ,
à náani vĩ a yãkɛnaa gũn pínki.
À ye yã manai kũ yãzɛdeo,
Dikiri yenyĩ andunia pà.
 
Dikiri yã'ona mɛ́ à musu kɛ̀,
a lɛ́'ĩa mɛ́ à musupↄnↄ pɛ̀pɛ.
À í kàtɛ gu dokↄ̃nↄ, à gↄ̃̀ ísira ũ,
à ínↄ kàkara, à gↄ̃̀ í lòkoto ũ.
Andunia gbɛ̃ sĩnda pínki, à vĩna kɛ Dikirinɛ,
gbɛ̃ bɛ̃nɛnↄ pínki, à mì natɛnɛ.
Zaakũ à yã ò, akũ andunia gↄ̃̀ katɛna,
à yã dìtɛ, akũ pↄ́ sĩnda pínki gↄ̃̀ kun.
10 Dikiri dì lɛ́ kũ burinↄ kpàkũsũ kɛ pã,
àdi kpá bùsudenↄnɛ kũ pↄ́ kũ òtɛn pɛ́aao.
11 Yã kũ Dikiri zɛ̀o dìgↄ̃ zɛna gíngin,
yã kũ à a pↄ gbà dìgↄ̃ kun gↄrↄ sĩnda pínki.
 
12 Arubarikaden buri kũ Dikiri de a Luda ũ ũ,
gbɛ̃ kũ à ń sɛ́ a pↄ́ ũnↄ.
13 Zaa musu Dikiri dì gu gwa zĩtɛ,
àdi bisãsirinↄ e ń pínki.
14 Zaa gu kũ à kun àdi wɛ́ pã
gbɛ̃ kũ ò kú andunia gũnnↄla ń pínki.
15 Àkũ mɛ́ à gbɛ̃ sĩnda pínki swɛ̃̀ɛ kɛ̀,
àdi ń yãkɛnanↄ dↄ̃ pínki.
16 Kína ke dì zĩ̀ ble a zĩ̀kari gbãnanↄ yãiro,
zĩ̀kari ke dì bo a gↄ̃sagbãnakɛ yãiro.
17 Sↄ̃ náanikɛna à n mì sí bi ɛ́kɛmɛ,
bee kũ a gbãnakɛnao ani fↄ̃ à gbɛ̃ sura baro.
18 Dikiri wɛ́ kú a vĩnakɛrinↄa,
gbɛ̃ kũ ń wɛ́ dↄ a yenyĩanↄ.
19 Ani ń bo ga lɛ́i,
ani ń gwa nàgↄrↄ.
 
20 Ó wɛ́ dìgↄ̃ dↄ Dikirii,
àkũmɛ ó kpanyĩri ũ kũ ó sɛ̃gbakoo.
21 Zaakũ Dikirin ó pↄ dìgↄ̃ nna kãao,
ó a tↄ́ kũ à kú adona náani vĩ.
22 Dikiri, ǹ tó n yenyĩ gↄ̃ kú kũoo
lákũ ó wɛ́ dↄnyĩ nà.